Matthew 7

1“Monte cemutyi piko alak musanku, sukuŋet mente kot kumütwok Yiyintet akwek koyin musanku. 2Omnye mosukumutwok Yiyintet akwek musankut kuyu wulo omutyini akwek piko alak. Mosukwiyisye neto ntarastinek co oyiyisye akwek ye omutyini piko alak musankut 3Kunyo omne seköse nyi pertet nye kisic nye mite koŋnta nyepo yeyaŋuŋ, oŋnkurok kupuryo kot muci käs musukyet nyo mite koŋnta nyeŋuŋ nkit? 4Nto muci nyi kulene mwoci yeyaŋuŋ kule, ‘Yeya, kany onumuŋ ani pertet nyo mite koŋnta nyeŋuŋ oŋnkurok ponte nyi yec musukyet nyo mite koŋnta nyeŋuŋ nkite?’ 5Ye koperperintoni! Nyosye numu kunyo musukyet nyo mite koŋnta nyeŋuŋ! 6“Monte cikoci ŋokik tukuk ce tililec, mosukuwekyokey kwamak. Monte cewirci karin nye piciy taytap nkururwenik, omnye mosukutyikta ŋony pate. 7“Osom mosicekonok akwek, aceny mosonyoru, okonynkony kurket mosiceyotwok. 8Omnye ci ake tokol nye kosom, mosicikoci, nto ci ake tokol nye kaceny, mosukunyor, nto ci ake tokol nye kekonynkony, mosiceyotyi kurket, 9Ŋo om akwek nye muci kukoci lekwenyi rwantet ye kosom mukatyantet? 10Nto kukoci erenet ye kosom purpuryontet? 11Kunyo nteye oŋnket akwek piko cu oyiku miyotec okoci lekokwok tukuk ce toponec, ku aret ce tya nyun ce muce kukoci Papa nyepo torot tukuk ce toponec piko co kosom cekto neto! 12“Kunyo möce oyici piko alak tukuk ce toponec kuyu wulo omoktoy akwek kule ntoyiwok akwek cekto, omnye poru coto wule yunto ntarastinekap Moses oko cepo workoyik. 13“Ape akwek owut orit opunte kurket nye maric, omnye para kurket oŋnkukoy nye para aret nye weti wule mite mata nye momise. Kunyo punte piko ce caŋ aret nyoto. 14Ntene maric oŋnkulow oŋnkuwuy aret nye weti wule mite soponto, oŋnkuŋeri pate piko ce mokunyor aranato. 15“Oripkey wule mite workoyik co mwiynot, cekwoni wule omite akwek kuyu kecirek om porto wulo po saŋ, ntene om orit kuce suyik co orontoy. 16Mosonkete akwek cekto kupuswek cepo yisyet nye yiye. Muce pa kupute piko mokoyek ketik ce ponto kotok? 17Yiye ketit nye topon omik ce toponec, kwiye ketit nye miyat omik ce miyotec. 18Puryo kot komuce ketit nye topon kot kwiy omik ce miyotec, oŋnkupuryo kot komuce ketit nye miyat kot kwiy omik ce toponec. 19Ket ake tokol nye puryo kot kwiye omik ce toponec, ceyepe nyo kulul oŋnkyewirci mata orit. 20Kunyo mosonkete akwek workoyik ce mwiynot yisyet nye yiye. 21“Puryo kot ku ci ake tokol nyo kuro ani kule, ‘Mokoryontet, Mokoryontet’ nye mosukowut poytoyisyetap torot, ntene nyo yiye pate ŋalek ce möce Papamwani nye mite torot. 22Ye kopunto pesyonoto, mosukumwowo ani piko ce caŋ kule, ‘Mokoryontet, kicemwayte acek lokoywekap Yiyintet om kayneŋuŋ, cekwet oyik ce caŋ, oŋnkyiy tukuk cepo kakitat om kayneŋuŋ!’ 23Mosomwoci ani picoto kule, ‘Puryo kot oŋnketok ani akwek! Aŋete taymwani cu oyiye ŋalek ce miyotec!’ 24“Kunyo ci ake tokol nye kalim ŋalekwani cutecu oŋnkurup kuywey, kukerkey nyo oko ci nye ŋom nye katec konyi kupolyi kuwo ŋony topon. 25Kuropen ropta, kuyin mokotek oŋnkuwus yomet kuryac koyoto, ntene puryo kot kulul omnye kicetec cepolyi kuwo ŋony topon. 26Nto ci ake tokol nye kalim ŋalekwani cutecu oŋnkupuryo kot kurup kuywey, kukerkey nyo oko ci nye perper nye katec konyi yepo ntapca oŋnkupuryo kot kupolyi kuwo ŋony topon. 27Kuropen ropta, kuyin mokotek oŋnkuwus yomet kuryac koyoto kulul, kulul koyoto lulot nyewo koromun!’’ 28Nteyu kowo kumwoy Yesu ŋalecutecu okoy kuwany, kokite luket nyepo piko ŋalek ce kinet neto. 29Kinet Yesu cekto kuyu ci nye ponto kamukeywek nye puryo kot kukerkey oko konetikwa cepo ntarastinek.

will be added

X\