Revelation 1

1Ŋalecu kuce ŋoŋutokap Yesu Kristo ce kikoci Yiyintet sukuŋet nyo kuŋoŋnkyi kuporci mutworikyi tukuk ce mosukwiyokis lakwar. Kimwoy Yesu ŋalecu omnye kiyok malaykenyi kuco wule mite mutworintenyi Yowana. 2Yowana kunye mwowu ŋalek tokol ce kikäs. Ŋalecutecu kuce po manta ce nöme lokoywek ce kwone wule mite Yiyintet oko ŋalek cepo manta ce kiŋoŋ kupor Yesu Kristo. 3Ponto kupeyoy nye sumone ŋalecu po workoyontini oŋnkuponto kupeyoy co lime oŋnkurup ŋalek ce mite kitapuni, omnye karik pesyet nye yitite ŋalecu. 4Ani Yowana nye osilyini lukosyek tisap cepo co kikoyen ce mite koretap Asia. Kwek cikwok poypoyet oko kalyet ce kwone wule mite neto nye mite, oŋnku nye kimite, oŋnku nye mosukuco, oŋnku kwone wule mite mukuleywek tisapu ce mite ŋeceratap poytoyisyet om taytap Yiyintet. 5Oŋnkukwone wule mite Yesu Kristo, nye muncururwet nyepo manta, oŋnku nye kipoyit tayta kotutune met, oŋnku nye poytoy kinkonik cepo koret. Kristo kunye kicämec oŋnkutyacec cekwane wule mite miyotyonik kyacek om korotikyi. 6Kunyo kikonec ciku poytoyik ce tisik cepo Yiyintet Papanyi. Kopurune woyinto oko swamet wule mite Yesu Kristo okokoy okoy okokoy! Yunyoto. 7Akäs, mite kucontoykey polyok! Mosukukäs ci tokol neto oŋnkukäs mpo piko tokol co kipore neto ŋotit. Mosukumesyo kurire piko tokol neto. Kunyo Kuyuyit nyoto! Yunyoto. 8Mwowu Mokoryontet nyepo kamukeywek tokol kule, “Oyiku ani nyepo tayta (omeka) oŋnkoyiku nyepo letut,’’ (olufa) nye mite oŋnku nye kimite, oŋnku nye mosukuco. 9Ani nyo yeyamwoŋ Yowana nye ceyemntoy oko akwek toŋoŋutek oko muytocinotet nyo nyoru co po poytoyisyenyi nyewo om Kristo Yesu. Kyomite ani koret nye kikwen peko nyepo Patmo omnye kikyamwayte wuloto ŋolyontetap Yiyintet nyepo manta nye kuŋoŋ kopur Yesu. 10Ye kipesyetap Mokoryontet kowuto anyoru ani swametap Muyetap Mokoryontet, yoto alim om pataymwani kutit nyewo nye kerkey kontit. 11Nye kimwoy kule, “Silyi kitaput tukuk ce kekäs nyi, oŋnkikoyite kitaput kuwo wule mite luket nyepo piko co kikoyen cepo moŋosyecu tisap: Efeso, Simurna, Perkamani, Siyatira, Sortes, Filatelfia oko Laotikea.’’ 12Yoto owekyikey ani kule akäs cito nye kiŋololwo, akäs sokotik tisap cepo Sapunek ce yoŋe tarinek. 13Nto om kwenutap sokoticoto, kimite cito nye kerkey Weritap Cito nye kelac siret nye puntoy kerenkok, oŋnkurate teket nyenyi porowet nyepo Saput. 14Kilel metit nyenyi kuyu siret nyelel piw. Kukerkey konyek ceci oko mata nye rekitite. 15Kukerkey kerenkok ceci oko tayet nye kiciloci mata oŋnkyesit kulecec. Kikerkey polotet nyenyi oko karumnta nyepo peko ce caŋ ce sururtoy. 16Kunäme yewunyi nyepo tay kokelik tisap, kucone kutit nyenyi rotwetap cok nye ŋatip koromun. Oŋnkulelit tokoyta nyenyi kuyu asista nyepo pet kwen. 17Nteye kotoköse ani neto; yoto oputyi yepo kerenkokyi kuyunye kamey. Ntene kunämena yewunyi nyepo tay oŋnkumwoy kule, “Mente omuyi! Oyiku ani nyepo tayta oŋnko yiku nyepo letut. 18Oyiku nye sopot! Kikyamey, ntene käs pa oyiku sopot kenyis okoy kenyis. Oponte kamukeywek cepo met oko kapkompic. 19Kunyo sil yawut tukuk ce kwekäs, ce mite kwiyoktos yawut oko ce mosukutok om letut. 20Kito nye wuŋat nye poru kokelik tisapu ce köse nyi ce mite yewumwani nyepo tay, oko sokotik tisap cepo Sapunek ce yoŋe tarinek kucu kule; Kokelik tisap kuce malaykanik tisap cepo lukosyek cepo pikap Yiyintet tisap. Nto sokotik tisap cepo Sapunek ce yoŋe tarinek, kuce lukosyek tisap cepo pikap Yiyintet.’’

will be added

X\