Matthew 5

1Ntowo kukäs Yesu luket nyepo piko ce caŋ, kulaŋnta kuwo tulwet parak oŋnkupur ŋony. Kukwa konomikyi koruruckey komut neto. 2Kucec Yesu kunet piko kumwoci kule: 3“Ponto kupeyoy piko ce nkete kule ce möce koromun swametap Yiyintet om mukuleywekwa, omnye nyimwa poytoyisyetap Yiyintet! 4“Ponto kupeyoy piko co rirtos kumesyi, omnye mosukuŋerec Yiyintet cekto! 5“Ponto kupeyoy piko co toloyec, omnye mosukunyor tukuk co kikurto Yiyintet! 6“Ponto kupeyoy piko co möce kule kwiyokis tukuk ce möce Yiyintet, omnye mosicipiyony cek kupiyoŋis! 7“Ponto kupeyoy piko co porcini piko alak tolosyet, omnye mosukukoci Yiyintet kunyor cekto tolosyet! 8“Ponto kupeyoy piko co tililec mukuleywekwa, omnye mosukukäs cek Yiyintet! 9“Ponto kupeyoy piko co yiyisyi kusut kalyet om wule mite piko, omnye mosukukure Yiyintet cekto lekokyi! 10“Ponto kupeyoy piko co kicitaŋany kunyalil omnye yiye ŋalek ce möce Yiyintet, omnye nyimwa poytoyisyetap Yiyintet! 11“Oponte akwek kupeyoy ye kocupok piko oŋnkutaŋanyak kumwowok ŋalek tokol ce miyotec omnye oyiku akwek konomikwani. 12Aŋerec oŋnkopoypoyitu koromun, omnye cemosi koromun musyaremwoŋ nye kicekonorwok om wulin po torot. Omnye kikutaŋany cek workoyik kuyunyitenyi kutompo kot otoku akwek. 13“Oyiku akwek misyontet nyepo koret. Ntene ye komo kunomu misyontet kupuryo aret ake yec nye cewece kot kunom. Komo kuponto nyo latik, kunyo ciswortoy pate kutyikta piko. 14“Akerkeyekey akwek lakweyet nyepo koret. Puryo kot kuwuŋotos moŋet nye kicetec tulwet parak. 15Puryo ci nye pele tarit oŋnkukupuye pesenit, ntene tore kito nye yoŋe tarit sukuŋet kukweny lakweyet piko tokol ce mite koto orit. 16Kuyunyoto misyini kukweny lakweyet nyimwakwek piko tokol, sukuŋet kukäs cekto tukuk ce toponec ce oyiye akwek, sukukasta Papamwoŋ nye mite torot. 17“Monte cisot kule kyaco ani kule cawirte ntarastinekap Moses oko ŋalekap workoyik. Puryo kot aco kule cawirte, ntene kyaco kule saŋet ayitite awaŋnte ŋalecato. 18Komwowok ani akwek ŋalek cepo manta kule, ye tokumite kuyoŋot koret wulin po torot oko koret wuli po ŋony, kupuryo kot kupote nyukutet mpo akenke nto mpo kot kupot ntarastit ake tokol nye miniŋ om ntarastinek okoy kwiyokis tukuk tokol ce cemöce kule kwiyokis. 19Kunyo ci ake tokol nye yirye ntarastit mpo akenke pate nye miniŋ, oŋnkunet mpo piko alak kwiy kuyunyoto kunye cito nyoto nye mosukwek nye miniŋ om poytoyisyetap torot. Ntene ci ake tokol nye keywey kwiyisye ntarastinek oŋnkunet piko alak kwiy kuyunyoto, kunye cito nyoto nye mosukwek nyewo koromun om poytoyisyetap torot. 20Kunyo komwowok ani kule, ye puryo kot oyiye akwek topon yisyonutekap Yiyintet kupël Farasayek oko konetikap ntarastinek, kupuryo kot owuti mpo kisic poytoyisyetap torot. 21“Kyolim akwek kule kicemwoci pikap keny kule, ‘Monte ceporisye, nto ci ake tokol nye koporis cekweru nyoto kuco taytap ketintet.’ 22Kunyo omwowok ani akwek yawut kule, ‘Ci ake tokol nye konyerci mutakwam, mosicekwer nyoto kuco taytap ketintet.’ Nto ci ake tokol nye kocup mutakwam kumwoci kule, ‘Puryo nyi wol.’ Kumisyini cekwer cito nyoto kuco taytap Kokwet nyewo. Nto ci ake tokol nye kokur mutakwam kule, ‘Solwo nyi.’ Kuweti cito nyoto wule mite mata nye momise. 23Kunyo ye karik koyite nyi kokotutyet nye kekoci Yiyintet om yepo otepto nye pele korosek, oŋnkisot om yoto kule ponteniŋ mutokwomet ŋolyo, 24Kumisyini pokokyi kokotutyet yoto po taytap otepto nye pele korosek, oŋnkiwo lakwar wesat ŋalek ocömnyekey oko mutokwomet, nteye kewany weckey cekoyite kokotutyeŋuŋ nye kekoci Yiyintet. 25“Nteye kowosontyiŋ citake kukweriŋ koti, kumöce kule asat ŋalek ocömnyekey lakwar oko cicoto ye tomite opeti om aran kutompo kot opunte koti, sukuŋet mente kot kukweriŋ okoy taytap ketintet, kuŋet nyo kukoytiŋ iwo wule sikorintet kukweriŋ nyo iwo mopusi. 26Komwowuŋ kule, puryo kot muci nyi kot cone mopusi okoy ye kekonu pesyantet nyepo letut nyepo pesento. 27“Kyolim akwek kule kicemwoy kule, ‘Mente asakwayan.’ 28Kunyo komwowok ani akwek yawut kule ‘Ci ake tokol nye kakäs korko oŋnkuocorokyi kule nto kwek nyenyu, kakwiy cicoto sakwayanat oko korkonoto om mukuleynyi.’ 29Kunyo ye koŋnta nyeŋuŋ nyepo tay kunye sokyiŋ nyi kot yiy miyotyet, lotu kulot! Oŋnkiwirte. Omnye topon om wule mite nyi ye kepot kereryantet ake nyepo porŋuŋ kusir ye kocewirci porto nyeŋuŋ tokoe wule mite mata nye momise. 30Nteye yewut nye nyepo let nye sokyiŋ nyi kot yiy miyotyet; yepte kuŋet! Oŋnkiwirte! Omnye topon om wule mite nyi ye kepot kereryantet ake nyepo porŋuŋ kusir ye kotoweti porto nyeŋuŋ tokol wule mite mata nye momise. 31“Kicemwoy yec mpo kule, ‘Ci ake tokol nye kakwet korkenyi, kumisyini kusilyi parwet nye kwete.’ 32Kunyo komwowok ani akwek yawut kule, ‘Ye kakwet cito korkenyi, tos pate om ŋalekap sakwayanatet, kuponto cicoto lelisto nye kosutyi korkonoto kusakwayan.’ Nto cito nye kemüt korkonoto kakwiy cicoto sakwayanat. 33“Kyolim akwek mpo yec kule, kicemwoci pikap keny kule, ‘Puryo kot kumisyini oyirye kawalatet nye kowalkey, ntene misyini oyiye oyititoy kawalemwoŋ om taytap Mokoryontet.’ 34Kunyo komwowok ani akwek yawut kule, Monte ciwolikey kawalat nyepo ŋolyo ake tokol. Monte ciwoli wulin po torot, omnye ŋeceretap Yiyintet wuloto. 35Monte mpo ciwolyinikey koret wuli po ŋony, omnye muŋe kerenkokyi wuloto. Nto monte mpo ciwolyinikey Yerusalem, omnye moŋetap Kinko nyewo wuloto, 36Mente owolyikey mpo metiŋuŋ, omnye puryo kot muci nyi kot wec putyonteŋuŋ mpo akenke kulelit nto kutuyit. 37Möce omwowu pate kule, ‘Yunyoto.’ Nto komwowu kule, ‘Puryo kot kuyunyo.’ Omnye ŋolyo ake tokol nye komwowu kukeyte cutecu kucone nyo wule mite oyinoto nye miyat. 38“Kyolim akwek kule kicemwoy kule, ‘Koŋ oko koŋ, kelya oko kelya.’ 39Ntene komwowok ani akwek yawut kule, ‘Monte ceyokukey om wule mite citake nye kokwiwok ŋalek ce miyotec. Ye kasyeciŋ citake kwarmatut nyepo tay, wekyi kusyec mpo nyepo let. 40Nteye kokweriŋ citake wokuwosontyiŋ om satiŋuŋ, yaste kusut mpo kotit. 41Nteye kokerciŋ koŋ citake kule tor terekokyi kilomitet akenke, tosyikey sut wany kilomitet akenke yec. 42Ye kosomiŋ citake kitake kumöce kule koci cicoto kiyoto. Nteye kepeseniŋ citake kitake kumöce kule pesentyi cicoto kiyoto.’ 43“Kyolim akwek kule kicemwoy kule, ‘Misyini cäm latyeŋuŋ, oŋnkisenker punikuk.’ 44Ntene komwowok ani akwek yawut kule, acäm punikwok, oŋnkosomnci piko co toŋonyok, 45sukuŋet oyiku akwek lekokap Papamwoŋ nye mite torot. Omnye neto nye konu asisnyi kuluci piko ce miyotec oko piko ce toponec kukerkeyitu tokol, oŋnkukoci ropta piko ce yiye ce toponec oko piko ce yiye ce miyotec. 46Nteye kacäm akwek pate piko co cömok akwek, asot kule mocenyoru kokotut ne? Omnye yiye mpecek korurukikap mosoret kuyunyoto! 47Nteye koŋololyi akwek pate coronutekwok, kukayiy kiy ne nye pciyat nye puryo kot kupo kwak? Omnye yiye mpecek piko co puryo kot kucöme Yiyintet kuyunyoto! 48Misyini oyiku pic ce tililec kuyu wulo tilil Papamwoŋ nye mite torot!

will be added

X\