Matthew 3

1Kuco Yowana potisonintet om pesyosyecoto oŋnkucec kumwaytat Lokoywek om kiteletap Yuteya kumwoy kule, 2“Arenynkey, ayaste miyotyonikwok omnye kacontyok akwek poytoyisyetap torot!’’ 3Yowana kunye neto nyo kiŋolole workoyontet Isaya yo kimwowu kule: “Kapole citake kitela, oyiytoci Mokoryontet arenyi, asat kurotakay arenyi nye mosukupunte!’’ 4Kiloce Yowana yoto siret nye samput nye kicenape kororikap tyonyntake nye cekure nkamiyet oŋnkurate anwet suwenyi, kunyo kikwome talamik oko kumnyatetap samiyita. 5Yoto kukwane piko Yerusalem oko ce kikwone koretap Yuteya tokol, oko ce kikwone koret nye lekite tapantap oyinetap Yortan. 6Kurenynkey cek kuŋoŋ miyotyonikwa oŋnkupatisan Yowana cekto om oyinetap Yortan. 7Ntowo kukäs Yowana Farasayek oko Satusayek ce caŋ ce kimite kukwoni wule mite neto kule cepatisanec, Kumwoci neto cek kule, “Akwek Erenocu! Ŋo nye kwesowok kule omweye nyerunotetap Yiyintet nye karik kuco? 8Kunyo ayiy tukuk ce poru kule kwarenynkey akwek ayaste miyotyonikwok. 9Ntene monte cisot omwowu kule, Ceponte Apram nye kukonyo! Omnye komwowok ani kule, muce Yiyintet kunäm rwontocu oŋnkuwec kwici Apram lekok. 10Kunyo kocenömnci yawut oywet kulekite kirintonokap ketik, nto ket ake tokol nye puryo kot kwiye omik ce toponec, mosiceyep nyo kulul oŋnkyewirci mata orit. 11Opotisonenok ani yawut peko kwek pelutyet nye poru kule kwarenynkey. Ntene coni om letumwani citake nye ponto swamet kupëlo nye puryo oyiku topon kot ayem anämate kweyonikyi. Neto nyoto kunye mosukupatisanenak Muyet Nyetilil oko mata. 12Pontonu neto sweswenyi nye kanäme yewut nye mokusese nkanuk oŋnkururukyi cokenikyi, oŋnkupele wulo po moriryek mata nye momise.’’ 13Kunomene Yesu Kalilaya om pesyosyecoto kuwo okoy oyinetap Yortan kule kupatisana Yowana. 14Ntene kusyem Yowana kule akerekte neto kumwoy kule, “Omöce ani kule patisana ani nyi, kunyi ye coni nyi yec wuli omite ani?’’ 15Ntene kuwekyi Yesu kumwoci neto kule, “Yaste yawut kwiyokis kuyunyitenyi, omnye om aret nye yunyitenyi ye mosiciy acek ciyitite ŋalek tokol ce möce Yiyintet.’’ Yoto kucäm Yowana. 16Yoto pakenke yu kowo cepatisan Yesu, kuloŋune peko orit. Kuyatakay wulin po torot kukäs neto Muyet Nyetilil nyepo Yiyintet nye kerkey oko swarar oko lakweyet nye kico kurekyi cokopure neto. 17Kucone kutit torot kumwoy kule, “Nyi kunye Werimwani camanet, nye oŋerekyini ani koromun.’’

will be added

X\