Revelation 13

1Yoto akäs ani tyonynto nye loŋune ruretyet nye kiponto kuynok taman oko metewok tisap. Kiponto kutonok ce kimite kuynok. Kimite kuynocoto kuynok alak ce miyotec ce kicesil cepo morisyo. 2Tyonynto nye kyakäs ani kunye kikerkey oko melilyo. Kukerkey kerenkok cepo tyonynto nye cekure tuput, oŋnkukerkey metit nyepo ŋetunynto. Kukoci Cesosum tyonynto kamukeywek ce caŋ oko ŋecerenyi nyepo poytoyisyet. 3Yoto Kukerkeyit nye ponto mwayet nyewo nye miyat nye mite metit ake nyepo tyonynto, ntene oŋnkisop mwayet nyoto miyat. Kukite koret tokol tyonyoto, oŋnkulimnci. 4Kusay ci tokol Cesosum omnye kikoci kamukeywekyi tyonyoto. Kusay cekto tyonynto oŋnkutep kimwoy kule, “Ŋo nye kerkey oko tyonynto? Ŋo nye muce kuporye neto?’’ 5Yoto kyasta tyonyoto kuŋalal ŋalek ce miyotec cepo morisyo kucup Yiyintet, oŋnkyikoci kamukeywek kuwany orok artam ok oyeny. 6Kuŋany kutit oŋnkucec kucup Yiyintet oŋnkumor kaynenyi oko otepto wule minye, oko piko tokol ce minye torot. 7Kicecömnci mpo kuporye pikap Yiyintet okoy kupël, oŋnkyikoci kamukeywek kupayta piko cepo yemosyek tokol, oko arosyek tokol, oko ŋelyepik tokol. 8Mosukusay piko tokol ce minye koret tyonyoto, tos pate piko co silotin kaynokwa kitaput nyepo soponto nyepo Lekwap Kecir. Kaynocoto kuce kicesil kuceke ye kicitany koret. 9“Kunyo nye ponto yitik kumisyini Kulimnta! 10Co kicemöce kule mosicenäm oŋnkyiwu kuce mosicenäm kuyunyoto. Nto co kicemöce kule mocepare rotwetap cok kuce mosicepare rotwetap cok kuyunyoto. Kunyo möce kule kumuytoci oŋnkuyene pikap Yiyintet om ŋalecutecu.’’ 11Yoto akäs ani tyonynto ake nye kicone ŋony. Kiponto kuynok oyeny ce kerkey cepo menkit keciryet oŋnkuŋalole kuyu Cesosum. 12Kiponto nyoto kamukeywek ce caŋ cepo tyonynto nyo kipo tayta, kwiyisye yoto kamukeywek coto om tayta tyonynto nyin. Kuker koŋ om koret tokol oko tukuk tokol ce mite orit kule kusay tyonynto nyo kiponto mamitet nye miyat nyepo mwayet nye kisop. 13Kwiy tyonynto nyoto po oyeny cepo kakitat ce woyec okoy kucone mata torot kuco ŋony om taytap piko tokol. 14Kuperper yoto piko tokol ce minye koret kwiyisye tukuk cepo kakitat ce kicecömnci kwiy kuköse tyonynto nyepo tayta. Kumwoci tyonynto piko tokol cepo koret kwiy kerkeyinto nye ciyweye tyonynto nyo kicepore rotwetap cok oŋnkurok kusope. 15Cecömnci tyonynto nyepo oyeny komuŋnkyi soponto kukerkeyit nyepo tyonynto nyepo tayta, okoy komuc kuŋalal kerkeyinto oŋnkupakäc piko tokol ce puryo kot kusoye kerkeyinto. 16Kusimnci kukerci koŋ tyonyoto piko tokol, ce minkec, oko cewoyec, oko ce mokoren, oko ce ponon, ce mutwor, oko ce momutwor, cikoci cekto pelutyet nye kocikoci yewuniyek cepo tay nto tokoywek cikwa. 17Kuyete ci ake tokol kwolyoyis nto kwolis kiy ake tokol, tos pate ci nyo kicikoci pelutyet, nyoto kunye kaynet nto nampetap kaynetap tyonyoto. 18Möce ŋalecu ŋomnonet om yuteyu, möce cito nye ponto ŋomnonet kunket Nampet nyepo tyonynto, omnye nampet nyitenyi kunye po cito. Nampet nyoto kunye po pokolwokik lö ok tomonwokik lö ok lö

will be added

X\