Romans 9

1Oŋololi ani ŋalek cepo manta, opoye Kristo nye moperperisyi: Kasoteywekwani ce poytoy Muyet Nyetilil kuce poru kule puryo kot operperisyi. 2Oponte nerekwek ce caŋ oko mwoninto nyewo om mukuleymwani. 3Omnye aomöce kule cecupo oŋnkocone wule mite Kristo om kaynetap mpo yeyamwani cepo yememwani ce cetupce. 4Cekto kuce pikap Israel ce kikwey Yiyintet. Kikwey kwek lekokyi oŋnkunyor woyintap Yiyintet. Kikoci kirotyet oko ntarastinek, ponto mpo sayet nyepo manta, oŋnkikurtoci Yiyintet cekto. 5Cekto kuce mucokoronikap mpo kukonyo taman ok oyeny. Kicone Kristo kuyu ci arenyacek. Kante cikasta Yiyintet okokoy okoy okokoy, Yunyoto. 6Puryo kot omwowu kule kimokwiyisyi kurtoyetap Yiyintet. Omnye puryo kot kupo piko tokol cepo Israel Yiyintet. 7Oŋnkupuryo kot ku lekokap Yiyintet piko tokol ce kesenisyekap Apram. Omnye kimwoci Yiyintet Apram kule, “Kupunte Isaka kuye mesonyoru nyi mucokoronik.’’ 8Poru ŋalecu lekok co kiceyi kuyu kwak, kuce puryo kot kweku co lekokap Yiyintet, ntene lekok cepo kirotyet kuce ciyite kule mucokoronik cepo manta. 9Omnye kikurto Yiyintet om ŋalecu kule, “Mosoketukey ani om pesyet nye kweyat, kunyo mosukuyi Sara werit.’’ 10Ntene puryo kot ku ŋalecu nkit pate, omnye lekokap Rapeka oyeny kuce kiponto kwan akenke nyoto ku kukonyo Isaka. 11- 12Ntene ye kitompo ceyi cekto oŋnkutompo kot kwiy kiy nye topon nto nye miyat, kimwoci Yiyintet Rapeka kule; “Mosukwici Werit nyewo yisyet Werit nye miniŋ’’ Kwiyakay kuyunyoto sukuŋet kutok kupoyit manta kule kweye Yiyintet cito nye kokur nye puryo kot kuyoŋe tukuk ce yiye piko. 13Kuyu wulo kicesil kule, “Kyacäm ani Yakopo, ntene asenker Esawu.’’ 14Kunyo mecemwowu kulene? Mocemwowu kule puryo kot kwiye Yiyintet cepo manta? Puryo kot kuyunyo mpo kisic! 15Omnye kimwoci Yiyintet Moses kule, “Mosakalye ani ci tokol nye kakwey, mosarire ci tokol nye kacäm.’’ 16Kunyo puryo kot ku kito nye möce cito nto nye yiye cito nye ponto latik, ntene kwone pate kokolyoyisyet nyepo Yiyintet nkit. 17Omnye mwocini silutekap Yiyintet Farawo kule, “Kyakweyiŋ ani nyi yiku kinko kule sukuŋet oporu kamukeywekwani, oŋnkoporu cinket kaynemwani om koret tokol kumukul.’’ 18Kunyo rire kukalya Yiyintet ci tokol nye keyen neto. 19Kunyo mesemwowo ani akenke om akwek kule “Ye yunyoto, omne yu tokumite kulele Yiyintet cito? Ŋo nye muce kukerekta Yiyintet om kito nye möce?’’ 20Ntene corwenyu, nyi ku ŋo ci nye muci ŋalal wekyi Yiyintet. Puryo kot kutepe teret cito nyo kikwiy teronoto kule, “Omne seyiya ani nyi kuyunyi?’’ 21Ntene ponto cito nyo yiye terenik kwiyisye menet kuyu wule moktoy, muce kwiyisye menonoto akenke kwiy terenik oyeny, akenke kunye kyiyisye om sokwonutek, nto ake kunye kyiyisye kwak okokoy. 22Kunyo yunyoto kupoyit manta wule kikwiyta Yiyintet. Kimöce kule oporu nyerunotet nyenyi oko kamukeywekyi. Yoto kumuytoci oŋnkukoŋis koromun om wule mite piko ce kinyerci neto, co kiceyiyta kule kyaranta. 23Kimöce mpo kule oporu woyinto nyenyi nyo kicekonec acek ciku piko cepo kokolyoyisyenyi, acek coto kuce kikiwiyta neto sukuŋet kunyor woyinto nye nyi. 24Omnye acek kuco kicekurec, nye puryo kot ku Yutayek pate nkit, ntene mpo Lamek. 25Kuyu wulo mwowu kitaputap Yosiya kule, “Piko ce kipuryo kot ku cikwani, mosokure ani cekto, ‘Pikwani’ Yemet nye kipuryo kot ocöme, Mosokure ani. ‘Cämanenyu’ 26Nto om wulyo ake tokol wule kicemwocine cekto kule, ‘Puryo kot oyiku pikwani’ ku wuloto wule mosicekure cekto lekokap Yiyintet nye sope.’’ 27Kunyo kurtoy kumwowu mpo Isaya ŋalek ce nöme Israel kule, “Nka kot ku caŋ pikap Israel cete coŋinto ŋaynet nye mite tapantap ruretyet, ntene tukusic pate ce mokusopco.’’ 28Omnye mosukuwosontyi Mokoryontet musankut koret om lakwar. 29Kerkey oko wulo kiŋor Isaya keny kumwoy kule, “Nto kipuryo kot kupokokwec acek Mokoryontet nyepo kamukeywek tokol kesenisyek, nto kicekerkeyitu Sotom, nto kicekerkeyitu mpo oko Komora.’’ 30Kunyo mocemwowu ne? Mocemwowu kule Lamek co kipuryo kot kusyeme kule cesatkey cenyolu om wule mite Yiyintet kuce kicesat kunyol om wule neto omnye kiyen. 31Nto pikap Israel ce kiceny ntarastit nye sukuŋet kusat cekto kunyol om wule mite Yiyintet kuce mnonyor? 32Omne? Omnye kito nye kikwiy kunye puryo kot kunöme koyenet, ntene nöme pate yisyonutek. Yoto kunoc cekto rwantet nyo nokisyi. 33Kuyu wulo kicesil om silutekap Yiyintet kule, “Akäs pa, kokoci Siyon rwantet nye noce piko. Rwa nye noce piko koputis; Ntene puryo kot kolilone ci tokol nyo yene neto.’’

will be added

X\