Romans 2

1Kunyo Corwenyu, mutyini nyi piko alak musankut? Puryo kot oponte ŋolyo nye wosoni nka kot nyi ku ŋo? Omnye ye kewosontyi nyi piko alak kulot musankut, ntene oŋnkiyiye nyi ŋalecato, kuporkey kule wosontyinikey nyi nkit. 2Cinket acek kule Yiyintet kunye po manta ye komutyi musankut piko ce yiye ŋalak ceyucoto. 3Ntene nyi corwemwani nyo mutyini musankut piko alak ce yiye ŋalecutecu oŋnkurok yec yiye nyi nkit. Soti kule mesecilile musankut nyepo Yiyintet? 4Nto tos nyile nyi tolosyenyi nyewo oko kwilatenyi oko muytocinotet nyenyi. Puryo nket nyi kule toponiyetap Yiyintet kunye ntowuŋ nyi serenynkey? 5Kunyo om mukuleyto nyeŋuŋ nye wuy nye miyat, kuye mite tosyini toŋoŋutek cekuk om pesyet nye moceŋany cipor nyerunotetap Yiyintet ye mute musankut nyepo ŋalek cepo manta. 6Omnye mosukupucici Yiyintet ci tokol kuyu wule yunto yisyenyi, nye kikwiy. 7Tosyinikey piko alake kwiye yisyet nye topon, oŋnkuceny woyinto oko koyweyisyet oko soponto nye mopoku, mosukukoci Yiyintet picoto soponto nye mopoku. 8Nto piko alak co soy oŋnkutay ŋalek cepo manta, oŋnkurup ŋalek ce miyotec, mosukuporci Yiyintet picoto nerekwekyi. 9Mosukutaŋany oŋnkunyor mwoninto piko tokol ce yiye ŋalek ce miyotec, nyosye Yutayek oko mpo Kirikik. 10Ntene mosukukoci Yiyintet woyinto oko koyweyisyet oko kalyet piko tokol co yiye ŋalek ce toponec, kunyosye Yutayek oko mpo Kirikik. 11Omnye sute Yiyintet kuyoyec piko tokol. 12Omnye piko tokol co puryo kot kupunto ntarastinek oŋnkwiy miyotyet, kuce potos kuyu piko ce puryo kot kupunto ntarastinek. Nto piko tokol, ce yiye miyotyet oŋnkurok kupunto ntarastienk kuce mosicemutyi musankut kuyu wule yunto ntarastinek. 13Puryo kot ku piko ce lime ntarastinek kuce toponec om taytap Yiyintet, ntene piko co yiye kuyu wule mwoytoy ntarastinek kuce mocecämnta kule tililec om wule mite Yiyintet. 14Ye karup Lamek kuywey ntarastinek, kuporkey kule ponto cekto ntarastinek nka kot kupuryo kot kuponto ntarastinek. 15Poru cekto om kopurto nyimwa kule silotin mukuleywekwa orit ŋalek ce nöme ntarastinek. Poru yec mpo kasoteywekwa kule po manta ŋalecutecu omnye wosontyini kasoteywekwa ce sote oŋnkuyet kukalya cekto, om 16pesyet nyo mute Yiyintet musankut nyepo yisyonutek cepo ŋalek ce wuŋotin cepo piko tokol. Kuyu wule yunto lokoywek ce toponec ce omwoytoy ani kupunte Yesu Kristo. 17Ntene nyi nyo kurekey kule Yutoyin, oŋnkikenekey ntarastinek, oŋnkisilekey Yiyintet. 18Nketi tukuk tokol ce möce Yiyintet kule yiy nyi, kunyo kinetkey om wule mite ntarastinek kule kwey kiy nye topon. 19Nketi nyi kupoyit manta kule yiku nyi kantoyintet nyepo piko co korotin, oŋnkiyiku lakweyet nyepo piko ce mite menonet. 20Yiku nyi konetintet nyepo piko ce perper oko lekoy ce minkec. Nketi nyi kupoyit manta kule om ntarastinek ku wule mite ŋomnonet. 21Nyi nyo neti piko alak, omne menetkey nyito nkit? Mwoytoy nyi kule, “Monte cecorsye!’’ Oŋnkurok yec corsyi nyi! 22Mwowu mpo kule, “Monte cesakwayan.’’ Oŋnkurok yec yiye nyi sakwayanatet? Senkeri nyi koromun kerkeyik ce kerkey Yiyintet, oŋnkurok yec core nyi tukuk ce mite korik orit. 23Silekey kule ponte ntarastinek, oŋnkurok yec yirye ntarastinek sutu kalilan om wule mite Yiyintet. 24Mwowu silutekap Yiyintet kule, “Yutayek kuce kwesokyi sukuŋet kuŋalale Lamek kwapi kaynetap Yiyintet.’’ 25Ponto wonset nyimwakwek latik ye korip ntarastinek. Ntene ye koyiri ntarastinek kuporkey wonset nyimwoŋ kuyunye puryo kot cewonak. 26Kunyo nteye korip lomin nyo mowonat ŋalek ce mwowu ntarastinek, kupuryo kot kusute Yiyintet cicoto kuyunye kicewon? 27Kunyo Lamek co mowonotin kuce mosukumutwok musankut akwek Yutayek ce oponte ntarastinek oŋnkoyiku wonotin oŋnkurok yec oyirye ntarastinek. 28Ntene ŋo nye Yutoyin nyepo manta nye kicewon kupoyit manta? Puryo kot ku Yutoyin kunye po wonset nyenyi porto nyepo saŋ pate 29Ntene Yutoyintet nyepo manta kunye Yutoyin nyepo porto orit, nye kicewon mukuleyto nyenyi orit, nye yiye yisyet nyepo Muyet Nyetilil, ntene puryo kot ku nyepo ŋalek pate. Nyoru cicoto kakastayet kucone wule mite Yiyintet, puryo ku kule kucone wule mite piko.

will be added

X\