Revelation 11

1Cekono yoto korokto nye kerkey tekantet nye cepimonisye oŋnkyemwowo kule, “Ŋet wepiman kotap Yiyintet oko otepto nye cepele korosek oŋnkiyit piko ce soye orit. 2Ntene yaste mente apiman tekewut om saŋntap kotap Yiyintet, omnye kicikoci wuloto lamek ce mosukutyikta cekto moŋet Nyetilil kuwany orok artam ok oyeny. 3Mosoyoku ani muncururwanikwani oyeny. Mosukulac sirok sarkatinek oŋnkumwayta lokoywekap Yiyintet kuwany pesyosyek elifut akenke oko pokolwokik oyeny ok tomonwokik lö.’’ 4Piko muncururwanik coto oyeny, ku ketik Seituninek oyeny oko sokotik oyeny cepo tarinek ce yoŋe taytap Mokoryontet nyepo koret. 5Ye kasyem citake kule awurte cekto, mosukucone mata kutuwakwa oŋnkwaranta punik cikwa. Mosukupakäc kuyunyoto ci tokol nye kasyem kule awurte apakäc cekto. 6Ponto picoto kamukeywek ce muce kuker koret parak nye memuce kot kuropen ropta om pesyosyek ce cemwoytoy lokoywekap Yiyintet. OŊnkuponto yec kamukeywek ce muce kuwec peko kwek korotik, oŋnkukoci kunäm koret porwonik wok alake tokol ye komöce cekto. 7Nteye kakuwany cekto kumwayta lokoywek, mosukuco tyonynto nye cone mwenet nye moponto ye ŋete oŋnkuporye cekto, mosukupël tyonyoto cekto oŋnkupakäc kupok. 8Mosukuseretyi muswek cikwa orustunwekap moŋet nyewo wule kicewuyitocine Mokoryontemwa murtowontet. Kaynet nyepo moŋonoto kuyu tyonkoc ku Sotom nto Misiri. 9Mosukukäs piko cekwone yemosyek, pororyosyek, ŋelyepik oko piko tokol muswek cepo picoto kuwany pesyosyek somok ok kwenut, oŋnkupuryo kot kucöme kule cemuy muswecoto. 10Mosukuŋerec piko cepo koret omnye kopok picoto oyenku. Mosukwam sakwet oŋnkukocinkey kokotutek, omnye kitaŋany koromun workoyik cutecu oyenku piko cepo koret. 11Nto om letutap pesyosyek somok ok kwenut, mosukuco soponto nye cone wule mite Yiyintet oŋnkuco kowut porwonicoto, yoto kuŋetyo kuyoŋ, kunyo kupotpotenis piko ce kiköse picoto. 12Kulim workoyik coto oyenku kutit nyewo nye cone torot nye komwoci kule, “Akwa torot yu!’’ Kupa cekto torot kupete polyet kuköse punik cikwa. 13Pakenke yoto kuriŋriŋ koret, okoy kuturpup kwaran kereryantet nyepo akenke om taman nyepo moŋet oŋnkupok piko elifunek tisapu ce kipakäc koriŋriŋetap koret. Kumuyo kupotpotenis piko ce koŋet oŋnkukasta woyinto nyepo Yiyintet nyepo torot. 14Kutil yawut taŋanynta nyepo oyeny, ntene käs pa! Mosukuco lakwar taŋanynta nyepo somok. 15Yoto kukut malayket nyepo tisap kontit nyenyi, celim polotet om torot nye mwowu kule, “Kupoyit yawut poytoyisyet nyepo koret Mokoryontet oko Ŋapanenyi, kunyo mosukupoytoyis okokoy okoy okokoy!’’ 16Yoto poyik co tiptem ok amwan co pure ŋecerokwa cepo poytoyisyet om taytap Yiyintet, 17Kukutuny oŋnkusay Yiyintet kumwoy kule, “Cikostiŋ acek, Mokoryontet Yiyintet nyepo kamukeywek tokol, nye kimite oŋnkumite yawut! Omnye yiyisyi swamet nyeŋuŋ nyewo. Kunyi kecec poytoyisye! 18Kinerekis kinyer koromun piko cepo yemosyek, omnye kopunto pesyet kuco nyerunoteŋuŋ, oŋnkumutyi musankut piko co kipok, kopunto pesyet ceyokyi cikoci musyaret mutworikuk workoyik oko pikuk tokol, oko piko cewoyec oko ce minkec ceyweye kayneŋuŋ. Kopunte pesyet kyaranta co orontoy koret.’’ 19Yoto ceyat kotap Yiyintet om torot, kutok santukut nye cekonore kirotyet om kotap Yiyintet orit. Kowec yoto kaweket, oko karumnta, oko ilotik, oko koriŋriŋet, oko ropta nyewo nyepo koyantet.

will be added

X\