Romans 5

1Kunyo ye kicesatec acek cenyolu om wule mite Yiyintet kupunte koyenet, kunyo ceponte kalyet oko neto kupunte Mokoryontenyo Yesu Kristo. 2Kisutwec acek neto koyenet cenyoru kupeyokap Yiyintet ce cemite ciportoy yawut. Kunyo ceŋereci om kokenotet nye ceponte om woyintap Yiyintet! 3Ceŋereci mpo om toŋoŋutekyo omnye cinket kule sutu toŋoŋutek muytocinotet, 4oŋnkusutu muytocinotet cämntayet nyepo Yiyintet, oŋnkutec cämntayet nyitenyi kokenotet. 5Puryo kot kulotwec acek kokenotet omnye kikoci Yiyintet koyenet kowut mukuleywekyacek orit kwiyisye Muyet Nyetilil, nyoto kunye kokotutyetap Yiyintet nye kikonec. 6Omnye ye kimo ceponte acek swamet, yoto kumeci Kristo piko ce miyotec om pesyosyek ce kikwey Yiyintet. 7Kiy nye wuy ye mokumeci citake cito nyetilil. Mukoktos om aret ake kusyem cito ake kot kumeci cito nyetilil! 8Ntene kiporwec Yiyintet wule cömntec acek; omnye ye kito ceponte acek miyotyonik, yoto kuye kumecec Kristo! 9Kunyo ye kicesatec acek cenyolu om wule mite Yiyintet om metap Kristo, porukey kupoyit manta kule mosicesorwec acek om wule mite nerekwekap Yiyintet kupunte neto. 10Kiciku acek ikye punik cepo Yiyintet, ntene kiwecec yawut ciku coronutekyi kupunte metap Werinyi. Kunyo omnye ciku yawut coronutekap Yiyintet, aret cetya nyun ce cimuci cisopec om soponto nyepo Kristo! 11Ntene nka kot ku coto tokol, ceŋereci acek om wule mite Yiyintet kupunte Mokoryontet Yesu Kristo nye kiwecec ciku coronutekap Yiyintet. 12Kunyo, kuyu wulo kico miyotyet koret kupunune cito akenke, oŋnkusut kunäm met piko tokol, omnye kikowurta piko tokol. 13Kupoyit manta kimite miyotyet koret kutompo kot cekon ntarastinek, ye puryo ntarastinek kupuryo kot ciyite miyotyet. 14Kunyo kipayta miyotyet piko kuceke Atam okoy kupun Moses, kipayta oko mpo piko co kipuryo kot kowurta kuyu Atam, nye kikwiri ntarastinekap Yiyintet. Atam kunye kikerkey oko neto nyo kicikene kuco. 15Ntene puryo kot kukerkey cutecu tukway, omnye puryo kot kukerkey kokotutyetap Yiyintet nyepo pöc pate oko miyotyetap Atam. Manta kule kipok piko ce caŋ kupo miyotyet nyoto po cito akenke. Ntene cemosi nyewo koromun poypoyetap Yiyintet. Kunyo mpo kokotutyenyi nye kocini piko ce caŋ kupunte poypoyetap cito nyoto akenke Yesu Kristo. 16Kunyo pciyat kokotutyetap Yiyintet oko miyotyet nyepo cito akenke, nyoto kunye kisutyi kulot piko musankut nyepo lelisto. Ntene kikwiy piko miyotyonik ce caŋ, yoto kuco kokotutyet nye numune piko lelisto. 17Po manta kule om miyotyet nyepo cito akenke yoto kupoytoyis miyotyet kupo cito nyoto akenke. Ntene nyewo koromun yisyet nye kikwiy cito akenke Yesu Kristo! Co mosukunyor poypoyetap Yiyintet nyewo koromun oko kokotutyet nyepo tililinto kuce mokupoytoyis kupëlis om soponto kupunte Kristo. 18Kunyo kuyu wulo kisut miyotyet nyepo cito okenke musankut om wule piko tokol, kuyunyoto kusut yisyet nye topon nyepo cito akenke kalyet oko soponto om wule mite piko tokol. 19Kuyunyoto kikwiri cito akenke ntarastinek kwiy miyotyet sukuŋet kowurta piko ce caŋ, kuyunyoto wule mosicesatita kunyol piko ce caŋ om wule Yiyintet kupunte cito akenke nye kimecec. 20Ye kicece ntarastinek yoto kutosyikey kawurtayet, ntene ye kotosyikey miyotyet, kutosyikey mpo koromun poypoyetap Yiyintet. 21Kunyo kuyu wulo poytoyisyi miyotyet kwiyisye met. Kunyo poytoyisyi mpo poypoyetap Yiyintet kwiyisye toponiyet nye ntowec acek om wule mite soponto nye mopoku kupunte Yesu Kristo Mokoryontenyo.

will be added

X\