Romans 3

1Kunyo toponiyo ne nye pëlisyi nye ponto Yutoyin? Nto latik ne ce ponto wonset? 2Caŋ koromun om aret ake tokol! Nyepo tayta kunyi kule, kicikoci Yutayek kurip lokoywek ce toponec cepo Yiyintet. 3Kunyo mokwiy kulene ye puryo kot kuponto Yutayek alake koyenet? Kuporkey so om ŋolyontoni kule puryo kot cikenekey Yiyintet? 4Puryo kot kuyunyo mpo kisic! Yiyintet kunye po manta nka kot komuce kwek ci ake tokol mwiyn, kuyu wulo mwowu silutekap Yiyintet kule, “Misyini cinket kule poye manta ye keŋalal, misyini lotisyi musankuŋuŋ ye kocewosontyiŋ.’’ 5Ntene nteye kaciy acek miyotyet, yoto kuye kupor kule po manta Yiyintet? Mocemwowu kulene? Mocemwowu so kule, puryo kot kupo manta Yiyintet ye kucetaŋany acek? Kaŋalal kuyu ci. 6Puryo kot kuyunyo! Ye puryo kot kupo Yiyintet manta, komuce neto kulene kot kwek ketintet nye mutyini koret musankut? 7Ntene nteye mwiynanemwani kunye poru topon woyintap Yiyintet, omne sicewosontyo ani om miyotyet? 8Cimuci pa cemwowu kule, kyiy miyotyet sukuŋet kuco toponiyet? Mwowu piko co ŋomsi kule ce mwowu acek kuyunyoto. Kicemutyi cekto musankut nyepo manta. 9Kunyo Ceponte acek pa Yutayek soponto nye topon kupël Lamek? Puryo kot kuyunyo mpo kisic! Kwoporu ani keny kutok topon kule mite Yutayek oko Lamek tokol ŋonyutap miyotyet. 10Kuyu wulo mwowu silutekap Yiyintet kule: “Puryo ci mpo akenke nye tilil, 11Puryo mpo akenke nye ŋom, puryo mpo nye cenye wule mite Yiyintet, 12Kiweckey piko tokol kwasta Yiyintet kimosokis piko tokol puryo mpo akenke nye yiye ŋolyo nye topon, puryo mpo akenke. 13Kerkey kutuwak cikwa mwenon ce kicetupci pic ce yototin, oŋnkukwone kutuwak cikwa ŋalek ce miyotec ce kerkey oko mwonet nyepo erenoy. 14Kunyiy kutuwak cikwa cupisyonok ce mwonec 15Sorcini lakwar ye mokutumto korotik. 16Turpupoti kwaranta aret wule punte oŋnkupakakta toŋoŋutek. 17Puryo kot konkete aret nyepo kalyet, 18Oŋnkupuryo kot kuponto koyweyisyet nye yweye Yiyintet.’’ 19Kunyo cinket kule ŋalek tokol ce mite orit kuce nöme piko tokol ce poytoy ntarastinek, sukuŋet mpo yec kuker kutuwak cepo piko alak, sukumutyi Yiyintet musankut koret tokol. 20Omnye puryo ci mpo akenke nye muce cesat kunyol om taytap Yiyintet ye korip ntarastinek. Kito nye yiye ntarastinek kunye porcini cito kule kwiy miyotyet. 21Ntene kuciŋoŋ yawut aret nye sate piko kunyolom wule mite Yiyintet, nyoto kunye puryo kot konömekey oko ntarastinek. 22Sate Yiyintet piko kunyol kupunto koyenemwa om Yesu Kristo. Yiye Yiyintet kuyunyoto om wule mite piko tokol ce cöme Kristo omnye puryo pciyatet mpo kisic. 23Kikowurta piko tokol, kunyo mitowune cekto wule low om wule mite kosopotet nyepo Yiyintet. 24Nto ye cesöte cekto kunyol om kokotutyetap Yiyintet nye pöc om poypoyet kupunte wule mite Yesu Kristo nye kikokalyec acek. 25Kikon Yiyintet Yesu Kristo sukuŋet kwek met nyenyi aret nye cikolye piko miyotyonik. Kupunte koyenet nye ponto cekto om wule neto. Kikwiy Yiyintet kuyunyoto sukuŋet kupor yisyenyi nyepo manta. Kimuytoci neto nye kipuryo kot kumany miyotyonikap piko om pesyosyek co kitil. 26Kunyo poru yawut om pesyosyecu kule po manta neto oŋnkusöte kunyol cito om wule mite Yesu Kristo. 27Kunyo muce cesilekey ne? Puryo kiy! Omne? Omnye möce pa kule ciywey ntarastinek? Puryo! Ntene omnye ciyeni ce cömisye pate. 28Omnye cinket ciwoŋnkyi kule satoktos kunyol cito om wule mite Yiyintet om koyenet pate, ntene puryo kot omnye kikwiy ŋalek ce mwowu ntarastinek. 29Nto osoti akwek kule Yiyintet kunye Yiyintet nyepo Yutayek nkit pate? Puryo kot ku Yiyintet neto ne nyepo mpo Lamek? Neto kunye Yiyintet nyepo mpo Lamek. 30Omnye akenke Yiyintet Mosukusat neto Yutayek kunyol om wule mite neto kupunte koyenet nyimwa oŋnkusat kunyol mpo Lamek kupunto koyenet nyimwa. 31Poru pa ŋolyontoni kule ye kiciyen kuroke cetay ntarastinek? Puryo kot kuyunyo mpo kisic! Ntene misyini cerip ntarastinek.

will be added

X\