Revelation 4

1Nto om letutap coto ceŋoŋwo akäs kurket nye kayatakay om torot. Nto kutit nyo kikyalim kuŋololwo om tayta nyo kikerkey kontit kunye kimwowo kule, “Iloŋu co wuli, moporuŋ ani tukuk ce mokwiyokis cerupe ŋalecu.’’ 2Yoto pakenke kucontyo Muyet, akäs ŋeceret nyepo poytoyisyet om torot nye kimite kukepure cito ake. 3Nyoto kipure ŋeceranato kunye kikerkey tokoyta nyenyi rwantet nye nyalil kwarra nye cekure Yaspo oko sarutyo, oŋnkomut ŋeceranato cekwalasyet nye kerkey oko rwantet nye nyalil nye cekure Sumariti. 4Kimite mpo ŋecerok alak ce ki tiptem ok amwan ce kimut ŋeceranato. Kipure ŋecerocoto poyik tiptemu ok amwan ce kelac sirok ce lelac oŋnkulac kutonok cepo Sapunek. 5Yoto kucone ŋeceranato po poytoyisyet kaweket nye wece oko karumnta oko tulotet. Kimite tarinek tisapu ce loytos om taytap ŋaceranato, coto ku mukuleywek tisap cepo Yiyintet. 6Kimite taytap ŋeceranato nye kerkey oko ruretyet nyepo kilasit nye lekecece kuyu kitake nye cekure Kristalit. Nto komut ŋeceranato po poytoyisyet, om komoswokik tukway kimite yec tyoŋik tisapu ce soptos ce kiponto konyek ce caŋ ce kimite tay oko sekeronok. 7Kikerkey tyonynto nyepo tayta oko Ŋetuny; kukerkey nyepo oyeny oko Yeyito; kuponto tyonynto nyepo somok metit nye kerkey nyepo cito. Kukerkey nyepo amwan oko Ploŋoniyet nye terertoy. 8Kiponto tyoŋicoto amwanu kepepok lö ce kiponto konyek om kepepocoto saŋ oko orit. Kitume pet oko komoy nye memunye kumwowu kule: “Tilil, tilil, tilil, ku Mokoryontet Yiyintet nyepo kamukeywek tokol, Nye kimite, nye mite yawut, Oŋnku nye mosukuco.’’ 9Kitume tyoŋicoto amwanu tumwonik cepo woyinto oko kakastayet oko koyweyisyet kutumncini neto nye kepure ŋeceret, nye sope okokoy. Nteye katum kuyunyoto. 10Yoto kukutuny poyik tiptemu ok amwan co mite taytap neto nye kepure ŋeceret oŋnkusay neto nyo sope okokoy okoy okokoy. Wircini cekto yoto kutonokwa cepo Sapunek taytap ŋeceret kumwowu kule: 11“Mokoryontet Yiyintet nyinyo! Kunye misyini ciyweye oŋnkyilaŋnta woyinto nyenyi oko swamet. Omnye kitany nyi tukuk tokol, kicitany oŋnkunyor soponto kuyu wulo kicämnta neto.’’

will be added

X\