GBOO SAA KƆYINDI KO A 1

1Na mi, Pɔl, we Gɔd kɔl fɔ bi Jizɔs Krays in apɔsul, ɛn wi brɔda Sɔsti nis, 2de rayt to una ɔl we na Kristiɛn na Kɔrint, we Gɔd kɔl fɔ bi in yon ɛn we dɔn bi in yon, bikɔs una gɛt wanwɔd wit Jizɔs Krays, ɛn a de rayt igen to ɔl dɛn pipul ɔlɔbɔt na wɔl we de pre wit Jizɔs Krays in nem. Na wi Masta ɛn dɛn Masta. 3Mek Gɔd, we na wi Papa, ɛn Masta Jizɔs Krays sho una aw i gud ɛn gi una kol at. 4A de tɛl mi Gɔd tɛnki ɔltɛm fɔ di blɛsin we i dɔn gi una we una dɔn gɛt wanwɔd wit Jizɔs Krays. 5I dɔn gi una ɔl wetin una fɔ gɛt; i dɔn mek una ebul tɔk bɔt am; i dɔn mek una sabi ɔl wetin tru bɔt am. 6Di Gud Nyus bɔt Krays dɔn so sidɔm na una at, 7dat una dɔn gɛt ɔl dɛn blɛsin we Gɔd de gi naw, we una de wet mek Jizɔs Krays kam bak. 8I go mek una nɔ tap fɔ biliv pan am ɛn du ɔl wetin Gɔd want so dat Gɔd nɔ go gɛt ɛni tin fɔ kɔndɛm una fɔ, di de we wi Masta Jizɔs Krays go kam. 9Gɔd we kɔl una fɔ jɔyn an wit in Pikin, Jizɔs Krays, wi Masta, nɔ go disapɔynt ɛnibɔdi we abop pan am. 10Mi Kristiɛn brɔda dɛn, a tek Jizɔs Krays, wi Masta, in nem, beg una mek una ɔl gɛt wanwɔd, mek una nɔ sheb sheb; una ɔl fɔ biliv di sem tin ɛn mekɔp fɔ du di sem tin. 11A de tɔk to una, mi brɔda dɛn, bikɔs Kloe in pipul dɛn dɔn tɛl mi se una kin de mek plaba. 12Mek a ɛksplen wetin a min: sɔm pan una de se, “Na Pɔl a de fɔ;” sɔm de se, “Na Apɔlɔs a de fɔ;” sɔm ɔda wan dɛn de se, “Na Pita a de fɔ;” ɛn sɔm de se, “Na Krays a de fɔ.” 13Krays sheb sheb plɛnti say? Na mi Pɔl dɛn bin kil na di krɔs fɔ una? Na mi nem dɛn bin tek baptayz una? 14A gladi we a nɔ baptayz ɛni wan pan una pas Krispɔs ɛn Gayɔs. 15Mek nɔbɔdi nɔ tɔk se na mi nem dɛn tek baptayz una fɔ mek una fala mi. 16(A dɔn mɛmba naw se a bin baptayz Stɛfa nas wit in wɛf ɛn pikin dɛn, bɔt a nɔ mɛmba igen if a baptayz ɛni ɔda pɔsin). 17Krays nɔ sɛn mi kam fɔ baptayz pipul, i sɛn mi fɔ kam tɛl pipul di Gud Nyus. Bɔt a nɔ fɔ tek mɔta lman yon sɛns du dat; if a du so, i go tan lɛkɛ se fɔ tɔk plen wan nɔmɔ bɔt di day we Krays day na di krɔs nɔ gɛt pawa fɔ tɔch pipul at. 18Di tɔk we wi de tɔk bɔt di day we Krays day na di krɔs na nɔnsɛns to dɛn pipul we nɔ go sev, bɔt dat na Gɔd in yon pawa fɔ wi we i de sev. 19Dɛn rayt na Gɔd in Buk se, “A go pwɛl dɛn sɛnsman dɛn sɛns. A nɔ go tek ɔl wetin dɛn bukman sabi mek natin.” 20Una nɔ si wetin de bi to dɛn sɛnsman, ɛn dɛn bukman ɛn dɛn wan we ebul agyu na di wɔl tide? Gɔd dɔn sho se di sɛns we pipul na dis wɔl gɛt nɔ bɛtɛ. 21Gɔd yus in sɛns fɔ mek mɔta lman nɔ ebul fɛn am wit in yon sɛns. Bɔt i mekɔp fɔ tek di prich we wi de prich bɔt di day we Jizɔs day na di krɔs we tan lɛkɛ nɔnsɛns, fɔ sev dɛn wan we biliv pan Jizɔs. 22Dɛn Ju pipul want wɔnda ful sayn fɔ pruv se Gɔd de, ɛn dɛn Grik pipul de luk fɔ dɛn tin we dɛn kin pruv se rayt wit dɛn yon sɛns. 23Bɔt wi de tɛl pipul se Krays day na di krɔs, dat de mek di Ju pipul dɛn vɛks ɛn di pipul dɛn we nɔto Ju dɛn se na nɔnsɛns. 24Bɔt dɛn wan we Gɔd kɔl fɔ kam to am, Ju o, Grik o, no se Krays, we wi de tɛl una bɔt, na Gɔd in pawa ɛn na Gɔd in sɛns. 25Di plan we Gɔd mek fɔ Jizɔs fɔ day na di krɔs luk fulish na mɔta lman yay, bɔt Gɔd pul sɛns we pas mɔta lman sɛns fawe fɔ mek da plan de. We Jizɔs day na di krɔs, i tan lɛkɛ se Gɔd nɔ gɛt pawa, bɔt di day we Jizɔs day na di krɔs sho se Gɔd gɛt pawa fawe pas ɔl di pawa we mɔta lman gɛt. 26Mi Kristiɛn brɔda dɛn, una fɔ mɛmba udat una bin bi di tɛm we Gɔd kɔl una. Una ɔmɔs, pipul na wɔl bin luk se gɛt sɛns; una ɔmɔs bin gɛt pawa? Una ɔmɔs bin gɛt rɛspɛkt na di kɔntri? 27Gɔd no wetin i de du. I pik dɛn tin we pipul na di wɔl tink se na nɔnsɛns fɔ tek mek dɛn wan we gɛt dis wɔl sɛns shem; i pik dɛn tin we pipul na di wɔl tink se nɔ gɛt pawa fɔ tek mek dɛn big man shem. 28Dɛn pipul we nɔbɔdi nɔ rɛspɛkt na dis wɔl, we dɛn nɔ de luk sɛf, ɛn we dɛn tink se nɔto ɛnibɔdi, na dɛn Gɔd pik fɔ mek dɛn wan we tink se dɛn na ɔl di go, shem. 29Na dat mek, nɔbɔdi nɔ go bost bɔt ɛni tin bifo Gɔd. 30Bɔt Gɔd dɔn mek una gɛt wanwɔd wit Jizɔs Krays; Gɔd dɔn mek Krays bi di sɛns we wi fɔ gɛt. Krays dɔn mek ɔltin rayt bitwin wi ɛn Gɔd, i dɔn mek wi bi Gɔd yon pipul ɛn i dɔn mek wi fri; na Gɔd mek Krays du ɔl dat. 31Na dat mek wi ɔnda stand wetin dɛn rayt na Gɔd in Buk, dat is, “If ɛnibɔdi want bost, mek i bost bɔt wetin Gɔd dɔn du fɔ am.”

will be added

X\