Revelation 12

1Kutok yoto om torot pelutyet nyewo nyepo kakitat. Kutok korko nye kilac Asista, oko arawet nye katyike kerenkokyi, oŋnkulac om metinyi kutwet nye ponto kokelik taman ok oyeny. 2Kikoyat lekwenyi, kurir om mwoninto nyepo lekwet nye kimöce kucämnkey. 3Kutok yec pelutyet ake om torot. Om yoto kutok Cesosum nyewo koromun nye kyarra nye kiponto metewok tisap, oko kuynok taman oko kutonok tisap om metinyi. 4Kwiyisye saruryenyi kopukto kokelik cepo torot cepo kereryantet akenke om somok kupa koret ŋony. Yoto kuyoŋe Cesosum taytap korket nyo kikirik kucämnkey kule saŋet ayam pakenke lekwet ye koceyi. 5Kuyi korkonoto lekwet werit nye mosukupayta yemosyek tokol kwiyisye kipoket nyepo karnet. Ntene cesar lekwet cesut kuwo wule mite Yiyintet wule mite ŋecerenyi nyepo poytoyisyet. 6Kumwey korkonoto okoy kitela wule kikwiytoci Yiyintet kule muce ceripune kuwany pesyosyek elifut akenke ok pokolwokik oyeny ok tomonwokik lö. 7Yoto kucec poryet om torot, kuporye Mikael oko malaykanikyi tyonynto Cesosum nyewo, kutitir kuporye Cesosum oko malaykanikyi. 8Ntene cipël Cesosum okoy komo kuponto oko malaykanikyi otepto om torot. 9Cewir Cesosum nyewo kuco ŋony, nyoto ku Erenet nyepo keny nye cekure Setanit nyewo nyepo oyik nyo kiperper koret. Cewir kuco ŋony kupontokey oko malaykanikyi tokol. 10Yoto alim ani polotet nyewo nye cone torot nye mwowu kule, “Kaco yawut kasopotet nyepo Yiyintet, kakupor yawut Yiyintet kamukeywekyi kuyu Kinko! Kakupor yawut Ŋapanenyi kamukeywekyi! Omnye kacewir kuco ŋony neto nyo wosontyi pet oko komoy mpo yeyanyo om wule mite Yiyintet. 11Kwepëlis mpo yeyanyo kupël neto om korotikap Lekwetap Keciryet oko om ŋalek cepo manta ce kimwoy oŋnkucämnta kukoyto soponwekwa kupok. 12Kunyo ŋerec nyi wuli po torot oko tukuk tokol ce mite orit! Ntene mite kwapi koromun koret oko ruretyet! Omnye kacontyok Setani nyewo nyepo oyik kuponto nerekwek ce caŋ, omnye nkete kule oponte pesyosyek ce ŋeri pate ce koŋet.’’ 13Nteyu kowo konket Cesosum kule kacewirco koret ŋony, yoto kucec kurup kuceny korket nyo koyiye lekwet werit. 14Ntene cikoci korkonoto kepepok oyeny cepo ploŋoniyet nyewo sukuŋet kutererta kuwo otepto nyenyi om kitela wule mowoceripune kuwany kenyisyek somok ok orok lö wule memuce kunyor Cesosum. 15Yoto kuwosune Cesosum kutinyi mukutyantet nyepo peko ce caŋ korupe korkonoto kule kusut. 16Ntene kuco koret cokusor korkonoto, kuŋany kutit nyenyi oŋnkuye peko co kowosune Cesosum kutinyi. 17Kunyerci Cesosum korkonoto, kunomen kuwo wokuporye kesenisyekap korkonoto cut alak oko piko tokol ce rupe ntarastinekap Yiyintet, ntene kukwilokis om koyenet nye kiporci Yesu Kristo. 18Kuyoŋe Cesosum ruretyet tapan.

will be added

X\