Matthew 6

1“Oripkey monte oyiye yisyet nyepo tinimwoŋ om taytap piko kule sukuŋet kukäs piko kito nye oyiye akwek. Ye kayiy tukucutecu kuköse piko, kupuryo kot cimuce cekonok kokotutyet nye cone wule mite Papamwoŋ nye mite torot. 2“Kunyo ye kekoci cito nye panan kiy nye kekalya, mente osilkey okurte om taytap piko kuyu wulo yiytoy koperperotik co silekey om korikapkok oko wulo po orustunwek. Yiye cekto kuyunyoto kule sukuŋet kuyweyec piko. Komwowok ani akwek ŋalek cepo manta kule, kunyor picoto musyaremwa nye yeme. 3Nteye mite nyi kocini pononik tukuk ce kekalye, möce rip mekany kot kukäs yewuŋuŋ nyepo let kito nye yiye yewuŋuŋ nyepo tay. 4Sukuŋet Papaŋuŋ nyo köse tukuk ce wuŋotin kukoniŋ nyi musyaret. 5“Nteye mite nyi some, mente akerkeyitu oko kaperperotik co silekey! Co möce kule ciyoŋntosi om korikapkok oko sokwonutek kule sukuŋet kukäsec piko tokol. Komwowok ani ŋalek cepo manta kule! Kunyor picoto musyaremwa nye yeme. 6Ntene ye mite some, möce iwut koŋuŋ orit oŋnkiker kurket, oŋnkisom Papaŋuŋ nye mite wule wuŋat; sukuŋet Papaŋuŋ nye köse tukuk ce wuŋotin ce yiye nyi kukoniŋ musyaret. 7“Nteye osome monte aluplupan oyiyisye ŋalek ce caŋ kuyu piko co menkete Yiyintet, ce sote kule mokulimnci Yiyintet cek om sayet nyepo ŋalek ce caŋ. 8Monte cekerkeyitu oko pico. Omnye nkete Papamwoŋ tukuk ce omoce kutompo kot osom akwek neto. 9Möce osome kuyunyi kule: ‘Papa nyo nye mite torot, kante ciywey kutililit kayneŋuŋ, 10Kante kuco poytoyisyeŋuŋ, kante kwiyokis ce möce nyi om koret kuyu wule kyiytoy om torot. 11Konec omikyo cepo okokoy, 12Kalyec leliswekyacek, kuyu wulo cikolyoy co lele om wule ce mite acek. 13Mente aroyenec wule mite syemutok, ntene sorunenec wule mite miyotyet.’ 14Omnye ye kokalye akwek piko alak leliswek ce kukwiwok, mosukukalyak mpo akwek Papamwoŋ nye mite torot. 15Ntene ye puryo kot omuci kot akalye piko alak leliswek ce kukwiwok akwek, mpo Papa nye mite torot kupuryo kot komuce kot kukalyak mpo akwek leliswek ce kwayiy. 16“Nteye omite akwek okire omik, monte cesimiyitu kuyu wule yiytoy kaperperotik, omnye sirinye cek tokoywekwa kusoŋutitu kule sukuŋet kuporkey kutok kule mite cekto kukire omik. Komwowok ani akwek ŋalek cepo manta kule, kunyor picoto musyaremwa. 17Ntene ye mite nyi ikire omik, möce wun metiŋuŋ oŋnkiyile mwayta, 18sukuŋet mente kot kuporkey kutok om wule mite piko kule mite nyi ikire omik, ntene konkete pate Papaŋuŋ nyo köse tukuk ce wuŋotin ce yiye nyi oŋnkukoniŋ musyaret. 19“Monte cekonore mokoryontinek wuli po koret ŋony, wule muce kurwotyeci oŋnkwam solopik, oŋnkuput kucor corik. 20Akonore Mokoryontinekwok wulin po torot wule memuce kot kurwotyeci nto mpo kot kwam solopik, wule memuce kot kuput oŋnkucor corik. 21Omnye wule mitowune mokoryontinekwok ku wuloto wule mitowune mukuleywekwok. 22“Koŋnta kunye tarit nyepo porto. Ye toponec konyek cekuk kuköstoy topon, kuponto porto nyeŋuŋ tokol lakweyet. 23Ntene ye puryo kot kuköstoy topon konyek cekuk, kuponto porto nyeŋuŋ tokol menonet. Kunyo ye kaweckey lakweyinto nyo mitowune wule mite nyi kwek menonet, kutuyitu menonet nyoto koromun! 24“Puryo ci nye muce kot kwek mutworintet nyepo mokorenik oyeny. Omnye muce kusenker ake oŋnkucäm ake, nto muce kuywey ake oŋnkunyil ake. Puryo kot omuci akwek kot oyici yisyet Yiyintet oko mokoryontit nyepo tukuk cepo koret. 25“Yunyoto omne saŋet omwowok ani akwek kule, monte cisot tukuk ce nömok akwek, kuyu omik ce moyam sosopce, nto ce nöme sirok cepo porwonikwok kule mosicilac ne. Puryo kot kupële ne soponto omik? Puryo kot kuponto ne porto latik kupël sirok? 26Akäs pa akwek toritek co terertoy, puryo kot kukolsyi oŋnkupuryo kot kukisisyi, nto korurukyi mpo omit coken, ntene oŋnkupoye Papamwoŋ cekto. Kunyo puryo kot oponte akwek ne latik kupël toritek? 27Ŋo om akwek nye ye komuy oŋnkusot koromun ce nöme sopon nyi, nye muce kot kutosyi kucaŋit kenyisyek alak cepo soponto? 28“Kunyo omne sasoti akwek ce nöme sirok? Akäs pa wule pititoy taptok om koret, puryo kot kwiyisyi cekto, oŋnkupuryo kot kunope sirok. 29Ntene komwowok ani akwek kule, nka mpo Solomon om woyintap mokoryontit nye kiponto, kipuryo kot kulocekey neto topon kuyu akenke om taptocu. 30Kunyo nteye muce Yiyintet kot kulac suswek ce mite koret pesyoni nto mite tun cewirci mata kuloy, ku aret ce tya nyun ce muce Yiyintet kulacak akwek! Oyiku akwek pic ce ponto koyenot nye miniŋ pate! 31“Kunyo monte cec cisot omwowu kule, ‘Mosikyam ne acek?’ Nto kule ‘Mosicilac ne acek?’ 32Omnye möce mpo piko alake co monket Yiyintet tukucutecu tokol. Nkete Papamwoŋ nye mite torot kule omöce akwek tukucutecu tokol. 33Onyosye onyoru kunyo poytoyisyetap Yiyintet oko toponiyenyi sukuŋet cetoswok akwek tukucutecu. 34Kunyo monte cisot ŋalek cepo pesyetap tun, omnye pesyet nyepo tun oko ŋalek ceci nkit. Ponto pesyet ake tokol wuyinwek ceyemekey oko pesyonoto.

will be added

X\