Titus 1

1Cone parwani wule amite ani Paulo nye mutworintetap Yiyintet oŋnku kiyokintetap Yesu Kristo. Kicekweya ani oŋnkyiyokto wakalye otosyi koyenet nyepo pikap Yiyintet kweyanik oŋnkanet cekto kunket ŋalek cepo manta cepo tininyo, 2nye kokenotet nyepo soponto nye mopoku. Kikurto Yiyintet soponto nyitenyi ikye keny om towunot; kunyo puryo kot kuperperisyi. 3Oŋnkuŋoŋwec ŋolyontoni om pesyet nye yeme. Kicekono ani kule mwayte ŋolyontoni, kunyo omwowu kuyu wulo kimwowo Yiyintet kosopintenyo. 4Osiluŋ ani nyi Tito werimwani nyepo manta om koyenet nye ceponte. Kante kukoniŋ nyi Yiyintet Papa oko Yesu Kristo kosopintenyo poypoyet oko kalyet. 5Kyopokokyiŋ ani nyi Kurete kule sukuŋet sat yisyet nye kikiŋet nye kimöce kule takyiy om wuloto. Kyomwowuŋ yoto kule kwey poyik ce kentoci pikap Yiyintet om moŋet ake tokol. 6Pontet nye cekweye kunye moponto lelis ake tokol. Misyini kuponto korket akenke pate, oŋnkukikoyen lekokyi ce puryo kot kusokaran nto ce kimosokis. 7Kosintet kunye kantoyintet nye ripe piko cepo Yiyintet, kunyo puryo kot kuroke kuponto lelis, puryo kot kumisyini ku ci nye silekey koromun, nto nye nyeru lakwar, nto pororin, nto nye moroŋya nyepo pesanik. 8Misyini kwek ci nye poyisyi oŋnkucome tukuk ce toponec. Misyini kwek cito nye ripekey nkit, nye siken, nye paypay oŋnkumuytoy. 9Misyini kwek cito nye kwilat om lokoywek ce toponec; nye cikenekey oŋnkurupe konetisyet nyinyacek. Om aret nye yunyitenyi kuye mosukotitir neto piko alak om konetisyet nyepo manta, oŋnkupor ŋolyontet nye masat om wule mite piko co toye ŋolyontonoto. 10Omnye mite piko ce caŋ ce mosotin ce perpere piko alak om ŋalekwa cepo perpereryo, nto piko ce pëlisyi om koperperisyonoto ku piko co kuweckey kukwane tinitap Yutayek. 11Roke cekerekta ŋalekwa, omnye mite cekto kumose piko cepo kestonik tokol kunete konetisyet nye puryo kot kuroke cinet, omnye möce kule cenyoru pesanik om aret nyepo sornon. 12Kimwey akenke om picoto, nyoto kunye sute cekto kule workoyontemwa, kimwoy kule, “Pikap Kurete kuce kaperperot, cepo kwak, tyoŋin ce miyotec, oŋnkucemoyetis ce puren.’’ 13Kimwoy neto cito nyoto ŋalek cepo manta, kunyo misyini polyi nyi cekto koromun sukuŋet kunyor koyenet nyepo manta, 14nye komo kurupe cekto tyonkocok cepo Yutayek oko ntarastinek cepo piko co kitay ŋalek cepo manta. 15Tilil kiy ake tokol om wule mite piko co tililec kwicek nkit, ntene puryo kiy nye tilil om wule mite piko co kiwuryo oŋnkupuryo kot kucömisyi, omnye kiciwurta ŋomnonet oko kasoteywek cikwa. 16Sutakey cekto kule cinket Yiyintet, oŋnkurok kutoye Yiyintet om yisyonutekwa ce yiye. Kisenkeris oŋnkutoyis nye puryo kot kuyeme kwiy kiy nye topon.

will be added

X\