Revelation 17

1Yoto kuco wule aomite ani malayket akenke om cut tisap co kiponto pokulinek tisap oŋnkumwowo kule, “Co, mosoporuŋ ani toŋoŋutek cepo korket cemoroniyontet nyewo, nyoto ku moŋet nye kicetec kulekite peko ce caŋ. 2Kikwiy kinkonik cepo koret sakwayanatet oko cemoroniyontet nyewo, kupokit piko cepo koret omnye kiye komek cepo sakwayanatet nyenyi.’’ 3Yoto kunäma ani Muyet Nyetilil oŋnkukwero malayket okoy kitela, akäs korket nye kepure tyonynto nye arra. Kicesil porto nyenyi tokol kaynok ce miyotec. Kiponto tyonyoto metewok tisap oko kuynok taman. 4Kiloce korkonoto sirok ce mur kworronec oŋnkyiyile Sapunek, oko rwontok ce piciyec oko lulunek. Kiponto om yewunyi cikompet nyepo Saput nye kinyitat orit tukuk ce miyotec, oko simnyontet nyepo sakwayanatenyi. 5Kicesil tokoyta nyenyi kaynet nye poru ŋalek ce wuŋotin kule, “Papulon Nyewo. Kametitap cemoronisyek oko miyotyonik tokol cepo koret.’’ 6Akäs kupokite korkonoto korotik cepo pikap Yiyintet oko cepo piko ce kicepakäc omnye kiyen Yesu. Nteyu kowo akäs korkonoto akite koromun. 7Ntene kumwowo malayket kule, “Omne sekite nyi? Mosoporuŋ ŋalek cewuŋotin ce nöme korket oko tyonynto nyo ponto metewok tisap oko kuynok taman, nyo wesetote korkonoto. 8Kisope tyonyoto nyo keköse nyi, ntene kime yawut kimo kusope, kunyo karik kuloŋune mwenet nye moponto ye ŋete, oŋnkwokyaranta yec. Mosukokite koromun piko ce mite koret ye kakäs cekto tyonyoto. Picoto kuce tompo kot cesil kaynokwa om kitaput nyepo soponto kutompo kot citany koret. Omnye kisope tyonyoto, kunyo kimo kusope yawut, ntene mosukutok yec. 9“Möce ŋalecu kasoteywek oko ŋomnonet. Metewok tisap kuce tulonok tisap co kepure korket, 10oŋnku Kinkonik tisap. Om kinkonocoto, kipotyo mutu, kumite akenke, kutompo kot kuco ake, nteye kaco nyoto, mosukupur kuminiŋ pate, 11Nto tyonynto nye kisope, ntene nye kimo kusopot yawut, kunye kinko nyoto nyepo sisit nye kipo co tisap cepo tayta oŋnku nye mowokyaranta. 12“Nto kuynok taman co kikäs nyi kuce kinkonik ce tompo kot kupoytoyis. Ntene mosicikoci kamukeywek kwek kinkonok kupoytoyis oko tyonynto kuwany sawet akenke. 13Ponto cutecu tokol ku taman kito akenke nye tyikyini, kule, kukoci cekto tyonynto swamet oko kamukeywek cikwa tokol. 14Mosukuporye cekto Lekwap Kecir, mosukupëlis Lekwap Kecir oko pikyi co cekure kweyanik oko konomikyi ce kikoyen, kupël cekto, omnye Neto kunye Mokoryontet nyepo mokorenik oŋnku Kinko nyepo kinkonik.’’ 15Kumwowo ani malayket mpo yec kule, “Peko co kwekäs nyi kukepure Cemoroniyontet, kuce piko ce caŋ, yemosyek oko ŋelyepik. 16Nto oko kuynok taman co kwekäs nyi oko tyonynto kuce mosukusenker Cemoroniyontet, mosukonemune kiy ake tokol nye ponto oŋnkupakakta kopur muncarata, mosukwam panyek ceci oŋnkwaranta kupele mata. 17Omnye kikukoci Yiyintet mukuleywekwa kito nye kiyitita, sukuŋet kwiy kucömncin cekto kwek akenke oŋnkukoci tyonynto kamukeywek kupoytoyis okoy kupunto kupoyit manta ŋolyontetap Yiyintet. 18“Nto korket nye kwekäs nyi ku moŋet nyewo nye poytoy kinkonik cepo koret.’’

will be added

X\