Revelation 19

1Nto om letut alim ani polotet nye kerkey polotet nyepo piko ce caŋ om torot ce kipole kule, “Cikaste Yiyintet! Po Kosopotet Yiyintet, oko Woyinto oko swamet! 2Po manta wule mutitoy neto musankunek! Kacemut musankut kulot Cemoroniyontet nyewo nye kikowurta koret om sakwayanatet nyenyi, kwetaŋany Yiyintet neto omnye kipakäc neto mutworikap Yiyintet.’’ 3Kupol yec kumwoy kule, “Cikaste Yiyintet! Weti torot kenyis oko kenyis yetit nyepo moŋet nyewo.’’ 4Yoto kukutuny poyik tiptemu ok amwan oko tyoŋik amwan ce soptos ce mite taytap ŋeceret oŋnkusay cekto Yiyintet nye kepure ŋeceret kumwoy kule, “Yunyoto! Cikaste Yiyintet!’’ 5Yoto kucone kutit wule mite ŋeceret kumwoy kule, “Akaste Yiyintet, akwek mutworikyi tokol oko piko cewoyec oko ce minkec co yweye neto!’’ 6Yoto alim ani polotet nye kerkey nyepo piko ce caŋ, nye kerkey mpo peko cepo kasururtit, nye kerkey ilet nye kaciy. Alim kumwowu kule, “Cikaste Yiyintet! Omnye Mokoryontenyo Yiyintet nyepo kamukeywek tokol kunye Kinko! 7Akente ceŋerec acek oŋnkyikaste cikoci woyinto, omnye kopunto pesyet nye mütisyi Lekwap Kecir, kunyo kuyiytakey cepto nye cimüte. 8Kocikoci kulac siret nyelel nye topon koromun’’ (Siret suket nyelel ku yisyonutek ce toponec cepo manta cepo pikap Yiyintet). 9Yoto kumwowo ani malayket kule, “Sil ŋalecu, Ŋerekotin nye ponto kupeyoy piko co kucekur kukwa sakwetap kamütisyet nyepo Lekwap Kecir.’’ Oŋnkutosyi malayket kumwoy kule, “Ŋalekap Yiyintet cutecu cepo manta.’’ 10Oputyi ani yepo kerenkokyi asay neto, ntene kumwowo kule, “Mente ayiy kuyunyi! Oyiku ani mutworin nye kerkey oko nyito oko mpo yeyaŋuŋ co nöme kukwil ŋalek cepo manta ce kiŋoŋ Yesu. Say Yiyintet!’’ Omnye ŋalek cepo manta ce ŋoŋu Yesu kuce kikoci workoyik kuŋalal kuŋorsyo. 11Yoto akäs kuyatakay wulin po torot, okoy akäs Farasit nyelel. Cekure cito nye kiwete, Nyepo manta nye cikenekey. Yiyisye ŋalek cepo manta ye mute musankunek oŋnkuporye cepo manta. 12Kerkey konyek ceci mata nye loye oŋnkuloce kutonok ce caŋ om metinyi. Kuponto kaynet nye kicesil nye puryo ci nye kikonket, neto nkit pate nye nkete. 13Kiloce siret nye koy nye kiciyile korotik. Nto kaynetap nyoto kunyi, “Ŋolyontetap Yiyintet.’’ 14Kurup neto sikarek cepo luketap torot ce kipete Farasinek ce lelac oŋnkuloce sirok ce toponec ce lelac. 15Cone kutit nyenyi rotetap cok nye ŋatip nye mosukupele yemosyek tokol. Mosukupayta kwiyisye korokto nyepo karnet. Mosukoruruny Finyonik kwiyisye kito nyo cirurunye Finyonik cepo nerekwekap Yiyintet nyepo kamukeywek tokol. 16Kicesil siret nyenyi oko catit nyenyi kaynet kule, “Kinko nyepo kinkonik. Mokoryontet nyepo mokorenik.’’ 17Yoto akäs ani malayket nye keyoŋe Asista, kupol kukurto om kutit nyewo kukurci toritek ce kiterertoy om parak kule, “Akwa kworurukyikey sakwet nyewo nyepo Yiyintet! 18Kwayam panyek cepo porwonik cepo kinkonik, oko cepo cewoyec cepo sikarek, oko cepo co coponto swamet, oko panyek cepo Farasinek oko cepo piko co pete, oko panyek cepo piko tokol co tokunotin oko co momutwor oko co mutwor oko cepo piko cewoyec oko ce minkec.’’ 19Yoto akäs ani tyonynto nyin ake oko kinkonik cepo koret oko sikarek cekwa ce keruruckey kule ceporye cito nyo wete Farasit oko sikarek ceci. 20Cenäm tyonyoto kwek mopusyo wanak oko workoyontet nyepo mwiynan nye kikwiye tukuk ce cikite om taytap tyonyoto. (Kikwiyisyi tyonyoto tukucoto cikite sukuŋet kuperper piko co ponto pelutyet nyepo tyonyoto.) Cewirci kusoptos ruretyet nyepo mata nyepo rwontok ce loytos Sulfa. 21Cepakäc sikarek cikwa cepare rotwetap cok nyo cone kutitap cito nye wete Farasit. Kwam toritek panyek cikwa.

will be added

X\