Philippians 1

1Cone parwani wule ce mite acek Paulo oko Timosewo mutworikap Yesu Kristo. Cesilwok akwek pikap Yiyintet tokol ce kikoyomokey oko Yesu Kristo ce mite Filipi, wanak oko kantoyikwok kosik oko kokolyoyikwok. 2Kante kukonok akwek Yiyintet Papa oko Mokoryontet Yesu Kristo poypoyet oko kalyet. 3Okostoy ani Yiyintenyu okokoy om pesyo ake tokol ye kasotak akwek. 4Nteye osome osomwok akwek tokol om ŋerekwek. 5Omnye kwakalya ani akwek om yisyet nye cemwoyoyt lokoywek ce toponec kuceke pesyet nyo kipo tay okoy yewut pesyoni. 6Kunyo aŋnket ani kupoyit manta kule Yiyintet nyo kinyosye yisyenyi om wule omite akwek kunye mosukutosyi yisyenyi kuwo tay okoy kupunto ye pesyetap Yesu Kristo. 7Omite akwek mukuleymwani orit! Kunyo ŋolyo nye porukey topon ye kasot kuyunyoto om wule omite akwek. Omnye kukyiyisye tokol topon yisyoni kikono Yiyintet. Nka mpo yawut amite mopusi oko mpo ye oyiku tyakat yo oporye oyete kule kukwilokis lokoywek ce toponec. 8Yiyintet nkit kunye nkete kule omwowok ani ŋalek cepo manta ye komwowu kule cömisyet nyewo nye oponte ani om wule omite akwek; kunye cone mukuleytap Yesu Kristo nkit. 9Osomwok kule, roke kutosyikey kuner okokoy cömisyet oŋkuwoyit ŋomnonet oko kasoteywek cepo manta. 10Sukuŋet amuc akwek kot akwey ŋalek cepo manta cepëlisyi, sotililitu nye moponte lelis ye kopunto pesyet nyepo Kristo. 11Oŋnkunyor soponwek cikwok ŋalek cepo manta ce konu Yesu Kristo nkit om woyinto oko kakastayetap Yiyintet. 12Mpo yeya, amöce kule oŋnket akwek kule ŋalek ce kukwiyokis om wule amite ani kuce kwekoci kutosyikey lokoywek ce toponec. 13Kunyo kukunket kupoyit manta piko tokol ce ripo ani om kaytap kinko nyewo oko piko tokol ce mite wuli, kule amite ani mopusi omnye oyiku mutworintetap Kristo. 14Rotisyet nyi amite ani kunye kwekoci kukwilokis mpo yeya ce caŋ om wule mite Mokoryontet, kunyo kutosyikey cek kunyor nyikanatet nye puryo kot kumuytos ye mwoytoy lokoywek cepo Yiyintet. 15Ntene mwoytoy piko alake om cekto ŋalek cepo Kristo om corokyinot oko nyekernatet, kumwoytoy piko alak ŋalekyi om toponiyet. 16Yiye picoto kuyunyoto om cömisyet nye ponto om wule amite ani, omnye kikonket kule kikono ani Yiyintet yisyet nye oporye oyetyecini lokoywek ce toponec. 17Nto piko alak kuce puryo kot kumwoytoy ŋalekap Kristo kupoyit manta, ntene mwoytoy pate om mukuleywek cepo corokyinot. Sote cek kule cimuci cesutwo ani wuyinto ye tomite mopusi. 18Puryo kot ku ŋolyo nyewo! Oyiku ŋerekat kuyu wulo cimuce cemwayta ŋalekap Kristo om aret ake tokol nye mukoktos, nka ye kacemwayta om aret nye topon nto om aret nye miyat. Kunyo mosotosyikey ani aŋerec, 19omnye oŋnketi kule mosicityakta om letut om somotet nye osome akwek oko kokolyoyisyet nye cone wule mite Muyet Nyetilil nyepo Yesu Kristo. 20Ŋoloyontet nye amöce koromun om mukuleymwani oŋnkokeni kunyi kule, puryo kot oyostoy yisyenyu. Om pesyosyek tokol, nka mpo pantanyi mosonyoru titiret nyewo koromun, sukuŋet soponto nyimwani tokol osutu koyweyisyet om wule mite Yesu Kristo, nka ye tosope nto ye kamey. 21Kristo kunye soponto om wule amite ani. 22Ntene ye kotosyikey ani tosop oŋnkyiy yisyet nye topon nyepo latik, kuporkey kule puryo mpo kot oŋnket kule oŋnkono yisyet nye topon nyepo manta nye makwey. 23Omnye nömo ani ŋalecutecu tukway. Amöce ani koromun kule nto kapakakte soponto nyi aponte oŋnkowo wopur oko Kristo, omnye kito nyoto nye topon nye pëlisyi. 24Ntene kito nye topon nye pëlisyi koromun om wule omite akwek kunyi kule, roke topur ani osope. 25Oŋnket ani kupoyit manta kule mosopur osope oŋnkyipurcine oko akwek tokol, sukuŋet kutosyikey ŋerekwekwok oko koyomotet. 26Kunyo ye kaco ani yec okoy wule omite akwek, mosonyoru ŋerekwek ce kosilekey om wule omite kuyu yeyamwoŋ om Yesu Kristo. 27Kunyo ŋolyontet nye pëlisyi yawut kunyi kule, roke kopurto nyepo soponwek cikwok oko nyepo piko alak kopur kuyu wule moktoy lokoywek ce toponec cepo Kristo, sukuŋet nka mpo ye kaco ani nto kopuryo kot aco, mosalim kule cokwilokisye oŋnkoponte soponto nyepo koyomotet nye kyoyiku akenke oŋnkoyiku luket nye tyikyini kiy akenke, nyoto ku koyenet nyepo lokoywek ce toponec. 28Monte ciywey punik cikwok, opurte nyikanatet okokoy, mosukupor kule opëlisyi akwek opël cekto, omnye Yiyintet kunye konok akwek opëlisye. 29Omnye kicekonok akwek kupeyok nye oyicini yisyet Kristo, ntene puryo kot omnye oyeni akwek neto pate, ntene möce ataŋany om kaynenyi. 30Kunyo ciyomekey oko ani om poryet. Cicitenyi kunyo kyolim akwek oporyecini ani ikye, kunyo to ku cicitenyi kunye tomite ani oporyecini kuyu wulo olime akwek.

will be added

X\