Matthew 4

1Kuntoci yoto Muyet Nyetilil Yesu kukwer okoy kitela, sokuwo wokusyem kulot Setani nyewo nyepo oyik neto. 2Nteyu kowo kuwany Yesu pesyosyek artam cepo pet oko pesyosyek artam cepo komoy nye puryo kot kwomisyi, yoto kwam neto rupet. 3Kuco Setaninato wule mite neto oŋnkumwoci kule, “Ye yiku Weritap Yiyintet, mwoci panyi rwontocu kuweckey kwek mukatya?’’ 4Kuwekyi Yesu kumwoci neto kule, “Mwowu silutekap Yiyintet kule, ‘Puryo kot kusope cito mukatya pate nkit, ntene sope ŋolyo tokol nye cone kutitap Yiyintet.’ ’’ 5Yoto kukwer Setaninato Yesu okoy kupunto moŋet nyetilil, oŋnkukoci kuyoŋe kusurut nye koy nyepo kotap Yiyintet. 6Oŋnkumwoci kule, “Ye yiku nyi Weritap Yiyintet, wirtekey panyi yu okoy wepir ŋony; omnye mwowu silutekap Yiyintet kule: ‘Mosukumwoci Yiyintet malaykanikyi kukwa kwokutaciŋ nyi, mosukwokunämiŋ kutaceniŋ yewuniyekwa, sukuŋet mente kot kuryac rwontok kerenkokuk.’ ’’ 7Kuwekyi Yesu kumwoci neto kule, “Ntene mwowu mpo yec silutekap Yiyintet kule, ‘Mente kot asyem lotu Mokoryontet Yiyinteŋuŋ.’ ’’ 8Yoto kukwer Setani nyewo nyepo oyik, Yesu okoy tulwet nye koy koromun, oŋnkuporci koret tokol kumukul oko woyinwek tokol ce ponto. 9Oŋnkumwoci kule, “Mosokoniŋ ani nyi tukucutecu tokol ye kekutumwo ani oŋnkisaya.’’ 10Kuwekyi Yesu kumwoci neto kule, “Wete yu nyi Setani! Omnye mwowu silutekap Yiyintet kule, ‘Soye Mokoryontet Yiyinteŋuŋ oŋnkiyici yisyet neto nkit pate!’ ’’ 11Yoto kunomen Setani nyewo nyepo oyik, kukwa malaykanik kwokukalya Yesu. 12Ntowo kulim Yesu kule kucenäm Yowana oŋnkyekerta mopusi, yoto kunomen kuwo okoy Kalilaya. 13Kipuryo kot kuminy Nasaret ntene kuwo wokuminy moŋetap Kapernaum nye mite tapantap tampayayet nyepo Kalilaya om koretap Sapulon oko nyepo Naftali. 14Kiyokis kuyunyoto sukuŋet kwitita kupoyit manta ŋalek ce kikimwoy workoyontet Isaya kule: 15“Om koretap Sapulon oko koretap Naftali, om koret nye tokyinikey ruretyet, om oyinetap Yortan pitonin, Kalilaya nye koretap lamek! 16Piko ce minye wule mite menonet, Kukäs cekto kukweny lakweyet nyewo! oko piko ce minye koret nyepo menonetap met, kokoluci cekto lakweyet!’’ 17Kuceke pesyonoto kucec Yesu kumwaytat lokoywekyi kumwoy kule, “Arenynkey ayaste miyotyonikwok! Omnye kacontyok akwek poytoyisyetap torot!’’ 18Nteye kimite Yesu kuweti kurupe tampayayetap Kalilaya tapan; yoto kukäs piko oyeny ce tupco ce kinömikap purpurunek, coto ku mpo Simon (nye kimulyi cekure kaynet ake Petero) oko mutakwam Antereya ce kimite kuwircini porok tampayayet orit kunöme purpurunek. 19Kumwoci Yesu cek kule, “Akwa anama cepetekey oko ani, mosanetak oyiku nömik ce okweru piko.’’ 20Pakenke kupakakta cek porokwa cepo purpurunek oŋnkunam kupetakey Yesu. 21Kutosyikey Yesu kuwo tay kuminiŋ, kukäs yec piko alak oyeny ce tupco, coto ku mpo Yakopo oko Yowana werikap Sepetayo. Kimite cek kukepur rapemwa orit kupontokey oko kwan Sepetayo. Kimite yoto kuyiytoy kusate porokwa cepo purpurunek. Kukur Yesu cekto. 22Yoto pakenke kupakakta rapet oko kwan oŋnkunomen kunam kupetakey Yesu. 23Kuwo Yesu kupunte koretap Kalilaya tokol kunetisyoti om korikapkokwonikwa, oŋnkumwoytoti lokoywek ce toponec cepo poytoyisyetap Yiyintet, oŋnkusop piko tokol ce kimnyontos porwonik wok tokol. 24Kutisto ŋalek ce nöme neto kupunte koretap Siriya tokol, yoto kukwer piko pikwa ce kitaŋany ce kiponto oyik ce miyotec oko ce kipoku mewuŋ, oko kipok porwonik. Kusop Yesu picoto tokol. 25Kupa kunamat luket nyewo nyepo piko ce caŋ Yesu, ce kikwone Tekapoli (moŋosyek taman) oko ce kikwone Yerusalem oko Yuteya oko ce kikwone koretap oyinetap Yortan pitonin.

will be added

X\