Revelation 20

1Yoto akäs ani malayket nye reku kucone torot, nye kiponto om yewunyi Funkuwet nyepo mwenet nye moponto ye ŋete oŋnkuponto nyororet nyewo. 2Kunäm malaykanato Cesosum nyoto ku Erenet nyepo keny nye cekure Setani nyewo nyepo oyik oŋnkurat kopur kuwany kenyisyek elifut akenke. 3Kuwirci malayket kowute Cesosum mwenet nye moponto ye ŋete, oŋnkukerta orit kukoci pelutyet sukuŋet komo komuce kot kumas kuperper yemosyek okoy kupok kenyisyek elifut akenke. Mosicityac kopur kuminiŋ ye kapok kenyisyek coto. 4Yoto akäs ŋecerok cepo kamukeywek oko piko ce kepure, ce kicikoci kamukeywek kumut musankunek. Akäs mpo yec mukuleywek cepo co kiceyep metewok omnye kimwoy kutor Yesu oŋnkumwoy kupor ŋolyontetap Yiyintet. Kipuryo kot kusay picoto tyonynto nto mpo kerkeyinto nyenyi, oŋnkupuryo kot cepirci pelutyetap tyonynto tokoywek cikwa oko yewuniyek cikwa. Kotutune met cekto kusopco oŋnkupoytoyis oko Kristo kuwany kenyisyek elifut akenke. 5(Kipuryo kot kotutune met piko cut alake okoy kupok kenyisyek elifut akenke) nyitenyi kunye kotutunetap met nyepo tayta. 6Ŋerekotin ce ponto kupeyoy co nyoru kotutunetap met nyepo tayta. Puryo kot kuponto kamukeywek met nyepo oyeny om wule mite cekto coto, ntene mosukwek coto tisik cepo Yiyintet oko Kristo, oŋnkupoytoyis oko neto kuwany kenyisyek elifut akenke. 7Nteye kapok kenyisyek elifut akenke, mosicityac Setanit kucone mopusi nyi. 8Mosukuco saŋ, mosukucec kuperper yemosyek ce mite taponutek amwan cepo koret, coto ku Koku oko Makoku, mosukoruruc Setanit cekto kunäm poryet, mosukucaŋit cekto koromun cete ŋaynet nyepo ruretyet tapan. 9Yoto kupa kuseretyi koret tokol oŋnkomut kayta nyepo pikap Yiyintet oko moŋetap Yiyintet nye topon. Ntene kucone mata torot oŋnkupël kwaranta cekto. 10Cewirci yoto Setani nyewo oyik nyo kiperper cekto wule mite tampayayet nyepo mata nye kicepel kipiritit wule mite tyonynto oko workoyontet mwiyntet; mosukutaŋany cekto komoy oko pet okokoy okoy okokoy. 11Yoto akäs ani Ŋeceret nyewo nyelel nyepo poytoyisyet oko cito nye kepure. Kumwey koret wuli po ŋony oko koret torot om tayta nyenyi, oŋnkupotyo nye komoceköse yec. 12Akäs piko cewoyec oko ce minkec ce kipok ce keyoŋe tayta ŋeceret. Ceŋany kitapunek, yoto ceŋany mpo kitaput ake, Kitaput nyoto kunye po soponto, cemutyi musankut piko ce kipok kuyu wule yunto yisyonutekwa om ŋalek ce kicesil kitapunek. 13Kukon ruretyet piko ce kipok ce kimite orit. Kukon met oko kapkompic piko ce kipok ce kimite orit. Cemutyi ci tokol musankut kuyu wule yunto yisyonutekyi. 14Cewirta met oko kapkompic cewirci tampayayet nyepo mata. (Tampayayet nyepo mata kunye met nyepo oyeny.) 15Ye puryo kot cenyorta kaynetap ci tokol nye kicesil kitaputap Soponto, cewirci nyo wule mite tampayayet nyepo mata.

will be added

X\