Romans 7

1Mpo yeya, oŋnket akwek kupoyit manta ŋalek ce amöce ani kule omwowu, omnye oŋnketi tokol ntarastinek. Poytoy ntarastinek pate cito ye tokusope. 2Kuyu korko nye mütat. Ripe nyo ntarastinek om wule mite santenyi ye tokusope, ntene ye kame santenyi, yoto kuye kutyak om wule ntarastinek cepo santenyi. 3Nteye kepurcini neto oko citake ye tokusope santenyi mosicekur kule kasakwayen korkonoto. Ntene ye kame santet, komo kuripe neto ntarastinek, kunyo komokwiye sakwayanat ye kemüt citake. 4Mpo yeya, yunyoto om wule omite akwek kyopoku om wule mite ntarastinek, omnye oyiku kereryantetap porto nyepo Kristo, kunyo opoye yawut neto nyo kiciŋet kotutune met sukuŋet cepoyitu acek latik om yisyet nyepo Yiyintet. 5Omnye ye kitoceponte acek soponto nyepo cito; kuye kikwiyisyi yoto corokyinotet nye miyat kupunte ntarastinek ce kimite porwonikyacek oŋnkusut met. 6Ntene yawut acek co kicityacec cekwane wule mite ntarastinek, kuce kicepoku cekwane wuloto, kinömec ciku mopusin. Kunyo kimokyiyisyi om aret nyepo keny nyepo ntarastinek ce silotin, ntene kyiyisyi om aret nyelel nyepo Muyet Nyetilil. 7Kunyo moceŋalal ce mwowu kulene? Mocemwowu pa kule ponto ntarastinek miyotyet? Puryo kot kuyunyo? Ntene ntarastinek kuce porwo ani sukuŋet oŋnket miyotyet. Kipuryo kot omuci kot oŋnket corokyinotet nto kipuryo kot kumwoy ntarastinek kule. “Mente ocorokyi kiy.’’ 8Kinyor miyotyet poroyinto sukuŋet kowurur corokyinotet ake tokol nye mitowune wule omite ani, omnye kikwiyis kupunte ntarastinek. Omnye miyotyet kunye kiy nye kime ye puryo kot kumite ntarastinek. 9Kimite pesyosyek alak om soponmwani ye kipuryo kot oŋnket ntarastinek, ntene ntowo kuco ntarastit, yoto kotut miyotyet, yoto amey ani: 10Nto ntarastit nye kicemöce kule sukuŋet kusutwo soponto, kunye nyoto nye kisutwo ani met. 11Omnye yu kowo kunyor miyotyet poroyinto kupunte ntarastinek, yoto kuperpera ani okoy kupakäca. 12Tilil ntarastinek kwine nkit, tililec koyomiset, oŋnkupo manta, oŋnkutopon. 13Poru pa ŋalecu kule kito nye topon kunye kisutwo ani met? Puryo kot kuyunyo! Miyotyet kunye kisut, omnye kikwiyisye miyotyet kito nye topon sukuŋet kusutwo ani met oŋnkupor kutok wule yunto miyotyet. Kunyo porwec ntarastinek kule miyotyet ku miyotyo kupoyit manta. 14Cinket kule mite ntarastit kupo muyet, ntene poyto ani porto, kicalya ani sayiy miyotyet. 15Puryo oŋnketi kito nye oyiye, omnye puryo kot oyiye kito nye amöce kule ayiy ntene aŋnkayiy kito nye puryo kot amöce kule ayiy. 16Ye oyiye ani ce puryo kot omöce kule ayiy, kuporkey kule ocöme kule toponec ntarastinek. 17Omnye puryo kot ku ani nye oyiye kiyitenyi, ntene miyotyet nye mitowune wule amite ani orit nye yiye. 18Oŋnketi kule puryo kiy nye topon nye mite pormwani, omnye nka kot amöce kule nto ayiy kiy nye topon, kupuryo kot omuci kot ayiy. 19Puryo kot oyiye kito nye topon nye amöce kule ayiy, ntene owece oŋnkayiy kito nye miyat nyo puryo kot amoce kule nto ayiy. 20Kunyo ye oyiye kito nye puryo kot omöce kule nto ayiy, kuporkey kule puryo kot ku ani nye oyiye kiyoto ntene miyotyet nye mitowune wule omite kunye yiye. 21Kunyo oköse ani kule yiyisyi ntarastit kuyunyoto. Omnye ye amöce kule ayiy kito nye topon, ku miyotyet pate nye okweye ani. 22Oŋerekyini om soponmwani nyepo Muyet ntarastinekap Yiyintet. 23Ntene oköse ntarastit nye cone kasoteywekwani, kunyo sutwo oyiku mopusyontet nyepo ntarastitap miyotyet nye mite kwiyisyi om pormwani orit. 24Opo! Oyiku ani ci nye kitaŋany koromun! Ŋo nye mosukusorwo om wule mite porto nyi mokusuto wule mite met? 25Makaste Yiyintet nye kisorwo kupunte Mokoryontenyo Yesu Kristo. Kunyo soponto nyimwani nye oponte kunyi. Ani nkit kunye oripe ntarastinekap Yiyintet om kasoteywekwani, oŋnkurok kwiyisyi porto nyimwani kwicini yisyet miyotyet.

will be added

X\