Revelation 10

1Yoto akäs ani malayket ake yec nyepo swamet kureku kucone torot, kikilac polyet oko cekwalasyet nye komut metinyi. Kikerkey metit nyenyi oko Asista, kukerkey kerenkokyi oko tolocik cepo mata. 2Kiponto om yewunyi kitaput nye miniŋ nye tyakat nye silot. Kikoci kuyoŋe kerenkenyi nyepo tay ruretyet, kuyoŋe nyepo let koret. 3Kutul kukurto om kutit nyewo nye ciye kuyu ŋetuny nye kotul. Nteyu kowo kukurto kuyunyoto, yoto kuyentyi kutul ilotik tisapu. 4Nteyu kowo kutul ilotik, amäc ani kule osil. Ntene alim kutit nye kaŋalal kucone torot kumwowo kule, “Rip kuwoŋokis, mente kot osil ŋalek co komwoy ilotik tisapu.’’ 5Yoto malayket nyo koköse kukeyoŋe ruretyet oko koret kunömnci yewunyi nyepo tay torot, 6oŋnkuwal Yiyintet nye sope okokoy nye kitany torot oko tukuk ce mite orit, oŋnkutany ruretyet oko tukuk tokol ce mite orit, kumwoy kule, “Komo kumite yec kule cililennkey! 7Ntene ye kakut malayket nyepo tisap kontit nyenyi, yoto ye mosukoyitita Yiyintet yisyenyi nye wuŋat nye kiyiyta kuyu wulo kimwoci mutworikyi workoyik.’’ 8Yoto kuŋololwo yec kutit nye kyalim kucone torot kumwoy kule, “Iwo wenumu kitaput nye tyakat nyo mite yewutap malayket nyo katyic kerenket ake ruretyet, kutyic ake koret.’’ 9Awo ani wule mite malayket oŋnkosom kukono kitaput. Kumwowo yoto kule, “Oŋyi yam, mosukumwanit kat om moyeŋuŋ, ntene mosukwanyinyit om kutiŋuŋ kuyu kumnyatet.’’ 10Onumu ani kitaput nye kimite yewutap malayket oŋnkayam, kwanyinyit kuyu kumnyatet om kutimwani, ntene yu kawoluŋuyi kumwanit kat om moyet orit. 11Cemwowo ani kule, “Misyini mwayte lokoywekap Yiyintet ce nöme yemosyek, oko piko oko ŋelyepik oko kinkonik.’’

will be added

X\