1 Misyini kuywey ci tokol poytoyik cepo koret. Omnye kwone kamukeywek tokol wule mite Yiyintet. Kunyo konu Yiyintet poytoyik co yiyisyi yawut. 2 Ci tokol nye katay poytoyik ce yiyisyi yawut, kukatay cito nyoto piko co kikwey Yiyintet, nto cito nye kayiy kuyunto kukomutyikey neto nyoto musankut nkit. 3 Omnye puryo kot kumuye piko ce toponec poytoyik cepo koret, ntene muytos piko co miyotec. Ye memöce nyi kule amuye poytoyik kumöce kule yiy ce toponec, mosukukastiŋ nyi cekto. 4 Omnye mutworintetap Yiyintet neto nye yiyisyi kupo toponiyet nyeŋuŋ. Ye keyiy ŋalek ce miyotec, kuroke muyi om wule mite neto, omnye po manta kamukeywek kupiriŋ nyi. Neto kunye mutworintetap Yiyintet, kunyo yiyisye nerekwekap Yiyintet om wule mite piko co miyotec. 5 Möce aywey poytoyik co ponto kamukeywek, nye puryo ku kule omnye nerec Yiyintet, ntene omnye nketi nyi nkit om ŋomnoneŋuŋ. 6 Kuyunyoto omne sokweye akwek mosoret, omnye yiye poytoyik yisyetap Yiyintet ye yiye yisyemwa. 7 Kunyo okwecini tukuk ce yoce cekto. Okwey mosoret, okweye mosoret nyepo mosonok oŋnkaywey piko tokol cewoyec. 8 Monte cipurte pesen nyepo citake ntene acämnkey akwek nkit, ci ake tokol nye kacäm latyenyi kunye iyititoy cicoto ntarastinek. 9 Omnye ntarastinecu kule, “Mesekwayan, meporisye, mecorsye, mecoroku.’’ Kuce yomntos kwek ntarastit akenke nye mwowu kule, “Misyini kucäm cito latyenyi kuyu wulo cömntoykey nyi nkit.’’ 10 Ye kucäm cito latyenyi kupuryo kot komuce yici miyotyo. Kunyo ye kokecömis kuye kaciyitita ntarastinek tokol. 11 Misyini ayiy kuyunyoto omnye oŋnket akwek sawet kule kopunto pesyosyek, oŋetye rwonto omnye kolekitit yawut ye mocisopec kusir wule kicisotitoy acek kunyo. 12 Kapok menonet, kayec koret kwek pet, okany kyaste mokyiyisyi yisyet nyepo menonet, okany cenäm Karik cepo poryet nye ceporye wule mite lakweyet. 13 Okany cepesetate kuyu piko cepo lakweyet nyepo pet kwen, nye puryo kot ceŋerece tumwonik ce miyotec oko pokitet, nto sakwayanatet, oko syepisyet, oko wokutyet oko corokyinotet. 14 Ntene alac Mokoryontet Yesu Kristo, kwek loŋet, ayaste monte cisot tukuk ce corokyini porwonikwok.
