Titus 3

1Möce sowu pikuk kuywey poytoyik oko piko co ponto kamukeywek, oŋnkulimnci oŋnkuyiytakey kwiy yisyo ake tokol nye topon. 2Mwoci mente kuŋom kuŋalale cek kwapi ci ake tokol nye puryo kot kuponto parar, ntene möce kuponto sikenotet oko kopurto nye topon nyepo okokoy om wule mite piko tokol. 3Omnye kiciku acek ikye perper nye kipuryo kot ciyweyisyi. Kikicepotye cerup aret ake nye kiciku mutworik cepo corokyinotet cepo ŋalek wok tokol. Kicipurtoy sokornatet oko corokyinotet, nye kicesenkeri piko oŋnkyesenkerkey acek kwacek nkit. 4Ntene ntowo kupor Yiyintet kosopintenyo toponiyet oko cömisyenyi om wule mite piko, 5yoto kusopec acek. Kipuryo kot ku kule omnye kiciy acek kiy ake tokol nye topon, ntene om cömisyenyi nkit kunye kisopec kusir kowunet nye kikonec acek Muyet Nyetilil nye yiyotet nyelel oko soponto nyelel. 6Kikonec acek Yiyintet Muyet Nyetilil kuyomec kupunune wule mite kosopintenyo Yesu Kristo, 7sukuŋet cesatec cenyolu om wule mite Yiyintet kusir poypoyenyi oŋnkyenyoru soponto nye mopoku nye cemite cikeni. 8Ŋalek cepo manta coto. Amöce ani kule titirci nyi ŋalecato sukuŋet piko co yene Yiyintet kusot kukoytokey kwiyis yisyonutek ce toponec. Toponec oŋnkuponto latik ŋalecutecu om wule mite piko. 9Ntene syem koromun tay tintenotet oko pararet nyepo ŋalek ce nöme ntarastinek. Puryo kot kuponto ŋaleca latik mpo kisic. 10Möce sowu aret oyeny cito nye sutu pciyatet; nto kapok yaste kwiyat neto nkit oko ŋalekyi. 11Nketi nyi kule kuwur cicoto oŋnkuporu miyotyonikyi kule masat. 12Ye koyoku ani Artema nto Tukiko kuco wule mite nyi kuroke syem koromun ico okoy punu wuli amite ani om Nikopoli, omnye kwayiytekey kule wopur wuloto okoy awany pesyosyek cepo koytityet. 13Syem koromun kalye Sena nye nkete ntarastinek oko Apolo sukuŋet kusorkey lakwar kucec poninekwa oŋnkikas kule kanyor cekto kiy ake tokol nye möce. 14Mwoci kunetkey piko ceco kukoytokey kwiyis yisyonutek ce toponec, sukuŋet kunyor tukuk ce kolyoy cekto, puryo kot kuroke kupurto kapurto nyepo soponto nye moponto latik. 15Kesupayak akwek piko tokol ce cepontekey oko ani. Asupay mpo akwek coronutek cicacek om koyenet. Opurte akwek tokol poypoyet nyepo Yiyintet.

will be added

X\