Revelation 14

1Yoto akäs ani Lekwap Kecir nye keyoŋe tulwetap Siyon parak. Kupontokey piko elifunek pokol akenke ok artam ok amwan ce kicesil kaynenyi oko nyepo kwan tokoywekap picoto tokol. 2Alim kutit nye cone torot nye kerkey oko karumnta nyepo peko cepo kasururtit oko karumnta nyepo ilet nye wece. Kikerkey polotet nye kyalim oko tumnto nyepo piko ce pire kirancinekwa. 3Kuyoŋ piko co elifunek pokol akenke ok artam ok amwan taytap ŋeceretap poytoyisyet oko tyoŋik amwan ce soptos oko poyik. Kutume tumnto nyelel nye memuce konetkey tumoto piko alake, tume pate cekto co elifunek pokol akenke ok artam ok amwan co kicirarac kukwane koret. 4Picoto kuce kipuryo kot kowurtakey kwiy sakwayanat oko koruk, ce kiripkey kutililitu ce menket moron. Coto kuce rupoti pate Lekwap Kecir om wulyo tokol wule kowo. Coto kuce kikyal kicisop om wule mite piko kwek kupuswek cepo tayta cepo Yiyintet oko Lekwap Kecir. 5Kitompo kot kuŋalal cekto kenyis mwiynan om kutuwakwa, ce moponto kenyis lelis. 6Yoto akäs ani malayket ake yec nye terertoy om torot, kuponto lokoywek ce toponec ce mopoku ce möce kule omwoci piko cepo koret, piko, orosyek punonik, ŋelyepik, oko yemosyek. 7Kukurto om kutit nyewo kule, “Aywey Yiyintet oŋnkokaste woyinto nyenyi! Omnye kopunto sawet kumut musankut. Osay neto nye kitany torot oko ŋony, ruretyet oko wule kosune peko!’’ 8Kuco kurup malayket nyepo oyeny malayket nyepo tayta, kumwowu kule, “Kalul! Kalul! Papulon nyewo! Nye kikoci yemosyek tokol kuye komek cepo mwonet nyepo sakwayanatet nyenyi!’’ 9Kurup malayket nyepo somok cut oyeny co kopo tay oŋnkupol kumwoy kule, “Ci ake tokol nye kasay tyonynto oko kerkeyinto nyenyi oŋnkucäm cikoci pelutyet tokoynyi nto yewunyi, 10kunye mosukuye neto nyoto nkit komek cepo nerekwekap Yiyintet, ce koroŋnkyi cikompet nyepo nerekwekap Yiyintet ce mocetose peko. Kunye mosicitaŋanye nyoto mata oko rwontok ce loytos sulpur om taytap malaykanik ce tililec oko taytap Lekwap Kecir. 11Mosukutusken kuweti parak yetit nye toŋonye cekto kenyis okoy kenyis. Picoto kuco kisoye tyonynto oko kerkeyinto nyenyi oŋnkyikoci pelutyet nyepo tyonyoto, ce puryo kot komunye pet oko komoy.’’ 12Mwowu ŋalecu kule kumuytoci pikap Yiyintet, coto kuco yweye ntarastinekap Yiyintet oŋnkuyene cekto Yesu. 13Yoto alim ani kutit nye cone torot nye mwowu kule, “Sil ŋalecu; ŋerekotin kuponto kupeyoy kuceke yawut piko co poku kuponto Mokoryontet.’’ Komwoy Muyet Nyetilil kule, “Po manta! Ŋerekotin cekto mosukuŋerec om komuŋnto nyepo toŋoŋutekwa, omnye mosukurup yisyet nye kikwiy kupetakey cekto.’’ 14Yoto akäs ani okoy akäs polyet nyelel oko tyony nye kerkey cito nye kepure polyet, oŋnkuponto om metinyi kutwet nyepo Saput, oŋnkuponto mukotiyet nye ŋatip om yewunyi. 15Kucone malayket ake kotap Yiyintet oŋnkukurci kumwoci om kutit nyewo kumwoci nye kepure polyet kule, “Yiyisye mukotiyeŋuŋ kisisye omnye kopunto pesyosyek korur koret möce kisisye!’’ 16Yoto kuwec malayket nyo kepure polyet mukotiyet kutokyi koret. Cekis yoto cepo koret. 17Kucone yoto kotap Yiyintet om torot malayket ake yec, kiponto mpo nyoto mukotiyet nye ŋatip. 18Kuco yec malayket nye cone otepto nyetilil, nyoto kunye ponto kamukeywek nye poytoy mata, oŋnkukurci om kutit nyewo malayket nyo ponto mukotiyet nye ŋatip kule, “Yiyisye mukotiyet nyeŋuŋ, yep matuntanik cepo sapipunek cepo koret omnye koruryo Sapipunek!’’ 19Yoto kuwec malayket mukotiyet nyenyi kutokyi koret, oŋnkuyep matuntanik cepo Sapipunek, oŋnkuwirci wule mite kito nye rurunye, nye nerekwekap Yiyintet. 20Yoto ciruruny matuntanik cepo Sapipunek om kito nye cirurunye om saŋntap moŋet. Kukwane korotik kito nye cirurunye omik cepo Sapipunek ce kipuntoy koyinto nyepo kilomitanik pokolwokik somok, oŋnkupunto mitanik pokolwokik oyeny kuwo ŋony.

will be added

X\