1 Бийле, сизни да кёкледе Бийигиз болгъанын билип, къулларыгъызгъа тюзлюк бла эм тенглик бла къарагъыз. 2 Тилек этиуде тохтаусуз болугъуз, сагъайып туругъуз, хар заманда да шукур этигиз. 3 Аны кибик, биз Аллахны сёзюн жайып, мен аны ючюн тутмакъ болгъан Масихни тасхасын билдирир ючюн, Аллах бизге эшик ачсын деп, бизни ючюн да тилек этигиз. 4 Мен аны кереклисича билдирип, ачыкъ этер ючюн тилек этигиз. 5 Замандан тап хайырланып, ийнанмагъан адамла бла тюбешгенде, акъыллылыкъ кёргюзтюгюз. 6 Сизни сёзюгюз туз бла жарашдырылгъанча хар заманда да шафауат бла болсун; алай бла сиз хар кимге да къалай жууап этеригизни билирсиз. 7 Раббийни жолунда иш нёгер эм ышаннгылы къуллукъ этген сюйюлюннген къарындаш Тихик, мени юсюмден барын да сизге айтыр. 8 Аны уа мен сизге, ол сизни халыгъызны билир эм сизни жюреклеригизни жапсарыр ючюн иеме. 9 Аны бла бирге, сизден болгъан бизни сюйюлюннген ышаннгылы къарындашыбыз Онисимни да иеме. Битеу мындагъы болумланы юсюнден ала сизге айтырла. 10 Мени бла бирге тутмакъда болгъан Аристарх эмда Барнабаны жууугъу Марк сизге салам айтадыла. Маркны юсюнден мен сизге билдирген эдим. Ол сизге келсе, аны къабыл этигиз. 11 Иуст аталгъан Исса да сизге салам айтады. Ала экиси да сюннетлиледендиле. Мени жапсарып, Аллахны Патчахлыгъы ючюн уруннган нёгерлерим жангыз аладыла. 12 Масих Иссаны къулу, сиз тамамлы болур ючюн эм Аллахны ыразы этген хар затдан толур ючюн, сизни ючюн хар заманда да тилек этип кюрешиучю сизни Эпафрас сизге салам айтады. 13 Сизни ючюн эм Лаодикияда бла Иераполда болгъанла ючюн аны уллу эришип къайгъырыуу болгъанына мен шагъатлыкъ этеме. 14 Сюйюлюннген дохтур Лука эмда Димас сизге салам айтадыла. 15 Лаодикиядагъы къарындашлагъа эм Нимфагъа эм аны юйдеги жамауатына салам айтыгъыз. 16 Мени бу жазып ийгеним, сизде окъулгъандан сора, ол Лаодикияны жамауатында да окъулурну къайгъысын этигиз; Лаодикиядан келгенни уа сиз да окъугъуз. 17 Архипге: сен Раббийни жолунда алгъан къуллугъунгу толтурургъа сакъ бол деп айтыгъыз. 18 Мен – Пауул – къолум бла салам жазама. Мени тутмакълыгъымы эсигизде тутугъуз. Аллахны шафауаты сизни барыгъыз бла да болсун. Амин.
