Matthew 9

1Kulany Yesu rapet kuketitakey kway tampayayet okoy kuponto moŋenyi. 2Kusutune piko alake kwiririt cito nye kipok kerenkok kuco wule mite Yesu. Ntowo kukäs neto koyenet nyewo nye kiponto picoto, kumwoci cito nye kipok kerenkok kule, “Werunyu titir! Kacikalyiŋ miyotyonikuk.’’ 3Yoto kaŋalal konetikap ntarastinek alake kwicek nkit kumwoy kule, “Ŋolole cici ŋal ce nyile Yiyintet!’’ 4Kunket Yesu ŋalek ce kisote cek oŋnkumwoci kule, “Omne sasoti akwek ŋalek ce miyotec ceyuco om mukuleywekwok? 5Oŋnkono nye lekit, cemwoy kule, ‘Kacikalyiŋ miyotyonikuk.’ Nto ye kocemwoy kule, ‘Ŋet wesetote’? 6Kunyo mosoporwok ani akwek ŋalek cepo manta kule, ponto Weritap cito kamukeywek kukalya miyotyonik om koret.’’ Yoto kumwoci Yesu cicoto kipok kerenkok kule, “Ŋete ŋony, oŋnkitor kwiririŋuŋ nomen iwo ka!’’ 7Kuŋet cicoto kuyo oŋnkunomen kuwo ka. 8Ntowo kukäs piko tokol ŋalecato, kumuyo cek oŋnkukasta Yiyintet nye kwekoci piko kamukeywek ceyucutecu. 9Kunomene Yesu yoto, nteye kimite kuweti kukäs neto korurunkintetap mosoret nye cekure kaynenyi Matayo nye kimite kukepur konyi nye cekweye mosoret. Kumwoci Yesu neto kule, “Nama cepetekey oko ani.’’ Kuŋet Matayo oŋnkunomen kunam kupetakey Yesu. 10Nteye kimite Yesu kwomisyi om kotap Matayo, yoto kukwa korurukikap mosoret ce caŋ oko piko co kicetay, kwokopur ŋony wanak oko neto oko konomikyi om yepo meset. 11Kukäs Farasayek yoto ŋalecato, kumwoci cek konomikap Yesu kule, “Omne sukwomis konetintemwoŋ oko pic ce korurukot cepo mosoro oko pic ce kicetay?’’ 12Kulim Yesu ŋalek ce kimwowu cekto, kuwekyi kumwoci kule, “Puryo kot kumöce piko ce sopcotin cepsakityantet, ntene piko ce mnyontos pate ce möce. 13Ntene ape wakäs poru ne silutyetap Yiyintet nyi mwowu kule, ‘Puryo kot omöce ani korosekap tyoŋik, ntene omöce poypoyet pate.’ Omnye kipuryo kot aco kule cokur kurenynkey piko co toponec, ntene kyaco kule sukuŋet kurenynkey piko co ponto miyotyonik.’’ 14Yoto kukwa konomikap Yowana wule mite Yesu oŋnkwokutep kumwoy kule, “Omne sicekire acek oko Farasayek omik om pesyosyek alak, oŋnkurok kupuryo kot kukire omik mpo kisic konomikukyi?’’ 15Kuwekyi Yesu kumwoci cek kule, “Osoti akwek kule muce kunerekis toyek ce coronutekap cito nyo kemütisyi ye tokupontokey cek cito nyo kemütisyi? Puryo kot kuyunyo! Ntene mosukupunto pesyosyek ce mosicinumune cekto cito nyo kemütisyi, yoto ye mosukukir cekto omik. 16“Puryo ci nye muce kunäm yokwontetap siret nyelel oŋnkunopci siret nye yoswak, omnye muce kupac siret nyelel nyo yoswaket kutok kuwoyit koŋnta. 17Oŋnkupuryo ci nye muce kuroŋnkyi finyonik ce mwonec wonkinek ce yoswak, omnye ye kakwiy kuyunyoto, komuce kotolis wonkinek oŋnkutumntokey kupa wuy finyonik oŋnkworon wonkinek. Ntene ceroŋnkyini finyonik ce mwonec wonkinek ce lelac sukopur topon.’’ 18Nteye kimite Yesu kumwocini cek ŋalecutecu, kuco poytoyintet ake nyepo kotapkok ye kimite Yesu, oŋnkukutuŋe yepo taynyi oŋnkumwoci kule, “Kotokume cepnyu pantanyi, ntene co nyi oŋnkikemer yewuŋuŋ mosukusop.’’ 19Yoto kuŋet Yesu oŋnkurup kupetakey cicoto. Kuwetokey neto konomikyi. 20Kimite yoto korket ake nye kimnyan kukwone korotik kuwany kenyisyek taman ok oyeny. Kucone korkonoto letutap Yesu oŋnkutwa kunäm tapantap siretap Yesu. 21Omnye kimwoy nkit om moyenyi kule, “Ye katway ani sirenyi pate, mososop.’’ 22Kuweckey Yesu kukäs let, yoto kukäs korkonoto oŋnkumwoci kule, “Cepnyu titir! Kokusopiŋ nyi koyeneŋuŋ.’’ Kusop korkonoto om yoto pakenke. 23Kuwo Yesu okoy kotap poytoyintet. Ntowo kukäs neto piko ce kikute kurerunekap rirek oko piko tokol ce kirirtos kwome mnyat, 24kumwoci kule, “Oŋetye opecikey saŋ! Puryo kot kume cepto koru pate!’’ Ntene kurorci picoto Yesu. 25Nteyu kowo cekwet piko tokol kukwa saŋ, kuwo Yesu ye kimite cepoto oŋnkunäm yewut, yoto kuŋet cepoto kuyo. 26Kutisto ŋalecutecu om koronoto tokol. 27Kunomen Yesu kuwete yoto, nteye kimite kuweti kurup piko oyenku ce koryotin neto ce kipole kumwowu kule, “Weritap Tauti! Rirenec kalyec acek!’’ 28Ntowo kuwo Yesu koto orit, kukwa pikey koryotin oyenku ye kimite neto. Kutepe Yesu cek kule, “Ocöme akwek kule omuci ani kot ayiy ŋolyontoni?’’ Kuwekyi cek kumwoci kule, “Mokoryontet, cecöme!’’ 29Yoto kunäm Yesu konyekwa oŋnkumwoci kule, “Kunyo kante kwiyokis om wule omite akwek kuyu wule yunto koyenemwoŋ.’’ 30Kusopco kuŋoŋokis konyekwa. Kunkolontyi Yesu kumwoci cek kule, “Monte cemwoci citake tokol ŋalecu!’’ 31Ntene kupa picoto kumwaytat kutisto ŋalek ce nöme Yesu om koronoto tokol. 32Nteye kimite kunomene picoto, kukwer piko alake wule mite Yesu cito nye solwo nye puryo kot kuŋolole omnye kiponto oyinot. 33Yoto pakenke yu kowo cekwetyi cicoto oyinot, kucec kuŋalal. Kokite ci ake tokol kumwoy kule, “Tompo kot cekäs kenyis ŋolyo nye yunyi om Israel!’’ 34Ntene kumwoy Farasayek kule, “Oyinot nyewo nyepo oyik nye kocini neto swamet sukuŋet kukwet oyik.’’ 35Yoto kuwo Yesu kupunte moŋosyek tokol oko soŋwek. Kunetisyote korikapkokwonikwa kumwoytoti lokoywek ce toponec cepo poytoyisyetap Yiyintet, oŋnkusop piko ce caŋ ce kimnyontos porwonik wok ce caŋ oko piko ce kisyen. 36Ntowo kukäs Yesu luket nyepo piko ce caŋ, kurire om mukuleynyi kukalya cek omnye kikimuyo kucoŋoŋenis pate kuyu kecir ce puryo kot kuponto mesewo. 37Yoto kumwoci neto konomikyi kule, “Cemosi yisyet nyepo kisisyet, ntene ŋeri pate piko ce mokukisis. 38Kunyo osom Mokoryontet citap mparet sukuŋet kuyok piko alake kukwa kwokusis.’’

will be added

X\