Revelation 16

1Yoto alim ani kutit nyewo nye cone kotap Yiyintet orit nye kimwoci malaykanik tisap kule, “Ape wowosyi koret nerekwekap Yiyintet co mite pokulinek tisap!’’ 2Kuwo malayket nyepo tayta wokuwasta pokulit nyenyi kuwosyi koret, kunäm mwoyok ce mwonec ce miyotec piko tokol co kiponto pelutyet nyepo tyonynto oŋnkusoye kerkeyintap tyonyoto. 3Kuwasta malayket nyepo oyeny pokulit nyenyi kuwosyi ruretyet, kwek ruretyet koroti, kukerkeyit korotik cepo cito nye kame. Kume kiy ake tokol nye kimite ruretyet. 4Yoto kuwasta malayket nyepo somok pokulit nyenyi, kuwosyi oyinosyek oko wule kosune peko, kuweckey co kwek koroti. 5Alim malayket nye ripe peko kumwowu kule, “Poye manta wule kemutite musankut nyeŋuŋ! Nyi Nyetilil! Nye mite yawut, Nye kimite ikye. 6Omnye kiwasta cekto korotik cepo pikuk oko cepo workoyik, kunyo kekoci kuye korotik. Kanyor ce yeme!’’ 7Yoto alim kutit nye cone otepto nye cepele korosek kumwowu kule, “Mokoryontet Yiyintet nyepo kamukeywek tokol! Manta aŋnkupo manta wule mutitoy musankunek!’’ 8Yoto kuwasta malayket nyepo amwan pokulit nyenyi kuwosyi asista, kupel asista piko om mata nye kiloye koromun. 9Kucup picoto kaynetap Yiyintet nyo poytoy toŋoŋutecutecu tokol. Ntene nye kipuryo kot kurenynkey cekto kwasta miyotyonikwa oŋnkukasta Yiyintet. 10Kuwasta malayket nyepo mut pokulit nyenyi kuwosyi ŋeceretap tyonynto, kulum menonet poytoyisyet nyepo tyonynto. Kunyiy piko ŋelyepik om mwoninto, 11kucup cekto Yiyintet nyepo torot om mwoninto oko om mwoyok ce kiponto. Ntene kipuryo kot kurenynkey om orustunwekwa ce miyotec ce kikwiy. 12Yoto kuwasta malayket nyepo lö pokulit nyenyi kuwosyi oyinet nyewo Efurate. Kuteny peko ceci, kusotyi aret kinkonik ce kwone koŋasis. 13Yoto akäs ani oyik ce miyotec somok ce kerkey mororocok ce kikwone kutitap Cesosum oko kutitap tyonynto oko kutitap workoyontet mwiyntet. 14Cutecu kuce oyik ce miyotec ce yiye tukuk cepo kakitat. Oyik cutecu somok kuce peti wule mite kinkonik om koret tokol kumukul wokoruruce wanak kupo poryet nyewo om pesyet nyepo Yiyintet nyepo kamukeywek tokol. 15“Alim pa! Aconi ani kuyu corin! Ŋerekat cito nye pure kukösu oŋnkulakat sirokyi, sukuŋet monte kot kuwesetot pöc oŋnkolilan om wule mite piko!’’ 16Yoto koruruc oyik kinkonik korurukyi otepto nye cekure om ŋelyeptap Puraniyek, “Arimuketon’’ 17Yoto kuwasta malayket nyepo tisap pokulit nyenyi kuwosyi parak, kucone kutit nyewo ŋeceret nye mite kotap Yiyintet orit kumwowu kule, “Kakyiy!’’ 18Yoto kowec ilotik, oŋnkorum, oŋnkutul, oŋnkoriŋriŋ koret koromun, nye kitompo kot koriŋriŋ koret kuyunyoto kuceke ye kitany Yiyintet cito. Koriŋriŋet nyitenyi nye miyat kupël tokol! 19Kukerer moŋet nyewo kupciwunekey somok, kyaranta moŋosyek cepo piko cepo yemosyek alak. Kusot Yiyintet moŋetap Papulon nyewo, yoto kukoci kuye komek cepo cikompet nyepo nerekwekyi ce caŋ. 20Kupotyo korosyek tokol co kikwen peko, oŋnkupotyo tulonok tokol. 21Kosowune torot koyantet nye nyikis nye kipuntoy akenke kilonok konom kosuci piko. Kunyer kucup piko Yiyintet om toŋoŋutek cepo koyantet omnye kikoyantet nyoto nye miyat koromun.

will be added

X\