Matthew 8

1Nteyu kowo kurekune Yesu tulwet, kurup luket nyepo piko ce caŋ neto. 2Yoto kuco citake nye kiponto mutyenkenik okoy ye kimite Yesu, oŋnkukutuny oŋnkumwoci kule, “Mokoryontet, ye kecäm nyi nkit muci sopo ani.’’ 3Koyito Yesu yewunyi oŋnkunäm cicoto oŋnkumwoy kule, “Omöce ani, kunyo sop nyi nyolu!’’ Yoto pakenke kusopco mutyenkenik ce kiponto cicoto. 4Kunkolontyi Yesu kumwoci cicoto kule, “Lim pa, mente womwoci citake tokol, ntene iwo pakenke lakwar wule mite tisintet oŋnkikany kukäsiŋ, nteye kewany koyite korosyontet nyo kimwoy Moses sukuŋet porci ci ake tokol kule kwesop nyi.’’ 5Ntowo kupunto Yesu Kapernaum, yoto kutuye nyewo nyepo sikarekap Romek neto, kuco yepo tay oŋnkusaysay kumwoci kule, 6“Mokoryontet, mite mutworintemwani nye koru kwiriri om komwani nye puryo kot kuŋete, nye kasat koromun.’’ 7Kumwoci Yesu neto kule, “Mosowo ani wosop kusop.’’ 8Ntene kuwekyi nyewo nyepo sikarek kumwoci kule, “Mokoryontet, puryo kot kuyunyo, omnye oyiku ani ci nye puryo kot kumisyiniŋ nyi ico komwani, ntene mwowu pate ŋolyo mosukusop mutworintemwani. 9Omnye oyiku mpo ani ci nye cepoyto, oŋnkoponte sikarek ce opytoy, omwocini ake kule, ‘Iwo’ kuwo, nto ake omwoci kule, ‘Co’ kuco, nto mutworintemwani omwoci nyo kule, ‘Yiy kiyi’ Kwiy kuyunyoto.’’ 10Nteyu kowo kulim Yesu ŋalecato kokite koromun oŋnkumwoci piko ce kirupe neto kule, “Komwowok ani akwek kule, nka mpo om Israel tokol kumukul, tompo kot anyoru ani ci nye ponto koyenot nyewo nye yunyi. 11Komwowok yec kule, mosukukwane piko ce caŋ koŋasis oko raraktay ce mosukwokopure yepo meset wanak oko Apram oko Isaka oko Yakopo om poytoyisyetap torot. 12Ntene oŋnkyewirta piko co kiceyito poytoyisyetap Yiyintet kupa saŋ wule mite menonet wule mowokurirye oŋnkunyiy kelekwa.’’ 13Kumwoci Yesu nyewo nyepo sikarek kule, “Nomen iwo kaŋuŋ, mosukwiyokis om wule mite nyi kuyu wulo keyen nyi nkit.’’ Yoto pakenke kusop mutworintetap nyewo nyepo sikarek. 14Kuwo Yesu okoy kotap Petero, wokunyor cepyosyetap pikoy nyepo Petero kumite kukoru kumnyone yeset. 15Kunäm Yesu yewutap let nyepo cepyosyanato, yoto kusop yeset, kuŋet kuyo oŋnkucec kwici cek omik. 16Ntowo kupunto kosoleny, cekwer piko ce caŋ ce kiponto oyik ce miyotec kukwa wule mite Yesu. Kukwetyi Yesu picoto oyik ce miyotec kwiyisye ŋolyontenyi oŋnkusop piko tokol ce kimnyontos. 17Kikwiy kuyunyitenyi sukuŋet kwitita kupoyit manta ŋalek ce kikimwoy workoyontet Isaya kule, “Neto nkit nye kinum kusut tonkusyonokyacek oŋnkukesen porwonikyacek.’’ 18Yoto kukäs Yesu luket nyepo piko ce caŋ ce kimite kemut neto, kumwayta kule cipe kyay tampayayet pitonin. 19Kuco konetintet ake nyepo ntarastinek ye kimite Yesu oŋnkumwoci kule, “Konetintet, mosanamatiŋ ani cepetekey oko nyi om wulyo tokol wule kewo.’’ 20Kuwekyi Yesu kumwoci neto kule, “Ponto mokoyitinek mwenonik, kuponto toritek korik, ntene puryo kot kuponto Weritap cito wule mokowute metinyi.’’ 21Kumwoci citake nye kikonomintet Yesu kule, “Mokoryontet, kany awo ani kunyo wamuy Papanyu.’’ 22Kuwekyi Yesu kumwoci neto kule, “Nama ani nyi cepetekey tukway, yaste muswek kumuy muswekwa nkit.’’ 23Kulany Yesu rapet oŋnkupetakey konomikyi. 24Yoto pakenke kuwus yomet nyewo koromun om tampayayet okoy kumac kolum peko rapet. Ntene kimite yoto Yesu kukoru. 25Kupa cek ye kimite Yesu oŋnkuŋet kumwoci kule, “Mokoryontet, sorwec kocemis!’’ 26Kuwekyi Yesu kumwoci cekto kule, “Omne somuye kuyunyi? Oponte akwek koyenot nye kisic!’’ Kuŋet Yesu kuyo oŋnkupolyi yomet oko tampayayet, yoto kusis yomet oko tampayayet tokol. 27Kokite ci tokol om cek oŋnkumwoy kule, “Ci ne cito nyi? Omnye limncini yomet neto oko pekap tampayayet!’’ 28Kuco Yesu kwoy tampayayet pitoni okoy koretap Kerasenik. Yoto kutuye piko oyenku Yesu ce kikwone kepenonik wule cemucini piko. Kiponto picoto oyik oŋnkinyekerec koromun, nye kipuryo ci mpo akenke nye kimuce kot kupunte aranato. 29Yoto pakenke kupol picoto kumwoy kule, “Weritap Yiyintet, mokenec ne acek nyi? Keco nyi so kule cataŋanyec acek kutompo kot kupunto pesyet nyo kicekwey?’’ 30Kimite ye kilekite yoto kimite cek yeceytap nkururwenik ce caŋ ce kimite kwokete. 31Kusom oyik kumwoci Yesu kule, “Ye kekwetec acek nyi, kwetec cipe wociwut yeceytap nkururwenik cut!’’ 32Kumwoci Yesu cek kule, “Ape.’’ Yoto kuŋetyo oyik kupa wokowut nkururwenik. Kurway kumwey yeceyta tokol nyepo nkururwenik okoy wokoŋirte lakam wokosuci tampayayet kupakäc peko tokol. 33Yoto kumwey mesewek ce kyokoy nkururwenik okoy kupunto moŋet oŋnkupa wokumwaytat ŋalek tokol ce kokwiyokis om wule mite piko co kiponto oyik. 34Yoto kuwo ci ake tokol nyepo moŋonoto wokukäs Yesu. Nteyu kowo kukäs, kusom cekto Yesu kuŋet kuwete koremwa.

will be added

X\