Romans 14

1Atoroc opurcine oko cito nye moponto swamet om koyenet. Ntene mente cetintentyine oko neto om ŋalek cepo kasoteywekyi nkit. 2Ponto citake koyenet nye muce kwam kiy ake tokol, ntene kuponto citake yec koyenet nye puryo kot kupo swama, kwome nyoto nkuyek pate. 3Puryo kot kuroke kunyil nyo ome kiy ake tokol nyo puryo kot kwome, oŋnkupuryo kot kuroke kumut musankut cito nyo ome nkuyek pate kumutyi nyo ome kiy ake tokol. Omnye kicäm Yiyintet mpene cito nyoto. 4Nyi ku ŋo nye muci kot mutyi musankut mutworintetap cito ake. Ntene Mokoryontenyi nye mosukupor kule yonye nto mosukosuto cito, kunyo muce kuyo omnye mokoryontet kunye keyoŋnto neto. 5Sote cito ake kule pesyo nyewo koromun pesyet akenke kupël pesyosyek alak, kusote citake yec kule kerkey pesyosyek tokol. Roke kukwilakay ci tokol om kasoteywekyi. 6Ci tokol nye ripe topon pesyet akenke, kwiye nyo kuyunyoto om koyweyisyet nye yweye Mokoryontet. Ci tokol nye ome kiy ake tokol, kwiye nyoto kuyunyoto om koyweyisyet nye yweye Mokoryontet, omnye kostoy neto Yiyintet, ci tokol nye katay nye puryo kot kwome tukuk alak, kwiye nyoto kuyunyoto om koyweyisyet nye yweye Mokoryontet, omnye kostoy Yiyintet om omik. 7Omnye puryo ci mpo akenke om acek nye sope kwine nkit, oŋnkupuryo nye me kwine nkit. 8Ye ce soptosi acek, kupo Yiyintet nkit, nteye kocepoku kukocepeku kupo Mokoryontet. Kunyo ye cesoptosi nto ye kacepoku cepoye Mokoryontet. 9Omnye kime Kristo oŋnkotutune met sukuŋet kwek Mokoryontet nyepo piko ce soptos oko ce kipok. 10Kunyo omne semutyi nyi yeyaŋuŋ musanku, nyi nyo iyome nkuyek pate? Omne senyil nyi yeyaŋuŋ nyi nyo iyome kiy ake tokol? Mosiciyoŋe acek tokol taytap Yiyintet sukuŋet kumutwec musankut. 11Omnye mwowu silutekap Yiyintet kule, “Mwowu Mokoryontet kule, Ayiku Yiyintet nye Sopot, Mosukukutuŋe ci tokol taymwani, Mosukuŋalal ci tokol kumwoy kule, Oyiku ani Yiyintet.’’ 12Kunyo mosukoyit ci ake tokol om acek tukuk ceci koyityi Yiyintet. 13Kunyo akente kyaste mocemutyinikey musankunek. Ntene möce asot kule mente teyiy kiy nye muce kot kunoc yeyaŋuŋ nto kuwec kusuci miyotyet. 14Koyomotet nye oponte ani oko Mokoryontet Kristo kunye kikono oŋnket kupoyit manta kule toponec omik tokol. Ntene ye cöme cito ake kule puryo kot kutoponec omik tokol, kuporkey kule puryo kot kutoponec omik coto om wule mite cicoto. 15Ye komwontyi yeyaŋuŋ om kito nye iyome nyi kuporkey kule puryo kot yiyisye nyi cömisyet. Kunyo mente ayaste kot kowurta omik ce iyome nyi cito nye kimeci Kristo! 16Mente ayaste kot kunyor kaynet nye miyat tukuk ce kure nyi kule toponec 17Omnye poytoyisyetap Yiyintet kunye puryo kot kunömekey oko tukuk ce kyome nto ce ceye, ntene nömekey pate oko tililinto oko kalyet oko ŋerekwek ce konu Muyet Nyetilil. 18Kunyo ci tokol nye yicini Kristo yisyet om aret nyeyu nyitenyi kunye nyoru cömisyetap Yiyintet oŋnkucämnta ci tokol neto. 19Kunyo möce cetyikyini acek okokoy tukuk ce sutu kalyet, oŋnkyikalyekey acek kwacek nkit. 20Monte ciwurte kwaran yisyet nyepo Yiyintet kukesac omit pate. Möce kyam omik wok tokol, ntene miyat ye kakyam kiy nye muce kowurta citake kot kosuci miyotyo. 21Kunyo pëlisyi ye kacetay mokyam peny, nto ceye komek nto kyiy mpo kiy ake tokol nye sutyini kosuto yeyaŋuŋ. 22Rip koyenet nye ponte kwek nye nketi nyi nkit oko Yiyintet. Ponto kupeyoy cito nye puryo kot kumutyinikey musanku ye mite kwiye ŋalek ce nkete nkit kule po manta! 23Nteye mune neto omik ce ome, kumutyini Yiyintet neto musankut ye kam omnye puryo kot kunömekey oko koyenet nyenyi. Nto kiy ake tokol nye puryo kot kunömekey oko koyenet kunye miyotyo nyoto.

will be added

X\