1 Ntowo kuyec koret pate, kurwoc tisik cewoyec tokol oko poyikap Yutayek aret wule sukuŋet kupakäc Yesu kume. 2 Kurate cek neto nyororonik oŋnkukwer kuwo wule mite poytoyintet Pilato. 3 Nteyu kowo kukäs Yuta ŋomntoyintet kule kocemutyi Yesu musankut cepakäc kume, yoto kurenynkey oŋnkunäm silinkinekye sosom oŋnkusutyi tisik cewoyec oko poyik. 4 Kumwoy kule, “Kwalel ani ayiy miyotyet aŋomnte korotikap ci nye moponto lelis!’’ Ntene kuwec cekto kumwoy kule, “Puryo kot kunömec acek lelisto nyepo ŋalekyo, nyeŋuŋ lelisto nkit!’’ 5 Kuwirci Yuta pesanik kotap Yiyintet, oŋnkunomen kuwo wokuketkey nkit. 6 Kukwey tisik cewoyec pesanik oŋnkumwoy kule, “Pesanicu kuce kucale koroti, kunyo puryo kot kucöme ntarastinekyacek cekonore wule mite pesanikap kotap Yiyintet.’’ 7 Nteyu kowo kucömncin cek kwale pesanicato mparetap cito nye yiye terenik sukwek mparanato mparet nye cemucini toyek ce kopok. 8 Kunyo sukuŋet cekure maswanato, “Maswetap koroti’’, okoy kunyi. 9 Yoto kwitita kupoyit manta ŋalek ce kiŋalal workoyontet Yeremiya kumwoy kule, “Kinäm cek silinkinek sosom pesanik ce kikicäm pikap Israel kule kyale neto 10 oŋnkwiyisye cekto pesanicato kwale mparetap cito nye yiye terenik, kuyu wulo kikimwowo ani Mokoryontet.’’ 11 Kuyoŋe Yesu taytap poytoyintet, kutepe poytoyintet neto kule, “Yiku nyi kinko nyepo Yutayek?’’ Kuwekyi Yesu kumwoci kule, “Kemwowu nyi.’’ 12 Kuwosontyi tisik cewoyec oko poyik Yesu, ntene kusis Yesu nye puryo kot kuwec ŋolyo. 13 Kumwoci Pilato neto kule, “Puryo kot lime ŋalek tokol cu wosontyiŋ nyi cek?’’ 14 Yoto kutay Yesu mawec ŋolyo mpo akenke okoy kukite poytoyintet koromun. 15 Kwak okokoy ye pesyetap sakwet nyepo Keytayet, kiponto poytoyintet kopurto nye tyoktoy mopusyontet ake tokol nye kosom piko neto. 16 Kimite yoto mopusi mopusyontet ake nye sokoran nye cekure Parapa. 17 Nteyu kowo koruruckey piko kutepe Pilato cek kule, “Oŋnkono nye omöce akwek kule otyokwok ani, Parapa nto Yesu nye cekure Ŋapanet?’’ 18 Omnye kinket Pilato kule kokwer cek Yesu kwokuwosontyine wule mite neto om corokyinot pate. 19 Nteye kimite Pilato kukepure ŋeceret nye mute musankunek, kuyok korkenyi ŋolyontet kumwoci kule, “Mente kot ayiye kiy cico moponto lelis, omnye kwetaŋanya ani koromun kirwotik cepo ŋalek ce nöme neto.’’ 20 Ntene kowurur tisik cewoyec oko poyik luket nyepo piko kumwoci kusom Pilato kutyac Parapa oŋnkupakäc Yesu kume. 21 Ntene kutepe poytoyintet cek kule, “Oŋnkono om picutecu oyeny nye omöce kule otyokwok ani akwek?’’ Kuwec cek kumwoy kule, “Cemöce Parapa!’’ 22 Kutepe Pilato cek kule, “Kunyo omöce akwek kule ayiye ani ne Yesu nye cekure Ŋapanet!’’ Kuwec piko tokol kumwoy kule, “Wuyitoci murtowontet!’’ 23 Ntene kutepe Pilato cek kule, “Omne, kukwiy lelis ne?’’ Yoto kutosyikey piko kupol koromun kumwoy kule, “Wuyitoci murtowontet!’’ 24 Ntowo kukäs Pilato kule komomuci kot akalye mpo kisic, oko yec kule muce kucec pararet, yoto kunäm peko oŋnkowun yewuniyekyi om taytap piko tokol, oŋnkumwoy kule, “Puryo kot oponte ani lelis om korotikap Cici! Nömok akwek nkit lelisto!’’ 25 Kuwec piko tokol kumwoy kule, “Kunämec acek lelisto nyepo korotikyi oko lekokyacek!’’ 26 Yoto kutyokyi Pilato cekto Parapa, oŋnkumwayta cepas Yesu oŋnkukoyito cekwer wocewuyitoci murtowontet. 27 Kukwer sikarekap Pilato Yesu kuwo kaytap Poytoyintet orit, oŋnkorurukyikey luket nyepo sikarek tokol komut Yesu. 28 Konumune sirokyi oŋnkulokyi siret nye mur kwarra, 29 oŋnkuta nkwatyet nyepo kotok oŋnkukoci metinyi, oŋnkukoci kunäme korokto yewutap tay, oŋnkukutuŋe yepo taynyi, oŋnkucasekey kumwoy kule, “Cisupoyiŋ kinko nyepo Yutayek! Ilaŋnte!’’ 30 Kuŋutyi cek neto oŋnkunumune korokto kupire metit. 31 Nteyu kowo kucasekey cek okoy kupok, kunumune siret nye mur kwarra oŋnkuketyi kulokyi sirokyi oŋnkukwer kuwo wocewuyitoci murtowontet. 32 Nteye kimite cek kupeti, kutuye citake nyepo koretap Kurene nye cekure Simon, yoto kukerci cek neto koŋ kukonop murtowontetap Yesu. 33 Kupa cek okoy ye cekure, “Kolokosa’’ nye poru kule “Rokyetap Metit.’’ 34 Kukoci cek neto kuye nfinyonik ce mwonec ce kacetase akatanet. Ntowo kucemcem Yesu, kutay maye. 35 Kuwuyitoci cekto neto murtowontet oŋnkupcicin sirokyi kuporci kirot. 36 Nto kapok, kopur cek ŋony oŋnkurip kukäs Yesu. 37 Kutore yepo metinyi parak ŋalek cepo musankunyi ce kicesil kule, “Nyi ku Yesu Kinko nyepo Yutayek.’’ 38 Cewuyitoci corik oyeny murtowonik oko Yesu, kopurune ake yewunyi nyepo tay, nto ake kopurune yewunyi nyepo let. 39 Kulelec metewokwa piko ce kimite kupeti kutile om aran oŋnkucup cek neto kumwoy kule, 40 “Nyi nyo kwemöce kule aturpup kotap Yiyintet oŋnkitec yec om pesyosyek somok! Sopkey ra nkit rekune murtowontet ye yiku nyi Weritap Yiyintet. ’’ 41 Koncurururis kuyunyoto mpecek tisik cewoyec oko konetikap ntarastinek oko poyik kumwoy kule, 42 “Kwesope neto piko alak, ntene kunyo puryo kot komuce kusopkey neto nkit. Puryo kot ku Kinko neto nyepo Israel? Ye korekune neto yawut murtowontet, mosiciyen acek ŋalekyi. 43 Kwenekey neto Yiyintet, kumwowu kule oyiku Weritap Yiyintet, kunyo cemöce cekäs oŋnkomuce cokusop Yiyintet neto yawut!’’ 44 Kucup mpo corik ce kicewuyitoy oko neto kumwoci ŋalek ceyucoto. 45 Ntowo kupunto sawet pet kwen, kunäm menonet kutuyit koret tokol nye kipur kuwany sawanik somok. 46 Ntowo kurik kupunto sawet sokol nyepo kosoleny kuŋalal Yesu kukurto om kutit nyewo kumwoy kule, “Eli, Eli, lema sapaksani.’’ Ce mwowu ŋaleca kule, “Yiyintenyu, Yiyintenyu, omne seyasta ani nyi?’’ 47 Nteye kotolime piko ce kimite keyoŋ yoto ŋalekyi, kumwoy cek kule, “Mite kukure Eriya!’’ 48 Kulapat lakwar akenke om picoto oŋnkunum cankut oŋnkolumnta wule mite nfinyonik oŋnkurutyi tekantet oŋnkusyem kule cikoci kuye. 49 Ntene kumwoy piko alake kule, “Tekany pa, cekäs oŋnkuconi Eriya cokusop neto!’’ 50 Kuŋalal Yesu yec om kutit nyewo, oŋnkomuny komuŋnto nyepo letut. 51 Yoto kukerer siret nye cepciye kotap Yiyintet kuceke met okoy kel, oŋnkuriŋriŋ koret, kutesis rwontok, 52 kuyotokis mwenonik ce kicetupci muswek, kuŋetye kotutune met piko cepo Yiyintet ce kipok. 53 Kuŋetye picoto mwenonik, nto om letut yu kowo kotutune met Yesu, kupa picoto okoy moŋet Nyetilil wule kiwo kukäse piko ce caŋ cek picoto. 54 Yoto kukäs nyewo nyepo sikarek oko sikarek ce kipontokey ce kiripe Yesu koriŋriŋetap koret oko tukuk tokol ce keyokis, kumuyo cek koromun kumwoy kule, “Koko Weritap Yiyintet cici manta!’’ 55 Kimite yoto koruk ce caŋ ce kimite ye low kuminiŋ ce kimite kuköse Yesu. Korucoto kuce kikwoni kurupu Yesu kuceke Kalilaya sukukolyoy yisyet. 56 Om cek coto ku Mariyam nyepo Maktala, oko Mariyam Kametitap Yakopo oko Yosep, oko kametitap werikap Sepetayo. 57 Ntowo kupunto kosoleny, kuco citake nye mokoryo nyepo koretap Arimaseya nye cekure Yosep nye kikikwek konomintetap Yesu. 58 Yoto kuwo neto wule mite Pilato oŋnkusom cikoci portap Yesu. Kumwayta Pilato cikoci neto musto. 59 Kunumune Yosep porto murtowontet oŋnkurate suket nyelel, 60 oŋnkukoci mwenenyi nkit nye kutokupole yepo rwantet nye kepenet, oŋnkunäm rwantet nyewo kukere kurketap mwenet oŋnkunomen kuwecikey. 61 Kimite yoto kukepur kutokyikey mwenet Mariyam nyepo Maktala oko Mariyam nyin ake. 62 Nteye kipesyet nyepo oyeny, nyoto ku pesyet nye rupe pesyet nyo ceyiytoykey. Kutuyo tisik cewoyec oko Farasayek oko Pilato, 63 oŋnkumwoci cek Pilato kule, “Mokoryontet, kacisot acek ŋalek ce kimwoy mwintoni ye kitokusope kule, ‘Mosotutune met om letutap pesyosyek somok’. 64 Kunyo mwayte cerip mwenet topon okoy kupok pesyosyek somoku, sukuŋet mente kupa konomikyi wokucor musto oŋnkumwoci piko kule, ‘Kokotutune met.’ Mosukuwoyit koperperisyet nyepo letut kusir nye kipo tay kunyo.’’ 65 Kumwoci Pilato cekto kule, “Oponte akwek sikarek ce ripsi, ape worip topon koromun kuyu wule omuktoy.’’ 66 Kunomen cek kupa oŋnkuwokuker mwenet topon kukoci pelutyet nye poru oŋnkukoci sikarek kurip.
