Romans 11

1Kunyo katep ani kule, kitay so Yiyintet pikyi? Puryo kot kuyunyo! Oyiku mpo ani Israel, oyiku keseniyantetap Apram, opoye aretap Penyamin. 2Puryo kot kutay Yiyintet pikyi ce kikwey ikye keny. Oŋnket akwek ŋalek ce mwowu silutekap Yiyintet ye kiwosontyini Eriya pikap Israel om wule mite Yiyintet kule. 3“Mokoryontet, kipakäc cekto workoyik, oŋnkoturpup oteputek ce pele korosek, ani nkit pate akenke nye kwoŋetu, kunyi syeme kule cepakäca.’’ 4Ntene kuwekyi Yiyintet kumwoci neto ŋolyo ne? Kumwoci kule. “Kwakwey ani pikyu elifunek tisap ce puryo kot kusoye yiyintet nyepo mwiynan Paal.’’ 5Kunyo yunyoto mpo yawut pesyosyecu, mite piko ce ŋeri ce kikwey Yiyintet om poypoyenyi. 6Cone kweyisyet nyenyi poypoyet pate, ntene puryo kot ku tukuk ce kikwiy cekto. Omnye nto kikwiy Yiyintet kupo tukuk ce kikwiy piko; nto puryo kot kupo poypoyet nyenyi manta. 7Kunyo ce mwowu ne? Puryo kot kunyor piko cepo Israel kito nye kicenye. Luket nyepo piko ce ŋeri ce kikwey Yiyintet ce kinyor. Kimiŋitu cut alake nye molime kursyetap Yiyintet. 8Kuyu wulo mwowu silutekap Yiyintet kule: “Kikoci Yiyintet kuperperitu mukuleywek cikwa, puryo kukäste konyek cikwa, nto mpo kulimnta yitik cikwa okoy pesyoni.’’ 9Kimwoy Tauti kule: “Roke kwek sokwonutek musatit nye tekat mwenet nye kitany cekto nyo sucini! 10Roke kukoryo konyek cikwa sukuŋet mente kot kukästa: mente kot kumuny cekto co kesene terekok ce nyikisec.’’ 11Kunyo katep kule, kicinoc Yutayek sukuŋet kosuto cekto? Puryo kot kuyunyo! Kiwurta kwiy miyotyet, kunyo kacontyi kosopet Lamek sukuŋent kucorok Yutayek. 12Kunyo ye miyotyonik cepo Yutayek kuce kisut mokoryontit om koret tokol, oŋnku miyotyet nyimwa nye kisuto kunye kisutyi kupeyok wule mite lamek. Kunyo kupeyok ce tya nyun ce cetosyini kucaŋit ye keyen Yutayek tokol. 13Oŋololwok ani yawut akwek Lamek, oyiku kiyokintet nyepo Lamek, mososilkey om yisyenyu, 14sukuŋet asutyi kucorok mpo yeyamwani Yutayek, oŋnkamuc kot osop alak om cekto. 15Omnye ye kicetoye cekto, yoto kuye kikwiye koret corwantit oko Yiyintet, kunyo mosukwiy kulene ye kacecäm cekto? Yiku yoto kotutunet nye numu met. 16Ye tilil mukatya kereryantet nye kisic nye kocikoci Yiyintet kwek korosek cepo tayta, kutilil mpo mukatyantet tokol kumukul. Nteye tilil tikityantet nyepo ketit nye kocikoci Yiyintet, kutililec mpo sarisyek tokol. 17Kiceyepta sarisyek alak cepo ketitap seitunit nyo cipote oŋnkyiyomo kupite sarisyek cepo ketit seitunit nyepo samiyita, Akerkeyekey akwek oko ketit seitunit nyepo samiyita, kunyo omite yawut oyemntoy swamet nyepo soponto nye topon nyepo Yutayek. 18Kunyo puryo kot kumisyini onyil piko co kuceyepta kuyu sarisyek. Omuci akwek osilkey kulene? Oyiku sarisyek pate, puryo kot otinye tikityek, tikityek kuce tiyok akwek. 19Ntene mesemwowu kule, “Kiceyep sarisyek sukuŋet kutok poroyinto nyimwani.’’ 20Manta, kiceyepta cekto omnye kipuryo kot kuyen, yoto pure nyi otepto omnye kiyen, ntene mente apurte kasoteywek cepo silotet kupo ŋaleca, ripkey. 21Omnye kipuryo kot kwasta Yiyintet Yutayek ce kerkey sarisyek cepo ketit. Soti nyi kule muce kwastiŋ. 22Ceköse om ŋaleca kule ponto Yiyintet poypoyet nyewo oŋnkunyeker koromun om wule mite piko co kikosuyto, ntene tala om wule mite nyi ye ketosyikey om poypoyenyi, nteye puryo, mosiceyeptiŋ mpe nyito. 23Nteye katay Yutayek kwasta toyisyet nyimwa, mosiceketyi cekto ye kimite. Omnye muce Yiyintet kuketyi cekto ye kimite. 24Okerkeye akwek Lamek oko saryantet yepo ketit seitunit nyepo samiyita nye kaceyep oŋnkyiyomo kupite ketit seitunit nye cipote oŋnkurok kupuryo kot kucomntös. Kerkey Yutayek oko ketit seitunit nye cipote, kunyo mosukulekitit koromun ye mokuketyi Yiyintet sarisyek kupite ketimwa nyepo keny. 25Mpo yeya, mite ŋalek cewuŋotin cepo manta ce amöce ani kule oŋnket akwek. Omnye mosukuripok nye mosutekey kule ciku ŋomec. Coto kucu kule, puryo kot kopure toyisyet nyepo Israel okokoy, ntene pure pate okoy ye kakwa lamek tokol wule mite Yiyintet. 26“Kuyunyoto wule mecisopto pikap Israel tokol, kuyu wulo mwoytoy silutekap Yiyintet kule: Mosukucone kosopintet Siyon, Mosukunum miyotyonik tokol cepo kesenisyekap Yakopo. 27Mosayiy ani kirotyani oko cekto, ye onumu miyotyonikwa.’’ 28Omnye kitay cekto lokoywek ce toponec, kunyo kikwek Yutayek pikap Yiyintet kupo toponiyemwakwek Lamek. Ntene omnye kikwey Yiyintet cekto, kunyo coronutekyi kupo toponiyetap mpo kukomwa. 29Omnye puryo kot kuwec Yiyintet kasoteywekyi om kule ŋo nye kweye neto oŋnkukoci kupeyok. 30Ntene akwek Lamek, kyotoye Yiyintet om yun kipo tay, ntene kukalyak yawut Yiyintet omnye kitoyis Yutayek. 31Om aret nyeyu nyitenyi nye kicerirenak akwek, kunyo toye Yutayek, yawut Yiyintet sukuŋet kukalya neto mpecekto. 32Omnye kiwec Yiyintet piko tokol kwek mopusinek cepo toyisyet kule sukuŋet kuporci kukalya cekto tokol. 33Wo koromun mokoryontit nyepo Yiyintet! Wo mpo ŋomnonet nyenyi oko muswokyontit, ŋo nye muce kumwoci neto kito nye mokwiy? Ŋo nye muce kunket arosyekyi? 34Kuyu wule mwowu silutekap Yiyintet kule: “Ŋo nye nkete kasoteywekap Mokoryontet, Ŋo nye muce kukoci neto ŋomnonet? 35Ŋo nye kukoci neto kenyis kiy? Sukuŋet kuket kiyoto.’’ 36Omnye kitany neto tukuk tokol, kunyo mitowune tukuk tokol kamukeywekyi. Kopurune woyinto wule mite Yiyintet okokoy. Yunyoto.

will be added

X\