Revelation 8

1Nteyu kowo kupetec Lekwap Kecir muwurut nyepo tisap. Kusis kiy ake tokol yoto om torot kuwany kwenutap sawet akenke. 2Nto om letut akäs ani malaykanik tisap co yoŋe taytap Yiyintet. Cikoci cekto yoto kontinek tisap. 3Kuco yoto malayket ake cokuyoŋe yepo otepto nye cepele Korosek, kipontonu pokulit nyepo Saput nyepo Korosek ce poŋu. Cikoci neto korosek ce poŋu ce caŋ sukuŋet kuyomo oko somset cepo pikap Yiyintet oŋnkukoyito om otepto nye cepele Korosek nyepo saput nyo yoŋe taytap Yiyintet. 4Kuŋet yoto yetit nyepo korosek ce poŋu oko somset nyepo pikap Yiyintet om yewutap malayket okoy kupunto wule mite Yiyintet. 5Kunäm malayket pokulit nyepo Korosek ce poŋu oŋnkunyit orit mata, oŋnkunumune otepto nye pele Korosek kosuci koret, Yoto Kowec koret, oko karumnta nyewo, oŋnkutul ilet, oŋnkuriŋriŋ koret. 6Yoto kuyiytakey malaykanik tisapu kule cekut kontinek tisap co koponto. 7Kukut malayket nyepo tayta kontit nyenyi, kutumnkey koyantet oko mata nye kilinyokey oko korotik, oŋnkyewirci kosuci koret. Cepel Yoto kulay kereryantet akenke om somok nyepo koret oko kereryantet akenke om somok nyepo ketik, oko suswek tokol ce nyolilec. 8Yoto kukut malayket nyepo oyeny kontit nyenyi, cewirta wokutyic ruretyet kitake nye kerkey tulwet nyewo nye kiloye, 9kuwec kereryantet akenke om somok nyepo ruretyet kwek koroti oŋnkupok kereryantet akenke om somok nyepo tyoŋik tokol ce mite ruretyet oko raposyek nye mite ruretyet. 10Yoto kukut malayket nyepo somok kontit nyenyi, kusuwune torot kokelyet nyewo nye loye kuyu tocit, kusuci kereryantet akenke om somok nyepo oyinosyek oko koŋwekap peko. 11Cekure kaynetap kokelyanato, “Mwa sekeleyti.’’ Yoto kumwonekitu peko cepo kereryantet akenke om somok okoy kupakäc piko ce caŋ ce kaye peko ce komwonekitu. 12Kukut malayket nyepo amwan kontit nyenyi, cipuryet kereryantet akenke om somok nyepo Asista, oko kereryantet akenke om somok nyepo arawet oko kereryantet akenke om somok cepo kokelik, yoto kupot komo kwiyisyi kereryantet akenke om somok nyepo kiy ake tokol. Kutuyit yoto kwek menon kuwany kereryantet akenke om somok nyepo pet oko kereryantet akenke om somok nyepo komoy. 13Akäste ani yoto, oŋnkalim ploŋoniyet nye terertoy om parak sukupole om kutit nyewo kumwowu kule, “Mite kwapi! Mite kwapi! Mite kwapi piko ce mite koret, ye kakut malaykanik co somoku co karik kukut kontinek!’’

will be added

X\