Matthew 28

1Ntowo kupok pesyetap Sapat, nye kerir koret pate ye pesyetap Santey, kuwo Mariyam nyepo Maktala oko Mariyam nyin ake wokukäs mwenet. 2Yoto koriŋriŋ koret koromun, kucone malayketap Mokoryontet torot cokuwunukto rwantet oŋnkopure parak. 3Kikerkey tonto nyenyi oko kaweket nyepo ilat, oŋnkulelac sirokyi piw kuyu plelityet nyepo koyantet. 4Kumuyo kupoton sikarek ce kiripsi koromun kukerkeyitu pic ce kapok. 5Kuŋololyi malayket korucoto kumwoci kule, “Monte cemuye, oŋnket ani kule ocenye akwek Yesu nyo kucewuyitocini murtowontet. 6Puryo kot kumite yu, kokotutune met kuyu wulo kimwayta neto. Akwa pa yu kwakäs ye kucemuci. 7Kunyo ape yawut asartekey lakwar womwoci konomikyi kule, ‘Kokotutune met’, kunyo mite yawut kontowok akwek kuweti Kalilaya wule mawanyorte! Kunyo möce asot ŋalek ce komwowok ani akwek.’’ 8Yoto kusartakey cek kupete yepo mwenet kukomuyo oŋnkuŋerekotin. Kurway cek wokumwoci konomikyi. 9Yoto pakenke kutuye Yesu cek oŋnkutakwes kule, “Takwenyo.’’ Kukwa cek kuric Yesu oŋnkukutuny kunäm kerenkokyi kusay. 10Kumwoci Yesu cek kule, “Monte cemuye, ape womwoci mpo yeyamwani konomik kupa Kalilaya wule mosukukäsena ani cekto.’’ 11Nteye kimite koruk aran kupeti, yoto kupa sikarek alake co kiripe mwenet okoy kupunto moŋet oŋnkuwo kumwoci tisik cewoyec ŋalek tokol ce kokwiyokis. 12Koruruckey tisik cewoyec oko poyik oŋnkurwoc ŋomnonet. Kukoci cek sikarek pesanik ce caŋ, 13oŋnkumwoci kule, “Möce omwowu kule, kukwa konomikyi komoy cemite acek koceruye oŋnkwokucor musnyi. 14Nteye kalim poytoyintet ŋalecutecu, mosiceŋololyi acek neto okoy cimukte nye komo oponte akwek ŋolyo ake tokol nye omuye.’’ 15Kunäm sikarek co kiripsi pesanik, oŋnkwiy kuyu wulo kocemwoci cekto. Kutisto ŋolyontono om wule mite Yutayek tokol okoy pesyoni. 16Kupa konomik tamanu ok akenke okoy tulwet ake om Kalilaya wule kikimwoci Yesu cek kupa wuloto. 17Nteye kotoköse cek neto kukutuŋe yepo taynyi kusay nka kot kipuryo kot kucömis alake om cekto. 18Kunokyi Yesu ye mite cekto oŋnkumwoci kule, “Kacekono ani kamukeywek tokol om torot oko koret ŋony. 19Kunyo ape wule mite piko cepo koret tokol kumukul, wanet kwek konomik, wapatisan om kaynet nyepo Papa, oko nyepo Werit, oko nyepo Muyet Nyetilil, 20oŋnkonet kuywey ŋalek tokol co kyomwowok ani akwek. Kunyo möce oŋnket kule opontekey ani oko akwek okokoy pesyet nyepo letut.’’

will be added

X\