Revelation 5

1Yoto akäs kuponto kitaput om yewunyi nyepo tay neto nye kepure ŋeceret nyepo poytoyisyet nye kicesil orit oko saŋ oŋnkyitinye muwurunek tisap. 2Akäs yoto malayket nyepo swamet nye kikurto om kutit nyewo kumwoy kule, “Ŋo nye yeme, nye muce kupetec muwurut oŋnkuŋany kitaput?’’ 3Ntene kipuryo ci mpo akenke om torot nto om koret, nto om kapkompic nye kimuc kot kuŋany kitaput oŋnkukäs orit. 4Arir ani koromun omnye kipuryo mpo akenke nyepo latik nye kicenyor nye kaŋany kitaput oŋnkukäs orit. 5Kumwowo pontet akenke kule, “Mente arir, käs pa! Ŋetunynto nye cone kotap Yuta, nye keseniyantetap Tauti nyewo, nye kakopëlis, kunye muce kupetec muwurunek tisap oŋnkuŋany kitaput.’’ 6Yoto akäs Lekwetap Kecir nye keyoŋe kwenutap ŋeceret nyepo poytoyisyet, nye kepur komut neto yoto tyoŋik ce soptos amwanu oko poyik. Kerkey Lekwap Kecir yoto nye kacetil kume. Kiponto kuyinok tisap oko konyek tisap, coto ku mukuleywek tisap cepo Yiyintet ce kikoyto kupa koret tokol. 7Kuwo Lekwetap Kecir oŋnkunum kitaput kunumune yewutap tay nyepo neto nye kepure ŋeceret nyepo poytoyisyet. 8Nteyu kowo kunumu, yoto kukutuny koputyi ŋony tyoŋik ce soptos amwanu oko poyik tiptemu ok amwan om taytap Lekwetap Kecir. Kiponto ci tokol om cekto pukantit oko pokulit nyepo Saput nye nyitat mwayta nye poŋu. Coto kuce somset cepo pikap Yiyintet. 9Yoto kutum cekto tumnto nyelel nyi kule: “Misyiniŋ nyito numu kitaput oŋnkipetec muwurunekyi. Omnye kicetiliŋ, kunyo om korotikuk, kiyal nyi kukwa wule mite Yiyintet: piko cepo arosyek, yemosyek oko ŋelyepik. 10Kikwey nyi cekto kwek Kinkonik cepo tisik, kuyici yisyet Yiyintenyo kunyo mokupoytoyis om koret.’’ 11Akaste yec, alim polotet nyepo malaykanik ce caŋ ce mociyite, Elifunek oko Elifunek. Kiyoŋe cekto komut ŋeceret nyepo poytoyisyet oko tyoŋik amwan ce soptos oko poyik. 12Oŋnkutum om kutit nyewo kule: “ Lekwap Kecir nyo kicepoköce, kunye misyini kunyor poytoyisyet oko Mokoryontit, oko ŋomnonet oko kakastayet, oko swamet, woyinto oko kupeyok.’’ 13Alim yoto Tyoŋik tokol cepo torot, oko cepo koret, oko cepo ŋony, oko tyoŋik tokol cepo ruretyet, oko tyoŋik cepo koret tokol kumukul kutume kule: “Wule mite neto nyo kepure ŋeceret nyepo poytoyisyet, oko Lekwap Kecir, kupoyit kupeyok, oko koyweyisyet, oko woyinto, oko swamet okokoy oko okokoy!’’ 14Yoto kuwec tyoŋik amwanu ce soptos kumwoy kule, “Yunyoto!’’ Kuputyi poyik ŋony oŋnkusay.

will be added

X\