Romans 12

1Kunyo osomok ani akwek mpo yeya, om poypoyetap Yiyintet nyewo nye kikonec kule okoyte porwonikwok kwek korosek ce tililec om wule mite Yiyintet. Oyiyisye yisyonutekyi ce ŋerece neto. Nyoto kunye sayet nyepo manta nye roke osoye akwek. 2Monte cecäm soponto nyepo koret; nyepo pintap pesyosyecu. Ntene ayaste kuwec Yiyintet kasoteywekwok cepo orit sukuŋet oŋnket cömisyetap Yiyintet nye topon oŋnkoŋerec neto kupoyit manta. 3Oŋololwok ani akwek tokol om kupeyok ce kikono Yiyintet. Ntene asoti kule puryo kot kuroke kusutkey ci ake tokol om akwek kusirte ye misyini. Möce kusot ci tokol kwine nkit wule tento koyenet nye kikoci Yiyintet. 4Ceponte kereryanik wok ce caŋ om porto akenke, ntene oŋnkuponto kereryantet ake tokol yisyet nye yiye. 5Kuyunyoto om wule ce mite acek nka kot ciku caŋ, ntene ciku akenke om koyomotet oko Kristo, Omnye kiciyomec tokol ciku akenke kuyu wulo yunto porto. 6Kunyo roke ciyisye kokotutekyacek ce pciyotin kuyu wule yunto kupeyok ce kikonec Yiyintet. Ye kicekonec acek kokotutyet nye cemwoytoy lokoywek, kumisyini ciyisye kuyu wolo yunto koyenet nye ceponte. 7Nteye kule kyiy yisyonutek, kumisyini kyiyisye. Nteye kule cinetisyi, kumisyini cinetisye. 8Nteye kule cititiri piko alak, kumisyini kyiy kuyunyoto. Nto ci ake tokol nye pcicini piko alak tukuk, kumöce kule kupciyta nyoto ce yeme. Nto cito nye ponto kamukeywek; kumöce nyoto kwiyisye swama; nto cito nyo kolyoyisyi kumisyini kwiyis nyoto om ŋerekwek. 9Misyini kupoyit cömisyet manta. Asenker miyotyet, oŋnkorip pate kiy tokol nye topon. 10Ocämnkey akwek kwakwek nkit kuyu mpo yeya ce tupco, oŋnkuywey ci ake tokol citake. 11Oyiyisye swama, monte cepuren. Oyici Mokoryontet yisyet om mukuleyto akenke. 12Kukonok koyenet nyimwoŋ ŋerekwek, omuytoci om ŋerekwek, oŋnkosome okokoy. 13Opcici tukuk piko cepo Yiyintet co moponto kiy, oŋerekyi atoroc om korikwok toyek ce mukulec konyek. 14Osomnci kupeyok piko co toŋonyok, osomnci kupesyok ntene monte cecup. 15Oŋerece oko piko co mite kuŋerec, omesye oko co mite kumesyi. 16Opurte kasoteywek cepo moyet akenke akwek kwakwek nkit, monte cesilekey, ntene ocäm yisyonutek co cenyile, monte cesutkey kule ciku ŋomec. 17Ye kokwiwuŋ citake miyotyo monte ceyokune miyotyet ake. Oyiye tukuk ce toponec ce cöme piko tokol. 18Oyiy akwek nkit kiy ake tokol nye mukoktos sukuŋet opurte kalyet oko piko tokol. 19Coronutekwani, monte ceyokukey, ntene ayaste kwiy co pate nyerunotet nyepo Yiyintet, omnye mwowu silutekap Yiyintet kule, “Mosoyoku ani, ani nye Mosoketu.’’ 20Ntene ayiy kuyu wolo mwowu silutekap Yiyintet kule, “Ye ponto puniyontet nyeŋuŋ rupet, ipay, ye ponto melelya, ikoci peko. Omnye ye keyiy kuyunyoto, kukerurukyi metit nyenyi oŋonyntit nyepo nesek’’ 21Monte kupëlok miyotyet, ntene oyiyisye toponiyet sukuŋet opël miyotyet.

will be added

X\