Philippians 3

1Kunyo mpo yeya, ŋalek ce owoŋnte ani kucu kule, kante kukonok Mokoryontet akwek ŋerekwek ce caŋ, Puryo kot kuyuye moketyikey ŋalek ce kyosil ikye, mosukutosyi kukalyak opur topon. 2Oripkey piko ce yiye ŋalek ce miyotec, ŋokica kuce piko ce simncini kule cewon porto nyepo saŋ. 3Omnye ciku acek piko ce kicewonec wonset nyepo manta, omnye cesoye Yiyintet om swamet nyepo Muyet Nyetilil oŋnkyesilekey pate soponto nye ceponte om Kristo. Puryo kot cikenekey acek mpo kisic wonset oko sokwonutek. 4Ye kekenekey piko wonset oko sokwonutek, oŋnkusot kule cimuce cisopec ye karup ntarastinecutecu, kuporukey kule opëli ani cekto om ŋalecutecu. 5Omnye kicewona ani ye kyoponte pesyosyek sisit pate, oyiku Isroloyin sikwo, nyepo kotap Penyamin, oyiku Puraniyantet sikwo. Oyiku Farasayantet nyepo manta kuyu wulo ceriptoy ntarastinek. 6Kunyo kyoyiku nyikan koromun nye kyotoŋonyi pikap Yiyintet. Kyoyiku ci nyepo manta nye kipuryo kot oponte lelis omnye kyoripe ntarastinek tokol. 7Ntene osute ani yawut tukuco tokol kuyu tukun ce puryo kot kuponto latik omnye kyoyentyi Kristo. 8Puryo kot ku tukuk ceyucoto pate, ntene asute kule puryo kot kuponto latik tukuk alake tokol, nye pëlisyi pate kuye konket Yesu Kristo Mokoryontenyu. Kyawirte tukuk oko toponiyet nye ponto tukucoto tokol. Kyosut kukerkeyitu tukuk tokol tutwek sukuŋet onyoru Kristo. 9Oŋnkoyomekey ani oko neto ciku akenke. Kunyo kimo oponte yec toponiyet nye nyimwani nkit nye kerkey oko nyo cenyoru ye cerupe ntarastinek. Oponte ani yawut toponiyet nyepo manta nye cekonu kupunune koyenet om Kristo. Toponiyet nyoto kunye cone wule mite Yiyintet nye ciyoyeke koyenet. 10Ŋolyontet nye amocë ani pate ku kule oŋnket Kristo oŋnkonket swamet nyepo kotutunetap met nyenyi, oŋnkyeyemnte tukway toŋoŋutek ceci oŋnkakerkeyitukey ani oko neto om met nyenyi. 11Oŋnketi mpo kule mosiciŋeta otutune met oŋnkonyoru soponto. 12Puryo mpo kot osutekey ani kule kwayitite ŋalecu tokol, nto mpo kule kyonyolu owoŋnkyi. Ntene amite otosyinikey asyeme kule anyoru ŋalecu omnye kisuto keny Kristo oyiku nyenyi. 13Mpo yeya, oŋnket kule tompo kot opunte wule mite ŋalecu, ntene ŋolyontet nye oyiye kunyi, amöce ayutye ŋalek ce kyopokokyi let oŋnkasyem oyiyisye sukuŋet anyoru tukuk ce mite tay. 14Kunyo amite olopoti otokyinikey aret nyoto saŋet apëlisye anyoru kokotutyet nyepo soponto nyepo torot nyo konu Yiyintet kupunune wule mite Yesu Kristo. 15Möce cisoti kuyunyitenyi acek co kicenerye ciku Kristayek. Ntene ye ponto piko alake om akwek kasoteywek ce pciyotin, mosukuporwok akwek Yiyintet topon. 16Kunyo nka kot kuyunyoto, kuroke cetosyikey cipe tay cerupe ntarastinek cetecu kicerup acek kuceke keny okoy kunyi. 17Mpo yeya, asyem akwek tokol opur kuyu wule ayunte ani. Kiciporwok aret nyepo manta, kunyo möce olimnci piko co rupe aret nyo kiciporwok. 18Kwomwowok ani akwek ŋalecutecu aret ce caŋ, kunyo otosyini omwowok aponte lokik. Mite piko ce caŋ ce kokopur kopurto nye miyat kwek punik cepo murtowontet nye kimeci Kristo. 19Kunyo mosukowoŋnkyi picoto kwaranta soponwek cikwa om wule mite mata nye momise. Omnye soye picoto corokyinotet nyepo porwonik cikwa. Silekey cek tukuk ce kotosutyini kolilonis. Sote cekto pate tukuk cepo koroni. 20Ntene ciku acek piko cepo koret nyepo torot. Kunyo cemite cekeni Mokoryontet Yesu Kristo nye mosukucone torot cokusopec. 21Mosukuwec neto porwonikyacek ce kuskus kukerkeyitu oko porto nyenyi nye ponto woyinto. Mosukwiy neto ŋalecu tokol om swamet nye yiyisye ye wece tukuk tokol cepo koret.

will be added

X\