Matthew 2

1ሄሮድሴይ ይሁደ ዉዴ ካቴ ማቅቾ ዎጋከ ዬሱሰይ ዬ ዉድየከ ቤቴሌሜ ከተማከ ኤ ዬሉቶ። ዬንየከ ጾልንቴ ቤድ አበይ ማቄሰ ኤሬስት ቆስ ኬሴ በዴፈ ዬሩሰሌሜ ኡ ዮዶ። 2ኡስን «አይሁደ ካቴ ማቄሴ ዬሉተ ዬሌይ አይ ኤ ዬሴ? ቆስ ኬሴ በዴፈ ኤሱሴ ኦሄ ጾልንቴይ ኬሱሱኔ ቤድኮ ኤ ቡሮ አክርየ ኑ ዮዶ» ዬይድ ህስኔ ኡ ኦይጮ። 3ካት ሄሮድሴን ዬ ዜሬ ሲድ ኢተነዎ ኤ ዱኤይዶ። ዬሩሰሌሜ አሥትን ዬይድዎ ኡድ ኤሱኬ ሌሞ ኡ ኬሶ። 4ኤስን ዬ ኤሱነ ከህንቱሴ አፈነ ማግታረ ሙሴ ዎገ ኤሩሴስታረ ኡድ ጼይጉስ «ሜስሄይ ዬሉቴስ አየነ?» ህድ ኡሶ ኤ ኦይጮ። 5ኡስትን «ሜስሄይ ዬሉቴስ ይሁደ ዉድየከ ቤቴሌሜ ከተማኮ። ዬ ኤሰን ኤሱነ ኑ ኤሬስ ካየሥ ፍሸሮወከ 6‹ኔኖ ይሁደ ዉድየከ ቤንቴ ቤቴሌሜ! ኔካፈ ተ አሥተ ማቄ እስረኤለሥተ ከኬ ብዝ ዱርኬስ ኤ ኬሴ ግሸ ይሁደ ዉድየ አንጉሴ ማዼሴ ከተምታፈ ፌቶ ኔን ኤሮ ማቁወነኮ› ዬይድኮ ኤ ዲዜቸ» ዬይድ ኡ ህዶ። 7ዬ ኤ ጌዴን ሄሮድሴይ ጾልንቴ ኤረሥተ ኣችያነ ጼይጉስ ጾልንቴይ ቤንቴቾ ዎገ ብዞን ሸቶ በድ ኡድ ኦይጭ ኤ ኤርዶ። 8ኤስን «ሀንጉወይቴ፥ ዬ ዬሉተ ዬሌ ነዽ ሞዹስ ዎርጉወይቴ። ህ ዴጌሶይነ ተንን ሀንድ ኤሱሴ አክሮሮንኬ ዮድ ታኮን ኦሁወይቴ» ዬይድ ህስኔ ቤቴሌሜ ኡሶ ኤ አንሶ። 9- 10ኡስን ዬ ካት ሄሮድሴሴ ቤ ሲዶስ ጌዴ ኬስ ዸድ ሀንግስኔን ቤ ዉዴ ቤ ቤዴቾ ጾልንቴን ሴኬ አስ ቤድ ኦርጄነ ኬደይስ ኡ መዶ። ዬ ጾልንቴን ኡ ቡሮነ ዱርክስኔ ኣንድ ዬ ዬሌይ ዬሴ ጎዶ ኤ ኤዾ። 11ዘወ ጌል ዬሌይ ቤይንዶ ማረምየረ ዬሱኔ ኡ ቤዶ። ቦጩንትን ኡ አክርዶ። ኤሰ ቤ ኦዴቾሸ ዶዽ ዎርቄ፥ ሰዌ እጻኔ፥ ከረወ ዬይስ እንጎ ኡ እንዶ። 12ዬ ኤ ጌዴን ዎንቶይ አፉከነ ኡሶ «ሄሮድሴኮ ማዾፍተ» ህድ ኤ ህዶ ግሸ ፌዴ ኦግየነ ማዽ ቤ ዉዴ ኡ ሀንዶ። 13ጾልንቴ ኤረሥት ሀንዶ ጌዴ ዎንቶ ዎሰሥ ዮሴፌሴ አፉከነ አዴይድ «ሄሮድሴይ ሀ ዬሌ ዎዼሴ ዎርግየ ኤ ዬሴ ግሸ ዴንዱወ፥ ሀ ዬሌ ኤስንዶወረ ኤት ግብጼ ዉዴ ዸድ በኡወ! ሀንኬ ኔ ማቆሮንኬ ኔኮ ተ ኦሆሮ ኣሎ የሀ ዴጩወ!» ዬይድ ኤ ህዶ። 14ዮሴፌን ጌሁንሳፈ ዴንድ ዬልየረ ኤስንዶወረ ኤት ቀመ ግብጼ ዉዴ ዸድ ኤ ሀንዶ። 15ሄሮድሴይ ሀይኦሮ ኣሎ የሀ ኤ ዬሶ። ዬ ኤስን ዎንቶይ ቤ ካየሡነ «ተ ዬሌ ግብጽየፈ ጼይዱሶ» ዬይድ ኤ ዜርዴቾሽ ኣሎሮንኬኮ ኤ ማዾ። 16ሄሮድሴይ ጾልንቴ ኤረሥት ብየ ቃሩሶሰ ቤ ኤርዶ ዎጋከ ኢተነ ኤ ሁሎ። ቤቴሌምየካረ ኤ ጎጌ ዬቸ ጎዶወካረ ኡድ ቤ ቶረሥተ አንስ ኡ ቤረይ ለምእ ቤራረ ለምእ ቤረሜ ዬክየረ ማዼሴ ነአጽተ ኡድ ኤ ዎዹሶ። ዬ ለምእ ቤረሴን ዬይስ ኤ መቶስ ጾልንቴይ ቤንቴቾ ዎገ ጾልንቴ ኤረሥት ገረፈ ኦይጭ ቤ ሲዴቾንኬኮ። 17- 18ዬንኬዎ ካየሥ ኤርምየሴይ «ራመ ከተማ ዬፎ ጋሬይ ኤ ስንቴ፥ ኢተ ዬፎወረ ለገ ጋርየረኮ የሀ ኡንደ፥ ረሄሌኮ ቤ ነይሽ ግሸ ዬኬሰ፥ እ ነይሽ ሀይዾ ግሸ ኦሴዬ እ እንጸኤ» ዬይድ ህስኔ ኤ ዜርዴቾሽን ኣሎ። 19ሄሮድሴይ ሀይዾ ጌዴ ዮሴፌይ ግብጼ ዬሱኔ ዎንቶ ዎሰሥ ኤሱሴ አፉከነ አዴይድ 20«ዬሌ ዎዼሴ ዎርግቸሽት ሀይዾ ግሸ ዴንዱወ፥ ሀ ዬሌ ኤስንዶወረ ኤት እስረኤሌ ዉዴ ሴኬ ሀንጉወ!» ዬይድ ኤ ህዶ። 21ዮሴፌይ ዴንድ ዬሌ ኤስንዶወረ ኤት እስረኤሌ ዉዴ ማዽ ኤ ዮዶ። 22ዮድ ብየዴ ሄሮድሴ ጎዶ አርኬለዎሴይ ይሁደ ዉዴ ካቶሰ ሲድ ዮሴፌይ ዬ ዉዴ ሀሜ ኤ ዠሾ። አፉከነ ሀቴን አስ ዎንቶይ ኦትኔ ገልለ ዉዴ ኤ ሀንዶ። 23ዬ ዉዴ ቤ ሀንዶ ጌዴ ነዝረቴ ከተማከ ኤ ኡቶ። ዬይድን ኤ ማዾስ ካየሥቱነ «ነዝረተሤ ህድኮ ኤ ጼይጉቴ» ህድ ህዩቴቸ ካዮይ ኣሎሮሰኮ።

will be added

X\