Revelation 18

1Om letutap ŋalecu, yoto akäs ani malayket ake nye reku kucone torot. Kiponto kamukeywek ce woyec koromun. Kukweny woyinto nyenyi koret tokol kumukul. 2Kukurto om swamet nyewo kule, “Koturpup! Koturpup Papulon moŋet Nyewo. Kukwek kayta nye minye oyik ce miyotec ce cesenkere. Oŋnkuminye orit tukuk tokol ce somis oko toritek tokol ce cesenkere. 3Omnye kiye kupokit yemosyek tokol komek ce mwonec cepo sakwayanatet nyenyi. Kikwiy kinkonik sakwayanatet oko neto, oŋnkwiy cekto kamonkesyentit nyepo koret kumokoren om sakwayanatet nyenyi nye moponto ye ŋete.’’ 4Yoto alim ani kutit ake nye cone torot, nye kimwoy kule, “Pikwani! Akwane wule mite neto, sukuŋet monte kot ayiy miyotyet oko neto. Monte kot onyoru toŋoŋutek ceci! 5Omnye kicitul miyotyonikyi kwek tulwo nye kipunto torot, kunyo kukusot Yiyintet orustunwekyi co miyotec. 6Oyici akwek neto kuyu wulo kikwiwok akwek, oyokyi aret oyeny kucaŋit om ce kikwiy. Anyit kunyiy cikompet nyenyi komek ce mwonec aret oyeny kupël co kikonok akwek neto. 7Okoci neto toŋoŋutek oko mesyet ce caŋ ce oyecin cete sutetapkey oko soponto nyepo ŋerekwek ce miyotec ce kiponto, omnye mwowu kule, ‘Opuri ani kuyu kinko nye korko, puryo kot oyiku musuk, puryo kot omesyi kenyis!’ 8Kunyo om pesyet akenke, mosukunäm neto porwonik oko toŋoŋutek oko rupet. Omnye mosicepele mata kulay, omnye nyewo nyepo kamukeywek Yiyintet nye mosukumutyi musankut neto.’’ 9Kunyo mosukuriryo kinkonik cepo koret co kikwiye sakwayanatet oŋnkupur soponto nye topon oko neto, ye kakäs yetit nyepo mata nye pele moŋonoto. 10Mosukuyoŋe cekto wule low, omnye keywey kunyokoritu toŋoŋutekyi oŋnkumwoy cekto kule, “Opo! Opo! Po kakitat! Mite kwapi Papulon moŋet nyewo nye tokunot! Kocewosontyiŋ cemutuŋ kulotiŋ musankut lakwar om sawet akenke pate!’’ 11Mosukuriryo oŋnkumesye kamonkesisyek cepo koret tokol neto, omnye komo kwole ci yec terekokwa. 12Puryo nye tokwole Sapunek oko pesanik, oko rwontok ce piciyec, oko sirok celelac, oko sirok ce orornec oko sirok cepo ntororok, oko ce murwonec, oko terekok alak tokol cepo ketik ce motoku, oko tukuk tokol ce kicitanye kelekap Pelek, oko ketik cepo latik, oko toyok, oko karik, oko rwontok ce lelac. 13Oko tukuk ce poŋu, oko ce citoye nkuyek, oko pupaninek, oko korosek ce poŋu, oko Miranik, oko Frankinek, oko komekap Sapipunek, oko mwayta oko pusyek oko nkanuk oko toka oko kecirek oko Farasinek oko Karinek oko mutworik, oko mpo soponwekap piko. 14Kumwoci kamonkesisyek neto kule, “Kupotyo tukuk tokol co kwemöce nyi, kupot mpo mokoryontit oko ŋerekwek nye kemenyoru yec kenyis.’’ 15Mosukuyoŋe wule low kamonkesisyek co kikwiye kamonkesyantit oko neto om tukucutecu kuriryo oŋnkumesyi, kupole koromun omnye kanyokoritu om toŋoŋutekap korkonoto. 16Kumwowu kule, “Opo! Opo! Mite kwapi koromun moŋet nyewo. Nye kiloce ikye sukanik, oko siret nye mur kwarra oko nye arra, nye kikasekey karik cepo Sapunek oko lulunek! 17Kunyo kupote mokoryontiŋuŋ sawet akenke pate!’’ Kuyoŋe wule low piko tokol co poytoy raposyek, oko co pete raposyek, oko co sute raposyek, oko piko tokol co yiye kamonkesyantit om ruretyet. 18Kupol cekto yo kowo kukäs yetit nye kacepele moŋonoto kumwoy kule, “Puryo moŋet ake nye kerkey oko moŋet nyewo nyitenyi!’’ 19Yoto kuwasta cekto tertit kuwosyi metewok cikwa, kuriryo kumwoy kule, “Opo! Opo! Mite kwapi koromun nyi moŋet nyewo! Omnye neto kunye kimokorene piko tokol ce ponto raposyek! Kunyo kupotye tukuk tokol ce kuponto sawet akenke pate!’’ 20Akante kuŋerec wulin po torot! Aŋerec akwek pikap Yiyintet kiyokik oko workoyik! Oŋerec om arantayet nyenyi kamutyi Yiyintet musankut alot akwek neto om ŋalek ce kikwiwok! 21Yoto kunäm malayket nyepo swama rwantet nyewo nyete rwantetap paka oŋnkuwirci ruretyet orit kumwoy kule, “Mosowirci moŋet Papulon kuwo ruretyet om swamet kuyunyi nye komo kutoku yec kenyis! 22Tumwonik cepo piko co pire kirancinek oko piko cepo tumwonik oko co kute kurerunek oko co kute kontinek kuce komo celime yec kenyis om wule mite nyi! Komo kutokune kenyis wule mite ci nye yiyisyi nye muswokin. Komo celime kenyis rwantetap paka nye ceŋoye om wule mite! 23Komo ceköse kenyis tarit nye loye om wule mite, komo celime yec korko oko moron ce kemütkey ce ŋolole om wule mite. Piko cekuk cepo kamonkesyantit kuce kiwoyec om koret tokol, kuce kiperper pikap koret tokol kwiyisye ponisyet nyeŋuŋ!’’ 24Kicitaŋany Papulon omnye kicenyorta orit korotikap workoyik oko cepo pikap Yiyintet. Manta korotikap piko tokol ce kicepakäc om koret.

will be added

X\