Revelation 6

1Yoto akäs ani Lekwap Kecir kupetec muwurut nyepo tayta om muwurunek tisap, oŋnkalim tyonynto akenke om tyoŋik ce soptos amwan kupol om kutit nyewo kutul kuyu ilet kumwoy kule, “Co!’’ 2Akäs ani yoto yec Farasit nyelel, kiponto kiyaŋnta cito nye kiwete Farasinato, yoto cikoci cicoto kutwet; kuwo kuworenot nye kokopëlis oŋnkutosyikey kupëlis. 3Kupetec Lekwap Kecir muwurut nyepo oyeny, alim ani yoto tyonynto nyepo oyeny kumwoy kule, “Co!’’ 4Kuco yec Farasit ake nye kyarra. Cikoci cito nye kuwete Farasinato kamukeywek kunum kalyet nye kimite koret, sukuŋet kuparkey piko kwicek nkit, oŋnkyikoci cicoto rotwetap cok nyewo. 5Akäs kupetec Lekwap Kecir muwurut nyepo somok, alim kumwoy tyonynto nye po somok kule, “Co!’’ Nto opere akäs yoto akäs Farasit nye tuy. Kiponto cito nye kiwete Farasinato om yewunyi kilet nye cepimonisye. 6Alim yoto kutit nye kerkey nye cone kwenutap tyoŋik amwan ce soptos nye kimwoy kule, “Litet akenke nyepo nkanuk om musyaret nyepo pesyet, nto litanik somok cepo nkanuk sayirinek kupo musyaret nyepo pesyosyek somok. Ntene mente awurte mwayta oko Finyonik!’’ 7Kupetec Lekwap Kecir muwurut nyepo amwan, yoto alim ani tyonynto nyepo amwan kumwoy kule, “Co!’’ 8Nto opere akäs yoto akäs Farasit nye tolelyo, nto cito nye kiwete Farasinato kunye cekure met, oŋnkarupe let kurikyi kapkompic. Cikoci cekto kamukeywek kupayta akenke om amwan nyepo piko cepo koret, sukuŋet kupakäce poryet oko rupet oko porwonik oko tyoŋikap samiyita cepo koret. 9Kupetec Lekwap Kecir muwurut nyepo mut, akäs yoto ce kimite otepto nyetilil ŋony, mukuleywek cepo piko co kicepakäc omnye kimwaytat ŋolyontet oko ŋalek ce kiparta. 10Kupol picoto kukurto om kutit nyewo kumwoy kule, “Mokoryontet nyepo kamukeywek tokol, nyetilil oŋnkupo manta! Mesepur nyi okokoy pesyo ne ye semutyi musankut oŋnkipakäc pikap koret omnye kipakäcec acek?’’ 11Cikoci ci ake tokol om cekto siret nyelel, oŋnkyemwoci kopur komuny kuloyit kuminiŋ okoy kupunto coŋinto nyepo mutworik oko mpo yeya ce kerkey cekto ce mosicepakäc kuyu wulo kicopoköce cekto. 12Akäs yec Lekwap Kecir kupetec muwurut nyepo lö. 13Yoto kuriŋriŋ koret, kutuyit asista kuyu siret nye tuy mis, kusalakay arawet kwek koroti, kosuwune kokelik parak kuyu mokoyek ce mnoruryo ce kelucluc yomet. 14Kupot koret wulin po torot kuyu kartasit nye kaciriny. Cinum cinate tulonok oko korosyek ce kikwen peko kukwane ye kimite. 15Yoto kuŋet kinkonik cepo koret oko piko cewoyec oko cewoyec cepo poryet, oko piko ce mokoren oko piko ce ponto swamet, oko piko alak tokol, ce mutwor oko ce puryo kot ku mutwor. Kuwunynkey yoto picoto kuwuŋenkey tulonok oko kepenonik ce mite rwontok. 16Kukurtoy kumwoci tulonok oko rwontok kule, “Olulcec acek awunyec mente kot kukäsenec konyek neto nyo kepure ŋeceret nyepo poytoyisyet oko nerekwekap Lekwap Kecir. 17Omnye kopunto pesyemwa nyepo nerekwek, ŋo nye muce kuyoŋe tayta nyenyi?’’

will be added

X\