Romans 15

1Roke ceponte acek swamet om koyenet sukuŋet cikalye piko co moponto swamet cetorci terekokwa. Puryo kot kuroke ciŋereckey acek kwacek nkit. 2Ntene misyini ci ake tokol om acek kuŋerec mpo yeyanyi sukuŋet kukalya om koyenet nyimwa. 3Omnye kipuryo kot kuŋereckey Kristo nkit, ntene kikwiy kuyu wulo mwoytoy silutekap Yiyintet kule, “Kitica ani cupisyet nyo ŋolole piko co cupiŋ nyi.’’ 4Omnye ŋolyo ake tokol nye kicesil keny om silutekap Yiyintet kunye kicesil sukuŋet kunetec acek, sukuŋet cikenisye, oŋnkyemuytoci oŋnkyetitir ye cesumoni silutekap Yiyintet. 5Kunyo kante kukonok akwek Yiyintet nyepo muytocinotet oko kotitirotet, sukuŋet onyoru akwek kwakwek nkit kasoteywek ce kerkey, ye korup wule yunto Yesu Kristo. 6Saŋet oyiku kutit akenke, akaste Yiyintet oŋnku kwanitap Mokoryontenyo Yesu Kristo. 7Kunyo oŋerekyinikey akwek kwakwek nkit kupo woyinto nyepo Yiyintet, kuyu wulo kicämak Kristo. 8Omnye komwowok ani kule kikwek Yesu Mutworintetap Yutayek sukuŋet kupor kule kiyitita Yiyintet kupoyit manta kurtoyutek ce kimwoci neto mpo kukonyo. 9Sukuŋet komuc Lamek kukasta Yiyintet om poypoyenyi kuyu wolo mwowu silutekap Yiyintet kule: “Kunyo mosakastiŋ ani nyi om wule mite Lamek. Mosotum akaste kayneŋuŋ’’ 10Kumwoy yec kule: “Aŋerec Lamek oko pikap Yiyintet ce kweyotin!’’ 11Kumwoy yec kule: “Akaste Mokoryontet akwek Lamek tokol. Akaste koromun akwek piko tokol!’’ 12Mwowu mpo Isaya yec kule: “Mosukuco keseniyantetap Yese; nye mosukuŋet kupayta Lamek; mosukukenekey cekto neto.’’ 13Kunyo akente kukonok akwek Yiyintet nyepo kokenotet ŋerekwek tokol, oko kalyet kupunte koyenemwoŋ nye oponte om wule mite neto, sukuŋet kutosyikey kuner koyenet nyimwoŋ om swametap Muyet Nyetilil. 14Mpo yeya, oŋnket ani kule oponte akwek toponiyet nyewo koromun, oŋnketi kule oponte ŋomnonet tokol; kunyo omuci anetkey akwek kwakwek nkit. 15Ntene om parwani kosilwok om nyikanatet ŋalek ce kasotwok. Kwoyiyisye kuyunyoto om kamukeywek ce kikono Yiyintet. 16Oyiku mutworintetap Yesu Kristo nye oyiyisyi om wule mite Lamek. Oyiyisyi kuyu tisintet ye omwoytoy lokoywek ce toponec ce kwone wule mite Yiyintet; sukuŋet kwek Lamek kokotutyet nye cömntoy Yiyintet, oŋnkusat Muyet Nyetilil. 17Kunyo om koyomotet nye oponte om Yesu Kristo, omuci osilkey om yisyet nyepo Yiyintet. 18Mosaŋalale om nyikanatet ŋalek pate ce kikwiy Kristo kupunte wule amite ani antoci Lamek kuywey Yiyintet om ŋalek oko yisyonutek. 19Om swamet nye kicipor om pelutok cepo kakitat oko om swametap Muyet Nyetilil. Kunyo om poninek kuceke Yerusalem okoy Iluriko. kyamwaytate okoy awany lokoywek ce toponec ce nöme Kristo. 20Ŋolyontet nye amöce ani kwak okokoy kunye amöce kule amwaytate lokoywek ce toponec om wule tompo kot kulim piko ŋalek cepo Kristo, nye puryo kot amöce kule otosyi yisyet nye kicece cito ake. 21Kuyu wulo Mwowu silutekap Yiyintet kule, “Mosukukäs piko ce kitompo kot cemwoci Lokoywekyi, Mosukonket piko ce tompo kot kulim mpo kisic.’’ 22Om ŋolyontoni, kucekerekta ani aret ce caŋ ye maco orutocok akwek. 23Ntene omnye kwawany yawut yisyonutekwani om komosta nyitenyi, oŋnkurok kyamac kuloyit kule aco wule omite akwek. 24Mosayiy kuyunyoto yawut amöce kule cekäsak akwek om poninekwani ye otile oweti Supaniya. Amöce kule akalya ani akwek opunte wuloto, om letut ye kocipur oko akwek om ŋerekwek pesyos ce ŋeri. 25Ntene yawut pakenke amite ani oweti Yerusalem om yisyetap Yiyintet nyepo piko cepo wuloto . 26Omnye kucäm nkit pikap Yiyintet cepo Meketoniya oko Akaya kule cikalye cikoci kokotutek pikap Yiyintet pononik ce mite Yerusalem. 27Kucäm cekto nkit, ntene ŋalek cepo manta kucu kule, ponto cek pesento kule misyini kukalye cekto pononik omnye pcicintos Yutayek oko Lamek kupeyok cepo soponto nyetilil, kunyo misyini kukalya cekto Yutayek om tukuk cepo porto. 28Ntene ye kawany ani yisyet nyitenyi ye kokoci cekto pesanik tokol ce kicirurukyi, mosonomen poninek coto. 29Oŋnketi kule ye kaco wule omite akwek mosoconte kupeyok tokol cepo Kristo. 30Osomok ani akwek mpo yeya om Mokoryontet Yesu Kristo oko om cömisyet nye konu muyet kule ciyomekey oko ani. Oŋnkosomwo Yiyintet koromun. 31Osomwo oripokisye topon om wule piko ce puryo kuyen cepo Yuteya, oŋnkucäm piko ce mite Yerusalem yisyet nyimwani. 32Kunyo mosaco wule mite akwek oponte ŋerekwek ce caŋ ye kacäm Yiyintet, oŋnkuŋerekyi tontonet nye topon om wule omite akwek. 33Kante Kopur Yiyintet nyepo kalyet oko akwek tokol. Yunyoto.

will be added

X\