Philippians 4

1Kunyo mpo yeya, ocömok ani akwek koromun, oŋnkomöce kule nto akäsak. Oŋereco ani akwek koromun, kunyo oyiku pelutyet nyimwani nye poru yisyet nyimwani. Mpo yeya, möce oyiyisye topon om soponwekwok om wule mite Mokoryontet. 2Osomok ani akwek Ewotia oko Suntike kule roke asat oŋnkocomncine ŋalek cikwok kuyu pic ce tupco om Kristo. 3Mpenyi corwemwani nyepo manta nye kicintosi tukway, amöce ani kule kalye nyi koruco, omnye kiciyisye acek oko cekto yisyet nyewo koromun cemwayte lokoywek ce toponec wanak oko Klement, oko piko tokol ce kicesil kaynokwa kitaput nyepo soponto. 4Roke aŋerec akwek okokoy om soponwek cikwok om wule mite Mokoryontet. Kunyo otosyini omwowu kule, aŋerec! 5Oporci piko tokol kule oyiku akwek toloyec. Karik kuco Mokoryontet. 6Monte cisot kiy ake tokol, ntene om somutek cikwok tokol ye omite osome Yiyintet kiy ake tokol nye omöce, kumöce osome okokoy om mukuleyto nye kostoyisyi. 7Mosukurip kalyet nyepo Yiyintet mukuleywekwok oko kasoteywekwok om Yesu Kristo. Kalyet nyoto kunye puryo kot komuce kunket kasoteywek cepo piko. 8Mpo yeya, ŋalek cepo letut kucu, orip kasoteywek cikwok om ŋalek cepo manta, oko cepo sikonotet, oko ce rototin, oko ce tililec, oko ce toponec, oko cepo koyweyisyet. 9Oyiyisye ŋalek co kyolim oŋnkokäs akwek oyiye ani, oko konetisyet oko yisyonutek ce kyonket akwek om wule amite ani. Kunyo mosopurte akwek kalyet nyo konec acek Yiyintet. 10Oponte ani ŋerekwek ce caŋ koromun om soponto nyimwani, om wule mite Mokoryontet! Omnye om letutap pesyosyek ce caŋ, kwacec akwek yawut akalya ani. Puryo kot omwowu kule kikyotaya nye mokolyo, ntene omnye kipuryo kot oponte poroyinto. 11Oŋnkupuryo yec kot omwowu ani ŋalecu kuyunyi omnye asoti kule kicetaya, omnye kyanetkey wule opurtoy ani kwani nkit. 12Oŋnket wule mopurte ye moponte tukuk ce yeme oko ye oponte tukuk ce yeme. Kyanetkey ani ŋalecu sukuŋet amuc apur kuyu ci nye yemo kiy tokol, mpo ye koyomisye okoy opiyony nto mpo ye monoyomisye okoy opiyony, nto ye komokoren nto mpo ye kapanan. 13Amuci amukte wuyinto ake tokol om swamet nye kono ani Kristo. 14Ntene kyayiy akwek topon akalya ani om toŋoŋutekwani. 15Oŋnket akwek Filipik kule om pesyosyek co kipo tay yo kyomwoytoy ani lokoywek ce toponec yo kyocone Maketoniya kwakwek nkit om pikap Yiyintet ce kikalya kukono pesanik ce kyoyiyisye. 16Mpo ye kyomite Sesolonika, kyosutwo ani akwek yoto kokolyoyisyet nyepo pesanik aret oyeny. 17Puryo kot amöce kule anyoru kokotutek, ntene amöce pate kule akäs latik ce kotosyikey om wule omite akwek. 18Kunyo aponte ani yawut tukuk tokol ce yemo kusirte ce amöce. Kuyema topon yawut tukuk omnye kwonyoru kokotutekwok ce kwokonu akwek ce kusutu Epafrotito. Kerkey kokotutecu oko korosek ce poŋu topon ce puntoy wule mite Yiyintet oŋnkuŋerec neto. 19Kunyo Yiyintemwani om Mokoryontinyi nyewo koromun nye mosukukonok akwek tukuk tokol ce omöce kupunte wule mite Yesu Kristo. 20Kopurune Woyinto wule mite Papanyo Yiyintet okokoy oko okokoy - Yunyoto. 21Asupay pikap Yiyintet tokol ce kipoyit Yesu Kristo. Kesupayak akwek mpo yeya cepo wuli ce cepontekey oko ani. 22Kesupayak akwek pikap Yiyintet tokol ce mite wuli, ntene kupëlis piko ce mitowune kaytap Kinko nyewo. 23Kunyo opurte akwek tokol poypoyetap Mokoryontet Yesu Kristo.

will be added

X\