Romans 1

1Cone parwani wule amite ani Paulo mutworintetap Yesu Kristo, nye Kiyokontet nye kikwey oŋnkukur Yiyintet sukuŋet kumwaytat lokoywekyi ce toponec. 2Lokoywek ce toponec coto kuce kikurto Yiyintet keny kupunune wule mite workoyikyi oŋnkyesil om silutekap Yiyintet ce tililec. 3Ŋalecato kuce nöme Werinyi Yesu Kristo nye kiceyi kuyu cito kucone keseniyantetap Tauti. 4Ntene kicipor om swamet nyepo Muyet Nyetilil kule neto kunye Weritap Yiyintet; omnye kitutune met. Nyoto ku Yesu Kristo Mokoryontenyo. 5Kikono ani Yiyintet kupunte wule mite Yesu om kupeyok ce kicekono oyiku kiyokintet kupo Kristo saŋet antoci piko cepo yemosyek tokol kuyen oŋnkuyweyis. 6Picoto ku mpo akwek piko co mite Rom co kicekurok opoyitu Kristo. 7Kunyo akwek piko tokol ce mite Rom, ce cöme Yiyintet oŋnkukur cekto kwek pikyi ce tililec, akante kukonok Yiyintet Papanyo oko Mokoryontet Yesu Kristo poypoyet oko kalyet. 8Anyosyi ani akaste Yiyintenyu kupunte wule mite Yesu Kristo om wule omite akwek tokol, omnye mite kulime piko cepo koret tokol koyenet nye oponte akwek om wule mite neto. 9Nkete Yiyintet kule osomwok ani okokoy ye omwoytoti lokoywekyi ce toponec cepo Werinyi. 10Osome Yiyintet om cömisyenyi kule roke komukakay yawut saŋet orutocok ani. 11Omnye amöce koromun kule akäsak akwek sukuŋet akwilak onyoru swamet. 12Ntene kupëlis mosicikalyekey acek tokol yoto, kukalyak akwek koyenet nyimwani aŋnkukalya ani koyenet nyimwakwek. 13Mpo yeya, amöce ani kule oŋnket kule kwasyem aret ce caŋ kule aco wule omite, ntene kukerekta kito ake ye mayiy kuyunyoto. Amöce kule cakäs yisyonutek ce tililec om wule omite akwek kuyu wulo yunto om wule mite lamek. 14Omnye oponte ani oyici yisyet Kirikik oko mpo piko ce lamek, piko ce ŋomec oko ce perper. 15Kunyo amöce koromun kule omwowok akwek piko co mite Rom lokoywek ce toponec. 16Omnye akenekey ani owoŋnkyi lokoywek ce toponec, swametap Yiyintet kunye sope piko tokol ce kikoyen, nyosye kunyo Yutayek oko lamek. 17Omnye poru lokoywek ce toponec wule muce kusatitakey kunyol piko om wule mite Yiyintet. Punte coto koyenet pate kuceke tayta okoy letut. Kuyu wule mwowu silutekap Yiyintet kule, “Mosukusop cito nyetilil om koyenet nye ponto.’’ 18Ciporu nyerunotet nyepo Yiyintet kucone torot kucontyini piko ce miyotec oko ce ponto mwiynanet, picoto kuce kerektoy ŋalek cepo manta. 19Toku topon wule yunto Yiyintet, omnye Yiyintet nkit nye poru tukucoto. 20Kuceke ye kitany Yiyintet koret, kicipor kutok topon tukukyi ce motoku, coto ku swamet nyenyi oko kamukeywekyi, kunyo porukey neto om tukuk ce kicitany, puryo kot komuce cekto kot kutuckey mpo kisic. 21Kikonket cekto Yiyintet, ntene kipuryo kot kuyweye cekto neto kuyu wule cemokyini nto mpo kokasta. Ntene kimo kuponto kasoteywek cikwa ŋomnon mpo kisic, pesetote menonet pate. 22Sutekey cekto kule ciku ŋomec ntene solontoy pate. 23Ye kotosoye Yiyintet nye mopoku, kuweckey yec kusay tukuk ce poku kuyu ci nye poku, nto kukerkeyitu toritek nto tyoŋik nto erenoy. 24Kunyo kikwasta Yiyintet kwiy cekto tukuk ce somis ce corokyini mukuleywek cikwa, yiye cek kwicek nkit ŋalek cepo kalilan. 25Wece ŋalekap Yiyintet cepo manta kwek mwiynanet oŋnkusay tyoŋin ce kicitonye ye kotosoye Yiyintet nye cikostoy okokoy okoy okokoy. Yunyoto. 26Omnye yiye piko tukuk ce yucu! Kwasta Yiyintet cekto wokwiy ŋalek cepo kalilan. Kutay koruk moyiyisye topon porwonik cikwa om aret nye topon, ntene kwicininkey cek kwicek nkit sakwayanat. 27Kunyo mpo moronik kwasta co ye mokopurcin oko korukwa oŋnkwicin cek kwicek nkit sakwayanatet, mokunyor cekto toŋoŋutek ce yeme om ŋalek ce miyotec ceyucoto. 28Omnye toye piko morip ŋomnonet nyepo manta nye nöme Yiyintet. Kunyo kucämnta kule kurup konetik ce kipok kasoteywek Kunyo yiye ŋalek ce meroke kot kwiy. 29Ponto miyotyet wok tokol, kuyu ŋokis, moroŋyantit. Ponto cekto corokyinotet, porisyet, koperperisyet, oko kowotyontit, oŋnkuŋorsyi cekto, 30oŋnkuŋololekey kwapi, senkere cekto Yiyintet. Sokoran ce silekey, tosyinikey pate kusote wule mokwiyta ŋalek ce miyotec. Puryo kot kulimncini cekto piko cepo kamwa, puryo kot kuponto ŋomnon. Puryo kot kuripe kirotyet nyimwa, oŋnkupuryo kot kuporcini piko alak tolosyet nto mpo kurire kukalya. 31Nkete cekto kule mwowu ntarastit nyepo Yiyintet kule, roke kupok piko ce pure kopurto nye yunyoto. Puryo kot kutosyinikey cekto kwiye ŋalecutecu pate, ntene cömntoy cekto kukasta piko alak ce yiye ŋalecato.

will be added

X\