Romans 10

1Mpo yeya, amöce ani om mukuleymwani kule nto cisop pikwani, osomncini cekto Yiyintet. 2Oŋnkonketi kule yweye cekto Yiyintet koromun, ntene puryo kot kucone koyweyisyet nyimwa ŋomnonet nyepo manta. 3Omnye tompo kot konket aret wule wektoy Yiyintet kunyol piko om wule mite neto, ntene kusyem cekto aret nyimwa nkit, kunyo puryo kurup cekto aret nyepo Yiyintet nyo säte piko kunyol. 4Omnye Kristo kunye woŋntoy ntarastinek sukuŋet kusatakay kunyol om wule mite Yiyintet ci tokol nye kikoyen. 5Ŋalek ce kisil Moses ce nöme wule cesotitokey cenyol piko om wule mite Yiyintet ye kacerup ntarastinek kucu kule, “Mosukusop cito nye yiye ŋalek ce mwowu ntarastinek.’’ 6Mwowu silutekap Yiyintet ce nöme wule cesotitoykey cenyol om wule mite Yiyintet kupunte koyenet kule, “Mente atep kwinyi nkit mwowu kule, ŋo nye mosukuwo torot.’’ Yoto kuye kacesut Kristo kuco ŋony. 7Mente mpo atep mwowu kule, “Ŋo nye mosukuwo koret ŋony?’’ (Yoto kuye kocesut Kristo kotutune met.) 8Ŋalek ce mwowu kucu kule, “Korikyok akwek lokoywekap Yiyintet om kutuwakwok oko mukuleywekwok orit.’’ Lokoywek coto kuce cemwoytoy acek cepo koyenet. 9Omnye ye keŋalal nyi nkit om kutiŋun mwowu kule, Yesu kunye Mokoryontet oŋnkiyen om mukuleyŋuŋ orit kule kiŋet Yiyintet Yesu kotutune met kuye mocisopiŋ. 10Omnye om koyenet nyinyacek kuye cesotokisye cenyolu om wule mite Yiyintet. Ye kaceŋalale acek kutuwakyo yoto kuye cisopec. 11Mwowu silutekap Yiyintet kule: “Puryo kot kolilone ci tokol nye kokuyen neto.’’ 12Omnye puryo kot kumite pciyatet om kwenutap Yutoyin oko Lomin. Mokoryontet akenke kunye Mokoryontet nyepo piko tokol oŋnkukocini kupeyok cepo Mokoryontit piko tokol. 13Kuyu wulo mwowu silutekap Yiyintet kule, “Mosicisop ci tokol nye kure kaynetap Mokoryontet.’’ 14Ntene muce kulene kukur kaynet nyenyi, ye puryo kot kucömis? Komuce cekto kulene kot kuyen ye tompo kot kulim lokoywek? Komuce cekto kulene kulim lokoywek ye puryo cito nye komwoci. 15Muce piko kulene kumwaytat lokoywek ye puryo kiyokik ce kiciyokto? Kuyu wolo mwoytoy silutekap Yiyintet kule; “Toponec koromun kerenkokap cito nyo sutu Lokoywek ce toponec!’’ 16Ntene puryo kot kuyen piko tokol lokoywek ce toponec. Kimwoy Isaya nkit kule, “Mokoryontet, ŋo nye kicäm Lokoywekyacek?’’ 17Kunyo coni koyenet ye kacelimnte lokoywek, oŋnkukwoni lokoywek ye kacemwayta lokoywek cepo Kristo. 18Nteye katep kule, manta kule puryo kot kulim piko lokoywek? Ntene kilim cekto kuyu wulo mwowu silutekap Yiyintet kule: “Kiwo polotet nyepo ŋalek cikwa kupunte koret tokol, kipunto ŋalek cikwa wule kiŋet koret.’’ 19Atep yec kule, kipuryo kot konket pikap Israel? Moses kunye po tayta nye kimwoy kule: “Mosokonok ani acorokyi piko ce puryo kot ku yemet nyepo manta, mosokonok onyerci yemet nye perper nye puryo kot kuponto ŋomnon.’’ 20Kunyo kinyikan Isaya yo kimwowu kule, “Kinyorwo ani piko ce kipuryo kot kuceŋoto, Kyoporkyikey piko ce kipuryo kot kutepo ani.’’ 21Ntene kuŋalal ce nöme Israel kumwoy kule: “Kyoyite ani yewuniyek kwani kuwany pesyet tokol, atoroc pic ce kitoyis, ce molimwo.’’

will be added

X\