Revelation 9

1Yoto kukut malayket nyepo mut kontit nyenyi. Akäs ani kosuwune kokelyet torot kosuci koret. Cikoci kokelyanato funkuwet nyepo mwenet nye moponto ye ŋete. 2Kuyat malayket mwenet nye moponte ye ŋete, kucone orit yetit nyewo nyepo oŋonyntit nyewo, kuker yetit nye cone mwenet orit kutuyit koret oko asista. 3Yoto kuco koret talamwet kupunune yetit. Cikoci cekto swamet nye kerkey oko swamet nyepo keneyisyek cepo koret. 4Cemwoci kule, “Monte ciwurte suswek oko ketik, nto kiy ake tokol nye pite. Möce cekto kowurta pate piko ce moponto muwurut nyepo pelutyetap Yiyintet om tokoywekwa.’’ 5Kipuryo kot cecömnci talamwet kupakäc piko, ntene kutaŋany pate kuwany orok mut. Kinyor cito nye kowut mwoninto nye kerkey yo kowut cito keneyontet. 6Om orocoto mut, musukusyem picoto kule ceceny met, ntene monyoru. Musukumac kule cepoku ntene musukumweye met wule mite cekto. 7Kukerkeyitu talamik oko Farasinek ce kaciyiyta kule kupa poryet, kiponto om metewok cikwa ce kerkey kutonok cepo Sapunek, kukerkey metewok cikwa oko cepo piko. 8Kukerkey putek cikwa oko putek cepo koruk, oŋnkukerkey kelak cikwa cepo ŋetumwek. 9Kiponto teketik cikwa karik ce kicekerekte, nto karumnta nyepo kepepok cikwa kuce kikerkey oko karumnta nyepo Farasinek ce caŋ ce cute karinek ce rwoye kupa poryet. 10Kuponto sarurak ce wutisye ce kerkey keneyisyek, kuponto sarurak cikwa mwonet nye toŋonye piko kuwany orok mut. 11Kiponto kinko nye poytoy cekto, nyoto ku malayket nyo ripe mwenet nye moponto wule ŋete. Cekure kaynenyi om ŋelyeptap Puraniyek ku “Apatoni’’ Nye cekure yec om ŋelyeptap Kirikik kule, “Apolyon’’ (nye poru kaynana kule “Orontoyintet’’) 12Kutil yawut toŋoŋutek cepo tayta, koŋet toŋoŋutek oyenku ce mokukwa. 13Yoto kukut malayket nyepo lö kontit nyenyi, Alim kutit nye cone toponutek amwan ce mite otepto nye cepele korosek nyepo Saput nye yoŋe taytap Yiyintet. 14Kuŋalal kutit kumwoci malayket nyepo lö kule, “Tyakte malaykanik amwan co kicerotyi oyinet nyewo Efurate!’’ 15Cityakta yoto malaykanik amwan ce kikiceyiyta kule sukuŋet kupakäc piko cepo kereryantet akenke om somok cepo koret om sawanato om pesyonitenyi, om arawanitenyi oko kenyinitenyi. 16Cemwowo ani wule tento coŋinto cepo sikarek, ce milioninek pokolwokik oyeny. 17Yoto ceŋoŋwo ciporwo Farasinek oko piko ce kipete parak. Kiponto picoto loŋanikap teket cepo karik ce orornec kuyu mata, oŋnkworusec kuyu Sapiret oŋnkutolelyonec kuyu Salpur. Kikerkey metewokap Farasinek oko metewok cepo ŋetumwek. Kunyo kikwone metewok cikwa mata oko yetit oko nyolilyet. 18Toŋoŋutek cutecu somok, mata, oko yetit oko Salpur ce kikwone kutuwakap Farasinek kuce kipakäc kereryantet akenke om somok nyepo piko cepo koret. 19Omnye kimitowune swametap Farasinek kutuwak cikwa oko sarurak cikwa. Kikerkey sarurak cikwa erenok ce ponto metewok, kunyo kikwiyisye metewok coto kutaŋanye piko. 20Piko tokol cepo koret ce kiŋet ce kipuryo kot kupakäc toŋoŋutek coto somoku, kuce kipuryo kot kurenynkey kwasta cekikwiye cekto, kipuryo kot kwasta komo kusoye oyik, oko kerkeyik cepo Sapunek, oko cepo karik ce lelac, cepo toyok, oko cepo rwontok oko cepo ketik, ce puryo kot kuköstoy nto kulimntoy, nto mpo kupesetoti. 21Kipuryo mpo kot kurenynkey picoto om porisyet nye kikwiy, nto ponisyet, nto sakwayanatet, nto corsyet.

will be added

X\