Revelation 7

1Nto om letutap coto, yoto akäs ani malaykanik amwan ce keyoŋe toponutekap koret, ce kanäm kuyoŋnto yomotik amwan cepo koret, sukuŋet mente kukut yomet koret oko ruretyet, nto ket ake tokol. 2Akäs malayket ake nye cone koŋasis wule cone asista kuponto muwurutap Yiyintet nye sope. Kukurto om kutit nyewo kumwoci malaykanik amwan co kukukoci Yiyintet kamukeywek kowurta koret oko ruretyet. 3Kumwoci kule, “Monte ciwurte koret nto ruretyet nto mpo ketik okoy ye kocikoci muwurut tokoywekap mutworik cepo Yiyintet.’’ 4Yoto cemwowo wule tento coŋinto nyepo piko co kucikoci muwurut tokoywekwa kucu kule, Piko elifunek pokol akenke oko artam ok amwan cepo werikap Israel ce kicekwere muwurut. 5Oko elifunek taman ok oyeny cepo kotap Yuta, oko elifunek taman ok oyeny cepo kotap Rupen, oko elifunek taman ok oyeny cepo kotap Kati, 6oko elifunek taman ok oyeny cepo kotap Asyer, oko elifunek taman ok oyeny cepo kotap Nafutali, oko elifunek taman ok oyeny cepo kotap Manase, 7oko elifunek taman ok oyeny cepo kotap mpo Simiyon oko Elifunek taman ok oyeny cepo kotap mpo Lefi, oko elifunek taman ok oyeny cepo kotap Isakar, 8oko elifunek taman ok oyeny cepo kotap Isakar, oko elifunek taman ok oyeny cepo mpo kotap Sapulon, oko elifunek taman ok oyeny cepo kotap mpo Yosep, oko elifunek taman ok oyeny cepo mpo kotap Penyamin. 9Nto om letutap ŋalecato, yoto akäs ani luket nyepo piko ce memuce ci kot koyit! Kwone piko coto yemosyek tokol, oko orosyek tokol oko piko tokol oko ŋelyepik tokol. Kimite cekto yoto kukeyoŋe taytap ŋeceret nyepo poytoyisyet oko taytap Lekwap Kecir nye kelac sirok ce lelac oŋnkunäme picoto sosik yewuniyekwa. 10Kikurtoy om polotet nyewo kumwowu kule, “Cone kosopotet wule mite Yiyintenyo nye kepure ŋeceret, oŋnkucone wule mite Lekwap Kecir!’’ 11Kuyoŋe yoto komut ŋeceret malaykanik tokol oko poyik oko tyoŋik amwan ce soptos. Yoto koputyi ŋony om taytap ŋeceret oŋnkusay cekto Yiyintet, 12kumwoy kule, “Yunyoto! Kupeyok oko woyinto oko swamet oko ŋomnonet, oko kakastayet, oko konyitotet, oko swamet kuce kupoyit coto tokol Yiyintenyo okokoy okoy okokoy! Yunyoto!’’ 13Kuŋololwo yoto pontet akenke kutep kule, “ Ŋo picu kelac sirok ce lelac? Oŋnkukwone cekto ono?’’ 14Owekyi ani omwoci kule, “Mokoryontet, nyi nye nketi.’’ Kumwowo kule, “Picu kuce kipunune toŋoŋutek cewoyec koromun. Kunyo kisit sirokwa kulelakitu kusite korotikap Lekwap Kecir. 15Mite yawut kukeyoŋe taytap ŋeceret nyepo Yiyintet sukwicini yisyet om konyi pet oko komoy. Kunyo ripe neto nyo kepure ŋeceret cekto. 16Puryo kot kwome rupet kenyis oŋnkupuryo kot kwome melelya, oŋnkupuryo mpo kot kupele asista nye mwa. 17Omnye Lekwap Kecir nyo mite kwenumwa kunye mesewontet nyimwa nye mosukuntoci okoy wule kosune peko cepo soponto. Mosukopuc Yiyintet lokik tokol ce mite konyek cikwa.’’

will be added

X\