Revelation 22

1Yoto kuporwo ani malayket oyinet nyepo peko cepo soponto nye kilekecece kuyu ciyoyit, ce kirotune ŋeceretap poytoyisyetap Yiyintet oko nyepo Lekwap Kecir. 2Kurot oyinet kupunte aret nyepo kwenutap moŋet. Kipite tapantap oyinet pitoni ketit nyepo Soponto nye yiye omik aret taman ok oyeny om kenyit akenke, nye yiy omik kila arawet akenke. Kyiyisye sokek ceci cisope piko cepo yemosyek. 3Puryo kot cenyortoy moŋonoto kiy nye kicup Yiyintet. Mosukopurune moŋonoto ŋeceretap poytoyisyetap Yiyintet oko nyepo Lekwap Kecir, musukusay mutworikyi neto. 4Mosukukäs cekto tokoyta nyenyi, mosicesil kaynet nyenyi tokoytap picoto, 5nye komo kumite yec menonet nyepo komoy, puryo kot kumöce cekto lakweyet nyepo tarit nto mpo nyepo asista, omnye mosukwek Mokoryontet Yiyintet lakweyet nyimwa. Mosukupoytoyis cekto okokoy okoy okokoy. 6Yoto kumwowo ani malayket kule, “Ŋalecu kuce po manta ce cikenekey. Kunyo Yiyintet nyo kocini mukuleynyi workoyik kunye kokuyok malaykenyi cokuporci mutworintenyi ce mosukwiyokis lakwar.’’ 7Komwoy Yesu kule, “Alimnte! Aconi ani Lakwar, ŋerekotin nye ponto kupeyoy co ripe ŋalecu po ŋorsyet ce mite Kitapuni!’’ 8Ani Yowana kunye kyalim aŋnkakäs, tukucu tokol. Nteyu kowo alim, aŋnkakäs yoto oputyi yepo kerenkokap malayket nye kiporwo ani tukucutecu tokol aŋnkasay. 9Ntene kumwowo kule, “Mente ayiy kuyunyo! Oyiku ani mutworin nye akerkeye nyito oko mpo yeyaŋuŋ workoyik oko piko tokol ce yiye ŋalek ce mite kitapuni orit. Say Yiyintet!’’ 10Kumwowo yec kule, “Mente orip iwuny kuwoŋokis ŋalek cepo ŋorsyet ce mite kitapuni, omnye karik pesyet nye kweyat. 11Yaste kwiy miyotyet cito nyo yiye miyotyet, kutosyikey kusomisitu kasoteywek cepo cito nyo somisec kasoteywek, kutosyikey kutoponit cito nyo topon, oŋnkutosyikey kutililit cito nyo tilil.’’ 12Kumwoy Yesu kule, “Alimnte! Aconi ani lakwar, mosutu kokotutyemwani sokoci ci ake tokol kuyu wule yunto yisyet nye kikwiy. 13Oyiku ani Alufa oko Omeka, nyepo tayta oko nyepo letut.’’ 14Ponto kupeyoy piko co site kutililitu sirokwa, omnye mosukunyor kamukeywek kwam matuntyantet nyepo ketit nyepo soponto, oŋnkunyor kamukeywek kowut kurkotik cepo moŋet. 15Ntene mosukopurune moŋet saŋ ŋokik, co kimosokis, oko ponik, oko co sekwayane, oko porik, oko co soye kerkeyik, oko tokol co cöme oŋnkwiye mwiynanet. 16“Ani Yesu nye koyoku malayket nyimwani sukuŋet kumwowok ŋalecu om wule mite pikap Yiyintet tokol. Oyiku ani mucukoret nyepo kotap Tauti. Oyiku kokelyet tapoyantet nyepo yo kayec koret.’’ 17Komwoy Muyet Nyetilil oko Mureret kule, “Co!’’ Möce kumwoy ci tokol nye lime ŋalecu kule, “Co!’’ Möce kuco ci tokol nye ponto melelya, ci tokol nye möce peko cepo soponto kumöce kunyor pöc pate nye puryo kot kwole mpo kisic. 18Ani nyo Yowana kunye asowu ci ake tokol nye lime ŋalek cepo ŋorsyet ce mite kitapuni. Ci tokol nye kotosyi ŋolyontet ake wule mite ŋalecu, mosukutosyi Yiyintet toŋoŋutek cepo porwonik cu kicesil kitapuni. 19Nteye kotepe kot kunum citake tokol ŋolyontet ake tokol om wule mite ŋalek cepo ŋorsyet ce mite kitapuni, musukunumune Yiyintet neto nyoto omik ce kotonyoru om ketit nyepo soponto, oko otepto nyenyi om moŋet Nyetilil nye cemwowu om kitapuni. 20Cito nye mwowu ŋalecutecu tokol kunye mwowu kule, “Aconi ani Lakwar kupoyit manta!’’ Yunyoto Mokoryontet Yesu, Co! 21Kopurune poypoyetap Mokoryontenyo Yesu Kristo wule mite pikap Yiyintet tokol.

will be added

X\