Revelation 3

1“Nto malayket nyepo pikap Yiyintet cepo Sarte, silyi kule; “Kwone lokoywecu wule mite neto nyo ponto mukuleywek tisap cepo Yiyintet oko kokelik tisap. Oŋnketi yisyonutek tokol ce yiye nyi, ponte kaynet nye toku kule yiku sopot oŋnkurok yec kimey! 2Kunyo ŋet oŋnkinäm kwil ce teponte kutompo kupok kuwoŋnkey, omnye kwakäs kule puryo kot kunyolunot yisyet nyeŋuŋ om taytap Yiyintemwani. 3Kunyo möce sot ŋalek co kicinetiŋ oko ce kilim, rip coto oŋnkirenynkey om miyotyonikuk. Ye puryo kot ŋet käste mosocontyiŋ kuyu corin, nye menketi sawet nye acone ani. 4Ntene ponte om Sarte piko ce ŋeri ce tompo kot kowurta sirokwa konyinye sakatyet. Mosukupesetat coto oko ani kukakolac sirok ce lelac, omnye yeme kwiy kuyunyoto. 5Cito nye kepëlis kunye mosicilokyi siret nyelel kuyunyoto. Nye puryo kot apuci anumu ani kaynokwa kukwane kitaput nyepo soponto. Mwosomwowu otoru om taytap Papamwani oko taytap malaykanik kule cikwani picoto. 6“Kunyo nye ponte yitik ce limnte kunye misyini kulimnta ŋalek ce mwocini Muyet lukosyek cepo pikap Yiyintet!’’ 7“Nto malayket nyepo pikap Yiyintet cepo Filatelfia, silyi kule: “Kwone lokoywecu wule mite neto nyo tilil oŋnkupo manta, nye ponto Funkuwet nye kipo Tauti. Yote neto ntene puryo nye muce kot kuker, Kere ntene puryo nye muce kuyat. 8Oŋnketi yisyonutekuk tokol, oŋnket mpo kule ponte swamet nye kisic, ntene kwerup ŋalekwani oŋnkiyeno kunyo koyotuŋ kurket om tayŋuŋ nye memuce ci kot kuker. 9Alimnte pa! Nto luket nyepo luket cepo Setanit, ce mwiynot ce sutekey kule ciku Yutayek oŋnkurok yec kumo Yutayek, mosokweru kukwa taymwoŋ oŋnkokutumwoŋ sukuŋet konket cekto tokol kule ocömok ani. 10Omnye kwerip ntarastimwani muytoci, kunyo mosoripiŋ ani om wule mite syemutok, ce musukukwontyi koret tokol sukuŋet cesyem piko cepo koret. 11Aconi ani lakwar. Kunyo kwil topon tukuk ce ponte, sukuŋet mente kot kunumuneniŋ citake kokotutyet nye pëlisye. 12Mosokoci ani co kepëlis kwek tolocta nyepo kotap Yiyintemwani, puryo kot kukwone koyoto orit kenyis. Mososil ani porto nyenyi kaynetap Yiyintemwani, oŋnkosil kaynetap moŋetap Yiyintemwani, nyoto ku Yerusalem nyelel nye mosukucone torot wule mite Yiyintemwani. Mososil mpo porto nyenyi kaynemwani nyelel. 13“Kunyo nye ponto yitik ce limnte misyini kulimnta ŋalek ce mwocini Muyet lukosyek cepo pikap Yiyintet.’’ 14“Nto malayket nyepo pikap Yiyintet cepo Laotikea, silyi kule: “Kwone lokoywecu wule mite neto nye cekure, ‘Yunyoto’. Nye ponto koyenet oŋnku muncururwet nyepo manta. Neto kunye towunot nyepo kiy ake tokol nye kitany Yiyintet. 15Oŋnketi yisyonutekuk tokol, oŋnketi kule puryo kot yiku nyi kaytit oŋnku puryo kot yiku layat, kweroke yiku akenke om coto oyeny, nye yiku kaytit nto layat! 16Ntene omnye yiku purkey pate, nye puryo kot yiku kaytit nto layat, kunyo mosaŋuŋuŋ! 17Mwowu kule, ‘Oyiku mokoryo, amite topon, oponte tukuk tokol, kunyo puryo kiy nye omöce.’ Ntene menketi kule amite kwapi koromun! Yiku puren, nye möce cikalyiŋ, panan nye korat nye moponto sira. 18Kunyo kakoniŋ ŋomnonet kule iyalena ani Saput nye kicepel kulelit topon, sukuŋet mokoren. Yal mpo sirok celelac sukuŋet lac kuyen porto nyeŋuŋ nyepo kalilan. Yal mpo sakityek siŋet yile konyek cekuk sikäste. 19Osowu oŋnketi ani topon piko co acöme ani, kunyo titir, oŋnkirenynkey. 20Limnte pa! Koyoŋe ani kurket oŋnkokonynkony, nteye kalim citake kutimwani oŋnkuyat kurket mosowut konyi oŋnkyomisye tukway. 21Cito nye kepëlis kunye mosokoci kamukeywek cipure tukway ŋeceremwani nyepo poytoyisyet, kuyu wulo kyopëlisye ani okoy opure oko Papa, ŋeceret nyepo poytoyisyet. 22“Kunyo, nye ponto yitik ce limnte, kumisyini kulimnta ŋalek ce mwocini Muyet lukosyek cepo pikap Yiyintet!’’

will be added

X\