Revelation 21

1Yoto akäs ani torot nyelel oko koret nyelel, omnye kupok koret wulin po torot oko koret wuli po ŋony cepo tayta. Kimo kumite yec ruretyet. 2Akäs moŋet nyetilil Yerusalem nyelel kureku kucone torot wule mite Yiyintet, nye kicesat kunyol topon kukerkeyit korko nye kacimüt nye kacilac topon sukuŋet kutuyo oko santenyi. 3Alim yoto kutit nye cone ŋeceretap kamukeywek kupol kumwoy kule, “Akäs pa! Kakukoci Yiyintet konyi kopure kwenutap piko, mosukumiŋis wule mite cekto, mosukwek pikyi, oŋnkwek neto Yiyintet nyimwa. 4Mosukopuc Yiyintet lokik tokol ce mite konyekwa, komo kumite yec met, oŋnku komo kumite mesyet, nto mpo rirek, nto mwoninto, omnye kutil tukuk co kipo keny.’’ 5Kumwoy Neto nye kepure ŋeceretap kamukeywek kule, “Akäs pa! Kawec yawut kulelakitu tukuk tokol!’’ Kumwowo yec kule, “Sil ŋalecu, omnye po manta ŋalecu oŋnkyikenekey.’’ 6Kumwowo kule, “Kakwitita! Oyiku Omeka oko Alufa. Nyepo tayta oko nyepo Letut. Mosokoci ani ci ake tokol nye ome melelya peko ce puryo kot kwole ce kosune wule mite soponto. 7Ci tokol nye kepëlis kunye mosikonti cutecu tokol, Mosoyeku ani Yiyintenyi oŋnkwek neto lekwemwani. 8Ntene piko co nyokorec, co meyene, oko co ŋomntoyot, oko co kiwuryo, oko porik, oko co sakwoyone, oko co mwiynot tokol, oko co yiye sokeyek, oko co soye kerkeyik oko co perperisyi, otepto nyimwa ku tampayayet nye loye, oko mata, oko rwontok ce loytos Salfa, nyoto kunye met nyepo oyeny.’’ 9Yoto kuco wule omite ani malayket akenke om malaykanik tisap co ponto pokulinek tisap ce nyitotin porwonik tisapu cepo letut, oŋnkuŋololwo kumwoy kule, “Co yu! Mosoporuŋ Mureret korket nyepo Lekwap Kecir.’’ 10Kunäma yoto malayket Nyetilil oŋnkukwero okoy tulwet nye koy koromun. Kuporwo moŋet nyewo Nyetilil, nyoto ku Yerusalem nye kicone torot wule mite Yiyintet. 11Kulekecec om Woyinto nyepo Yiyintet, kuyu rwantet nye piciy oŋnku kerkey rwantet nye lekecec Cespa, oŋnkutoku kuyu ciyoyit Krestol. 12Kiponto moŋet totet nyewo nye kicetec komut oko kurkotik taman ok oyeny oko malaykanik taman ok oyeny ce ripe kurkoticoto. Kicesil kurkoticoto kaynok taman ok yeny cepo lekokap Israel co taman ok oyeny. 13Kimite komoswokik tokol ku amwan kurkotik somoku. Kimite somoku koŋasis, kumite somoku tö, kumite somoku makentany, kumite somoku tinkey. 14Kicetec totet nyepo moŋet kuyoŋe rwontok tolocik taman ok yeny ce kicesil kaynokap Kiyokik cepo Lekwap Kecir. 15Kiponto malayket nye kiŋololwo korokto nyepo Saput nye cepimonisye wule tento moŋet oko kurkotik oko totet. 16Kicetec moŋet kwek sukweya kwoyecin koyinto nyepo komoswokik tokol ku amwan. Kuyoyec malayket moŋonoto kwiyisye korokto nyenyi. Kipuntoy koyinto kilomitanik Elifunek oyeny oko pokolwokik oyeny. Kyoyecin koyinto oko poroyinto oko koyinto kuwo parak nyepo moŋet. 17Kuyoyec malayket mpo moŋet, kipuntoy mitanik tomonwokik lö ok mut. Om koyoyeket nyepo cito. 18Kicetece totetap moŋet rwontok ce lekecectos. Nto moŋet nkit kunye kicetece Saput nkit pate nye lekecece kuyu ciyoyit. 19Tolocik ce kiyoŋe totet nyepo moŋet kuce kiciyile tokol rwontok ce piciyec wok ce caŋ. Tolcta nyepo tayta ku rwantet nye ararra Yasipi, nto nyepo oyeny ku cepo Sapiro, nto nyepo somok ku Kaluteton, nto nyepo amwan ku cepo Samarakito, 20nto nyepo mut ku cepo sarntoniki, nto nyepo lö ku cepo sarutiyo, nto nyepo tisap ku cepo krisolito, nyepo sisit ku cepo Perulo, nyepo sokol ku cepo Topasiyo, nyepo taman ku cepo Krisopraso, nyepo taman ok akenke ku cepo Yakinto, nyepo taman ok oyeny ku cepo Ametusito. 21Nto kurkotik taman ok oyeny ku cepo Lulunek taman ok oyeny. Kicitanye kurket ake tokol Lulunek. Nto aret nyewo nyepo moŋet kunye kicemale Sapunek pate nye kilekecec kuyu ciyoyit. 22Kipuryo kot akäs kotap Yiyintet kumite moŋet, omnye Mokoryontet Yiyintet nyepo kamukeywek tokol oko Lekwap Kecir kunye kotap Yiyintet nyepo moŋonoto. 23Puryo kot kumöce moŋonoto asis nto arawet nye keluci, omnye lucini pate woyinto nyepo Yiyintet, nto Lekwap Kecir kunye tarit nyenyi. 24Mosukupesetate piko cepo koret lakweyet nyenyi, mosukusut kinkonik cepo koret mokoryontinekwa kukwa moŋonoto. 25Puryo kot cekere kenyis kurkotik ceci pet oko komoy, omnye puryo kot kumite wuloto ye komoy. 26Mosicesut woyinto oko mokoryontinek cepo pikap koret tokol kukwa moŋonoto. 27Memuce kot kowut moŋonoto kiy ake tokol nye miyat, nto mpo ci nye yiye cepo kalilan, nto nye perperisyi. Piko pate ce kicesil kaynokwa kitaput nyepo soponto nyepo Lekwap Kecir ce wute moŋet orit.

will be added

X\