Romans 4

1Kunyo mocemwowu ŋolyo ne nye nöme kukonyo Apram. Kinyor kiy ne? 2Nto yunye kicesat Apram kunyol om wule mite Yiyintet om tukuk ce kikwiy, nto ponto neto kito nye silekey, ntene puryo komuce kusilekey taytap Yiyintet. 3Mwowu silutekap Yiyintet kule, “Kucäm Apram Yiyintet, nto omnye kiyen, yoto kuye kusut Yiyintet neto yu ci nyetilil.’’ 4Cikocini cito nye yiyisyi musyaret, ntene puryo kot ciyite musyaret nyoto kwek kokotutek, ciyite kuyu kiy nye konyor kupo yisyet nye kokwiy. 5Nto cito nyo puryo kot kwiy yisyet, ntene kukenekey Yiyintet nyo kolyoy piko co menket neto, ciyite kule tilil neto nyoto. 6Ŋalecutecu kuco kiporu Tauti ye kiŋolole ŋerekwek cepo cito nye cöme Yiyintet. Ye puryo kupunto yisyonutek ceci latik, kimwoy kule: 7Ponto kupeyoy piko co kicikalya miyotyonik cikwa, piko co kicinum miyotyonik cikwa 8Ku ŋerekat cito nyo puryo kot koyityini Mokoryontet kule ponto miyotyet. 9Po ra pa ŋerekwecutecu kiŋolole Tauti pate piko co kicewon? Puryo kot kuyunyo! Po ŋerekwek coto mpo piko co mowonotin. Omnye kocinum ŋalek kukwane silutekap Yiyintet kule. “Kicäm Apram Yiyintet; kunyo omnye kiyen, yoto kucäm Yiyintet neto kwek ci nyetilil.’’ 10Kunyo kikwiyokis ŋalecu oyu? Kutompo kot cewon Apram nto om letut yu kacewon? Kikwiyokis kunyo kutompo kot cewon, ntene puryo kot ku om letut yu kacewon. 11Kicewon Apram om letut, kunyo wonsenyi kunye pelutyet nye poru kule kicäm Yiyintet Apram kwek ci nyetilil omnye kiyen kutompo kot cewon; sukuŋet kwek neto kukonyitap piko tokol ce yene Yiyintet oŋnkucäm neto cekto kule po manta nka kot kupuryo kot kuwonotin. 12Apram kunye kukonyitap piko co wonotin, ntene nye puryo kot ku kule omnye wonotin, ntene omnye purtoy cekto soponto nyepo koyenet nye kerkey nyo kiponto Apram kutompo kot cewon. 13Kikurtoci Yiyintet Apram oko kesenisyekyi kule mosukwek nyimwa koret. Kipuryo kot cekurtoci omnye kirip Apram ntarastinek, ntene omnye kiyen sukuŋet kucäm Yiyintet kule ci nyetilil neto. 14Omnye ye piko co ripe ntarastinek kuce mosikonti tukuk ce kikurto Yiyintet, kuporkey kule puryo kot kupunto latik ye kiciyen, oŋnkupuryo kot koponto latik kurtoyetap Yiyintet. 15Omnye ntarastinek kuce sutu kunyer Yiyintet, ntene ye puryo kot kimite; kupuryo mpo kot kimite kawurtayet nyepo ntarastinek. 16Kunyo co kikurto Yiyintet kuce yoŋe koyenet, sukuŋet kuporkey kutok kupoyit manta kule kikwone poypoyetap Yiyintet, nyepo pöc om wule mite kesenisyekap Apram, nye puryo kot kupo pate piko co ripe ntarastinek, ntene mpo piko co kikoyen kuyu wule kikwiyta Apram. Omnye Apram kunye kukonyacek tokol. 17Kuyu wulo mwowu silutekap Yiyintet kule, “Kayiyiŋ ani nyi yiku kukonyitap yemosyek ce caŋ.’’ Kunyo topon kirotyet om taytap Yiyintet, omnye kiyen Apram. Yiyintet kunye ŋete kotutune met piko, oŋnku nye muce kwiy kutok kiy nye kipuryo kutoku. 18Kiyen Apram oŋnkukenis yoto kuye kipuryo kot kurok kukenis, kunyo kikwek neto kukonyitap yemosyek ce caŋ. Kuyu wulo mwoytoy silutekap Yiyintet kule, “Mokucaŋit kesenisyekuk.’’ 19Nka kot kiponto neto yoto kenyisyek ce kirice pokol, kipuryo kot kucas om koyenenyi ye kesot porto nyenyi nye kikerkeyit nye kime. Nto mpo ye kesot sononetap Sara. 20Kipuryo kot kwasta neto koyenenyi. Kikenekey neto koromun kurtoyetap Yiyintet. Kikoci koyenet nyenyi swamet, yoto kukasta neto Yiyintet. 21Omnye kinkete neto kupoyit manta kule mosukoyitita Yiyintet tukuk ce kikurto. 22Kuyunyoto om koyenenyi kuyit Yiyintet neto kwek ci nye kinyol. 23Ŋalecu “Kwek ci nye kinyol.’’ Kuce kipuryo kot cesilyi neto nkit, 24kicesilwec mpo acek co cecöme kule ciku pic ce kinyol, acek coto kuce ciyeni neto nyo kiŋet Yesu Mokoryontenyo kotutune met. 25Kicikoyto Yesu kumeci miyotyonik cicacek oŋnkyiŋet kotutune met sukuŋet kusatec acek cenyolu om wule mite Yiyintet.

will be added

X\